រាជធានីភ្នំពេញ ៖ នៅថ្ងៃអាទិត្យ ទី២០ មេសា ស្អែកនេះ កីឡាករវ័យក្មេង៤រូប ក្នុងចំណោម៨រូប ដែលមានឈ្មោះក្នុងបញ្ជីប្រកួតជម្រុះដណ្តើមខ្សែក្រវាត់ និងប្រាក់លានរបស់ក្រុមហ៊ុនគូប៊ូតា នឹងបើកឆាកប្រកួតគ្នាជាផ្លូវការហើយ នៅលើសង្វៀនទូរទស្សន៍បាយ័នថ្មី ដែលជាអតីតរោងសៀក ទល់មុខមន្ទីររដ្ឋសភាជាតិ ។ ការប្រកួតរបស់កីឡាករទាំង៤នាក់នេះ តើអ្នកណានឹងមានវាសនាក្តោបក្តាប់៣ពិន្ទុមុនគេ សម្រាប់ការប្រកួតនេះ ?
កីឡាករជើងខ្លាំងដែលត្រូវប្រកួតគ្នាក្នុងជុំទី១នោះ គឺកីឡាករវីវ៉ា សាមីត មកពីក្លិបប្រដាល់កូនខ្មែរអ្នកតស៊ូ ប៉ះជាមួយកីឡាករ ថន វាសនា មកពីក្លិបនាគមានជ័យ ។ រវាងកីឡាករទាំងពីរនេះ នៅមិនទាន់ដឹងថា អ្នកណាខ្លាំងជាងអ្នកណានៅឡើយទេ ប៉ុន្តែយោងតាមស្ថានភាពជាក់ស្តែង កីឡាករវីវ៉ា សាមីត ល្អទាំងកែង ម៉ាត់ ជង្គង់ និងកម្លាំងស៊ុហ្វ ។ ឆ្លងតាមការប្រកួតប៉ុន្មានលើកចុងក្រោយ កីឡាកររូបនេះ បានសាងស្នាដៃធ្វើឱ្យមានការភ្ញាក់ផ្អើលខ្លាំង ដោយក្នុងពេលខ្លះ វីវ៉ា សាមីត បានផ្តួលកីឡាករស្រករខ្លួន និងស្រករមុនឱ្យបាក់មុខ ព្រោះតែភាពរហ័ស និងស្នៀតពិសេសរបស់គេនោះទៀតផង។ រវាងកីឡាករទាំងពីរមានការរំពឹងជាច្រើនថា វីវ៉ា សាមីត នឹងដណ្តើមបាន៣ពិន្ទុ ដែលហោចណាស់ក៏ពិតជាដណ្តើមបានដោយលទ្ធផលឈ្នះពិន្ទុដែរ ។
យ៉ាងណាក៏ដោយ ការរំពឹងនឹងមិនអាចលេចឡើងដូចការព្យាករនោះទេ ក្នុងពេលដែលកីឡាករ ថន វាសនា ក៏ត្រូវគេមើលឃើញថា ល្អដៃ ល្អជើង និងមានយុទ្ធសាស្ត្រមុតស្រួចក្នុងការវាយផ្តួលលើគ្រប់កីឡាករនោះ ក៏មិនមែនជាដៃគូធម្មតា ។ កីឡាកររូបនេះ ប្រើតែម៉ាត់ និងកែងប៉ុណ្ណោះ តែអាចធ្វើឱ្យកីឡាករភាគច្រើនបរាជ័យ ដោយមិនទាន់រាប់បញ្ចូលលើបច្ចេកទេសប្រើជង្គង់ និងទាត់ឆ្វេងស្តាំនោះផង ។ ជុំទី១របស់កីឡាករទាំងពីរ គឺមិនខុសពីការសាកល្បងកម្លាំង និងដណ្តើមគ្នាឈ្នះចាញ់ នៅលើរេញក្នុងលក្ខណៈពិសេសនោះទេ បើទោះជាការប្រកួតដណ្តើមយក៣ពិន្ទុរបស់ពួកគេ ស្ថិតក្នុងជុំទី១ ដែលទោះអ្នកណាឈ្នះដំបូងនេះ ក៏មិនទាន់ដឹងពីលទ្ធផលយ៉ាងណាក្តី ?
ការប្រកួតមួយគូទៀត គឺរវាងកីឡាករ ម៉ន លីហួរ មកពីក្លិបព្រែកឯងមានជ័យ ប៉ះជាមួយកីឡាករ គង់ សំបូរ មកពីសមាគមកីឡាប្រដាល់ក្រសួងការពារជាតិ ។ គូនេះរឹតតែត្រូវបានគេចាត់ទុកជាគូដ៏កន្ត្រាក់អារម្មណ៍ខ្ពស់ជាង២នាក់ខាងលើទៅទៀត ដោយសារតែ ម៉ន លីហួរ គឺជាកីឡាករវ័យក្មេងកំពុងល្បីឈ្មោះខាងមានស្នាដៃ រីឯកីឡាករ គង់ សំបូរ គឺជាម្ចាស់ខ្សែក្រវាត់របស់ភេសជ្ជៈបាកាស ដែលឆ្លងកាត់ជ័យជម្នះលើកីឡាករជាដៃគូរហូតដល់៧៩នាក់ឯណោះ មុននឹងក្លាយជាបុគ្គលគ្រងតំណែងម្ចាស់ខ្សែក្រវាត់ ។ មនុស្សជាច្រើនបានផ្តល់ទស្សនៈថា គង់ សំបូរ នឹងឈ្នះ ហើយដណ្តើមបាន៣ពិន្ទុក្នុងជុំទី១ ប៉ុន្តែក៏មិនហ៊ានសង្ឃឹមច្រើននោះដែរ ក្នុងពេលដែលគេដឹងថា ដៃគូបើកឆាករបស់គេ គឺជាកីឡាករ ម៉ន លីហួរ ដែលមានថ្វីដៃគួរឱ្យសរសើរ ។ កីឡាករ គង់ សំបូរ ល្អកែង និងទាត់ល្អ ប៉ុន្តែ ម៉ន លីហួរ ក៏ម៉ាត់ល្អ និងជង្គង់មុតស្រួចដែរ ។ រវាងពួកគេ បើអ្នកណាម្នាក់ទទួលជ័យជម្នះ មិនត្រឹមតែបាន៣ពិន្ទុ ហើយសប្បាយចិត្តទុកមុនឆ្ពោះទៅដណ្តើមខ្សែក្រវាត់នៅចុងឆ្នាំនេះប៉ុណ្ណោះទេ ប៉ុន្តែក៏មានក្រេឌីតស្ទុះឡើង និងទទួលបានការចាប់អារម្មណ៍បន្ថែមក្នុងចង្កោមអ្នកស្នេហាកីឡាប្រដាល់ទៀតផង ។
ចាំមើលតើការប្រកួតរបស់កីឡាករទាំង៤រូបនេះ អ្នកណានឹងទទួលបាន៣ពិន្ទុ នាំមុខគេ ។ ការប្រកួតនេះ នឹងធ្វើឡើងនៅរៀងរាល់ថ្ងៃអាទិត្យ វេលាម៉ោង១ ដល់ម៉ោង៣រសៀល ដោយក្នុងមួយអាទិត្យ មានកីឡាករ៤រូប ក្នុងចំណោម៨រូប ប្រកួតគ្នាវិលជុំ ។ ពួកគេនឹងក្លាយជាម្ចាស់ខ្សែក្រវាត់ និងម្ចាស់ទឹកប្រាក់១០លានរៀល នៅវគ្គចុងក្រោយ ។ ការប្រកួតបើកឆាកថ្ងៃទី២០ មេសា នោះ ក៏មានការប្រកួតអមដោយកីឡាករ វង្ស ណយ និងកីឡាករថៃផងដែរ ដោយមានការរំពឹងថា នឹងធ្វើឱ្យមានការទាក់ទាញខ្លាំងនៅលើរេញថ្មី ក្នុងទីតាំងរោងសៀកនោះ ៕
ចែករំលែកព័តមាននេះ