រាជធានីភ្នំពេញ ៖ ជន សាវុធ មកពីក្លិបពោធិ៍សែនជ័យកីឡា និងខុន សីហា មកពីក្លិបកងពលធំអន្តរាគមន៍លេខ៣ ព្រះវិហារ បន្ទាប់ពីយកឈ្នះលើគូប្រកួតដោយពិន្ទុរៀងៗខ្លួននៅក្នុងវគ្គប្រកួតជម្រុះវិលជុំឈានទៅដណ្តើមខ្សែក្រវាត់ស្រាបៀរភ្នំពេញនៅលើសង្វៀន CTN កាលពីថ្ងៃទី១៧ មេសារួចមកនោះ ពួកគេត្រៀមឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀតដូចគ្នា ។
ជន សាវុធ បានយកឈ្នះ អាន មុន្នី មកពីសមាគមយុវជនកម្ពុជាខណ្ឌមានជ័យដោយពិន្ទុ ចំណែក ខុន សីហា បានយកឈ្នះ កែវ សុផានិត មកពីក្លិបសំរោងកោងកីឡាខេត្តបាត់ដំបង ។ ជំនួបរវាង ជន សាវុធ និងអាន មុន្នី នៅត្រឹមទឹកទី១ និងទី២ ទាំងសងខាងបានបង្ហាញការឌឺដងដាក់គ្នាបន្តិច ជាពិសេស អាន មុន្នី តែម្តង ជាហេតុធ្វើឱ្យ ជន សាវុធ ក្តៅស្លឹកត្រចៀកស្ទុះចូលទាត់ និងវាយម៉ាត់ ព្រមទាំងបុកស្នៀតកែងដូចព្យុះ ។ ទោះបីជាយ៉ាងណា អាន មុន្នី នៅតែបង្ហាញចរិតឌឺដងដដែល ទោះបីជាត្រូវ ជន សាវុធ វាយត្រូវឡើងចង់ទក់សាច់យ៉ាងណាក៏ដោយ ។ អាន មុន្នី មានឱកាសវាយតបតបានល្អនៅត្រឹមទឹកទី៣ បុ៉ណ្ណោះ លុះឈានចូលដល់ទឹកទី៤ និងទី៥ គេត្រូវ ជន សាវុធ ដេញវាយរត់ពេញសង្វៀនតែម្តង ទើបត្រូវចាញ់ពិន្ទុដោយគ្មានការតវ៉ា ។
គិតមកដល់ពេលនេះ ជន សាវុធ ប្រកួតបាន៥លើក ឈ្នះ៤ ចាញ់១ ធ្វើឱ្យពិន្ទុរបស់គេល្មមអាចកក់កន្លែងនៅវគ្គពាក់កណ្តាលផ្តាច់ព្រ័ត្របានហើយ ។ ចំណែក អាន មុន្នី ប្រកួតបាន៥លើក ចាញ់៤ ឈ្នះ១ ដូច្នេះគេមានតែផ្លូវហាលខោត្រឡប់ទៅផ្ទះវិញបុ៉ណ្ណោះ ។ ខុន សីហា និងកែវ សុផានិត ប្រកួតគ្នាក្នុងស្ថានភាពតឹងតែងខ្លាំងណាស់ទម្រាំតែ ខុន សីហា យកឈ្នះដោយពិន្ទុនោះ ។ ខុន សីហា មុននឹងឈ្នះពិន្ទុ ក៏វេទនាមិនតិចដែរដោយសារ កែវ សុផានិត ដើរចូលវាយកែង និងជង្គង់យ៉ាងសាហាវបំផុតចាប់ពីទឹកទី១ ដល់ទឹកទី៣ បុ៉ន្តែគេបែរជាបង្ហាញនូវការចាញ់ប្រៀបគូប្រកួតនៅពេលឈានចូលដល់ទឹកទី៤ និងទី៥ ធ្វើឱ្យគេត្រូវចាញ់ពិន្ទុនៅនាទីចុងក្រោយ ។ ខុន សីហា គិតមកដល់ពេលនេះប្រកួតបាន៥លើក ឈ្នះ៤ ចាញ់១ រីឯកែវ សុផានិត ប្រកួតបាន៥លើកដូចគ្នា ឈ្នះ១ ចាញ់៤ ដូច្នេះឱកាសឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀតគឺបានទៅលើ ខុន សីហា ។
ដោយឡែក លទ្ធផលគូប្រកួតមិត្តភាពវិញ សូត្រ ប៊ុនធី មកពីក្លិបបក្សីស្លាបដែក ឈ្នះពិន្ទុ ជ័យ ស៊ីណេត មកពីក្លិបឃ្លាំងមឿងកីឡា ។
ឈិន ធារ៉ា មកពីក្លិបបក្សីស្លាបដែក ផ្តួលឡុង ប៊ុនយីម មកពីក្លិបសាលវ័ន្តកីឡាឱ្យសន្លប់នៅក្នុងទឹកទី៤ និងឌី ដាវុធ មកពីក្លិបបញ្ជាការដ្ឋានកងទ័ពជើងទឹក យកឈ្នះសេរី សីហា មកពីក្លិបអេភូថងកីឡាដោយពិន្ទុ ៕
ចែករំលែកព័តមាននេះ