រាជធានីភ្នំពេញ ៖ កម្មវិធីប្រកួតប្រដាល់កំពូលអ្នកប្រយុទ្ធគុនខ្មែរវគ្គ២ នៅលើសង្វៀន CTN ថ្ងៃអាទិត្យស្អែកនេះធ្វើឡើងជាលក្ខណៈមិត្តភាពបុ៉ណ្ណោះ ខណៈការប្រកួតដណ្តើមខ្សែក្រវាត់ដែលឈានចូលដល់វគ្គពាក់កណ្តាលផ្តាច់ព្រ័ត្រត្រូវបានសម្រាកមួយពេលសិន ។
រាជធានីភ្នំពេញ ៖ កម្មវិធីប្រកួតប្រដាល់កំពូលអ្នកប្រយុទ្ធគុនខ្មែរវគ្គ២ នៅលើសង្វៀន CTN ថ្ងៃអាទិត្យស្អែកនេះធ្វើឡើងជាលក្ខណៈមិត្តភាពបុ៉ណ្ណោះ ខណៈការប្រកួតដណ្តើមខ្សែក្រវាត់ដែលឈានចូលដល់វគ្គពាក់កណ្តាលផ្តាច់ព្រ័ត្រត្រូវបានសម្រាកមួយពេលសិន ។
ការប្រកួតក្នុងលក្ខណៈមិត្តភាពនោះមានទាំងអស់៥គូ ក្នុងនោះមាន២គូដែលទទួលបានការចាប់អារម្មណ៍ខ្លាំងជាងគេ គឺកីឡាករទេស សំខាន់ មកពីក្លិបកងពលតូចលេខ៧០ ដែលមិនធ្លាប់ស្គាល់រសជាតិក្នុងការប្រកួតកំពូលអ្នកប្រយុទ្ធគុនខ្មែរម្តងណាសោះនោះ ត្រូវប៉ះជាមួយកីឡាករវុ៉ន ម៉ន មកពីក្លិបកងពលធំអន្តរាគមន៍លេខ៣ ព្រះវិហារ និងកីឡាករឈាន ហំ មកពីក្លិបកីឡាប្រដាល់នៃកងយោធពលខេមរភូមិន្ទ ប្រកួតជាមួយកីឡាករថៃ ប៊ុនតត មកពីក្លិបនាគរាជគុនខ្មែរ ។
ទេស សំខាន់ គឺជាកំពូលជើងខ្លាំងមួយរូបនៅក្នុងការប្រកួតក្បាច់គុនបុរាណខ្មែរ ដោយគេមានភាពបុិនប្រសប់បំផុតក្នុងការប្រើស្នៀតកែង និងជង្គង់ តែបើនិយាយពីស្នៀតចាប់ក្រៀកបោកផ្តួលវិញនោះគឺអន់បន្តិចហើយ ។ ម្យ៉ាងវិញទៀត សម្រាប់ការមកប៉ះ វុ៉ន ម៉ន ដែលធ្លាប់ប្រកួតវាយនៅក្នុងទ្រុងយ៉ាងជោកជាំនោះអាចជួបការលំបាកខ្លះៗដែរ ទើបគេពិបាកប៉ាន់ស្មានពីលទ្ធផលចុងក្រោយ មានតែរង់ចាំមើលការប្រកួតជាក់ស្តែងបុ៉ណ្ណោះ ។
ចំណែក ឈាន ហំ និងថៃ ប៊ុនតត វិញសុទ្ធតែជាអ្នកដែលមានប្រវត្តិប្រកួតវាយនៅក្នុងទ្រុងយ៉ាងជោកជាំដូចគ្នា ។ កន្លងមកពួកគេ២នាក់ធ្លាប់ជួបគ្នាជាច្រើនលើកច្រើនសារួចមកហើយ ដោយមានចាញ់-ឈ្នះទៅវិញទៅមកដូចគ្នា បុ៉ន្តែលើកនេះមិនដឹងថាអ្នកណាទទួលបានជ័យជម្នះក្នុងការជួបគ្នាជាលើកដំបូងនៅក្នុងឆ្នាំថ្មីនេះទេ ។
ក្រៅពីគូចាប់អារម្មណ៍នេះទៅនៅមានការប្រកួតរវាងកីឡាករឈុំ បញ្ញា មកពីក្លិបខេមរិន្ទមានរិទ្ធ និងកីឡាកររឿង ដេត មកពីក្លិបសំរោងកោងកីឡាខេត្តបាត់ដំបង ។ កីឡាករណប់ ស្រ៊ុន មកពីក្លិបសាលវ័ន្តកីឡា ជួបជាមួយកីឡាករមុត ប៊ុនធឿន មកពីក្លិបឃ្លាំងមឿងកីឡា និងកីឡាករម៉ៃ សុភ័ក្ត្រ មកពីក្លិបយុវជនកម្ពុជាខណ្ឌមានជ័យ ជួបជាមួយកីឡាករជី ប្រាក់ជា មកពីក្លិបនិទានសែនជ័យ ៕
ចែករំលែកព័តមាននេះ