រដ្ឋាភិបាលថៃបានថ្លែងថា ខ្លួននឹងបើកកិច្ចពិភាក្សាក្នុងពេលឆាប់ៗនេះលើសេចក្ដីអនុម័តក្នុងការយកថវិកាមកប្រើបន្ថែមពីស្ថាប័នគ្រប់គ្រងថវិកាកណ្ដាលរបស់ជាតិដើម្បីផ្ដល់ឱ្យកសិករអនុវត្តផែនការនៃកិច្ចសន្យាផលិតអង្កររបស់ពួកគេ ។ លោកYanyong Phuangrach អនុរដ្ឋមន្ត្រីក្រសួងពាណិជ្ជកម្មបានលើកឡើងថា លោកជឿជាក់ថាក្រសួងនឹងអាចប្រមូលនូវការសងមកវិញបាន ខណៈរដ្ឋាភិបាលមានសមត្ថភាពលក់អង្ករក្នុងស្ដុក ។ ជាមួយគ្នានោះផងដែរប្រទេសថៃនឹងស្វែងរកទីផ្សារថ្មីនិងការប្រកួតប្រជែងតម្លៃ ឱ្យមានកម្រិតទាបដើម្បីនាំចេញអង្ករបន្ទាប់ពីមានឱកាសនាំចេញ៨០០.០០០តោនទៅប្រទេសហ្វ៊ីលីពីន ដែលត្រូវបានបង្អាក់ដោយការផ្ដល់នូវតម្លៃទាបជាងរបស់ប្រទេសវៀតណាម ។
តាមការឱ្យដឹងពីលោកSurasak Riangkrul អគ្គនាយកទូទៅរបស់ក្រសួងពាណិជ្ជកម្មបរទេសរបស់ថៃបានបញ្ជាក់ថា ប្រទេសវៀតណាមបានដាក់តម្លៃលក់ធូរថ្លៃឱ្យប្រទេសហ្វ៊ីលីពីនទាំងតម្លៃ ធានារ៉ាប់រង និងថ្លៃដឹកជញ្ជូនចំពោះអង្ករនាំចេញ៤៤០ដុល្លារអាមេរិក ក្នុងមួយតោនសម្រាប់អង្ករស១៥% ដែលតួលេខនេះទំនងជាអាចផ្ដាច់ឱកាសនៃការនាំចេញ៨០០.០០០តោនរបស់ថៃទៅក្នុងប្រទេសហ្វ៊ីលីពីនយ៉ាងពិតប្រាកដដែលមានតម្លៃ៤៧៥ដុល្លារក្នុងមួយតោនឯណោះ ។ នៅក្នុងករណីនេះប្រទេសថៃនឹងស្វែងរកទីផ្សារដទៃដើម្បីនាំចេញនូវអង្ករដែលមានគុណភាពប្រសើរជាងនេះនិងតម្លៃខ្ពស់ជាងនេះទៅទៀតដើម្បីបញ្ចៀសនូវសង្គ្រាមតម្លៃហាងឆេងអង្ករជាមួយវៀតណាម ម្យ៉ាងទៀតគឺដើម្បីការពារគុណភាពនៃអង្កររបស់ថៃផងដែរ ។
គួរបញ្ជាក់ថា សមាគមនាំអង្ករចេញរបស់ថៃបានកំណត់តម្លៃមិនគិតថ្លៃដឹកជញ្ជូនមកដល់នាវាសម្រាប់អង្ករនាំចេញ៣៨០ដុល្លារក្នុងមួយតោន ។ ដោយឡែកក្រសួងពាណិជ្ជកម្មថៃបញ្ជាក់ថា តម្លៃនៃការនាំចេញមិនគិតថ្លៃដឹកដល់នាវានៃអង្ករថៃ១៥%គឺ៣៧៧ដុល្លារក្នុង១តោនខណៈវៀតណាម៣៦៥ដុល្លារក្នុង១តោនគឺមានភាពខុសគ្នាដល់ទៅ១០ទៅ១២%ឯណោះក្នុងមួយតោន ៕
ចែករំលែកព័តមាននេះ