រ៉ូបូមុជទឹកដែលប្រើសម្រាប់តាមរុករកយន្ដហោះបាត់ដានម៉ាឡេស៊ីជើងហោះហើរ MH 370 នៅក្នុងដែនទឹកអូស្រ្ដាលី កាលពីថ្ងៃទី១៨ មេសា បានមុជទឹកជាលើកទី៥ហួសពីជម្រៅកម្រិត ដោយពួកអ្នកផលិតវាទៀតផង ក៏ប៉ុន្ដែនៅតែពុំទាន់អាចរកឃើញអ្វីសោះដូចលើកមុនៗដែរ ។
រ៉ូបូ BLUEFIN-21ប្រដាប់ដោយឧបករណ៍ SONAR មួយ បានមុជចុះរហូតដល់ជម្រៅ៤.៦៩៥ម៉ែត្រ ។ នេះជាការអះអាងរបស់កងម៉ារីនអាមេរិក ដែលចូលរួមក្នុងការតាមរុករកយន្ដហោះបាត់ដានដែរ ។ កងម៉ារីនអាមេរិកនិយាយថា ការមុជចុះដល់ជម្រៅយ៉ាងជ្រៅបែបនេះអាចមានគ្រោះថ្នាក់សម្រាប់គ្រឿងឧបករណ៍របស់រ៉ូបូ ហើយប្រតិបត្ដិការនោះត្រូវបានតាមដានត្រួតពិនិត្យយ៉ាងដិតដល់ ។
មជ្ឈមណ្ឌលសម្របសម្រួលទទួលបន្ទុកតាមរុករកយន្ដហោះប៊ូអីុង៧៧៧បាត់ដានគូសបញ្ជាក់ថា ពេលរ៉ូបូនោះមុជទៅបាតមហាសមុទ្រឥណ្ឌា នៅកន្លែងមួយចម្ងាយប្រមាណជា២.០០០គីឡូម៉ែត្រភាគពាយ័ព្យទីក្រុង PERTH របស់អូស្រ្ដាលី ពុំកំណត់ឃើញអ្វីខុសប្លែកឡើយ ។
ការមុជទឹកលើកមុនៗរបស់រ៉ូបូនោះក៏ពុំចាប់បានអ្វីជាពិសេសដែរ ដូច្នេះទើបលើកទី៥ គេជំរុញឱ្យរ៉ូបូមុជទឹកក្នុងជម្រៅលើសពី៤.៥០០ម៉ែត្រ ដែលបែបនេះតាមធម្មតាពុំមានឡើយ ។ នាយករដ្ឋមន្ដ្រីអូស្រ្ដាលីលោក TONY ABBOTT អះអាងថា រ៉ូបូ BLUEFIN-21 នឹងប្រើរយៈពេល១សប្ដាហ៍ ៕
ចែករំលែកព័តមាននេះ