ខេត្តប៉ៃលិន ៖ ក្នុងឱកាសបុណ្យចូលឆ្នាំថ្មីប្រពៃណិជាតិរយៈពេល៣ថ្ងៃកន្លងមកថ្មីៗនេះនៅខេត្តប៉ៃលិន គេសង្កេតឃើញភ្ញៀវទេសចរជាតិ និងអន្តរជាតិមកលេងកម្សាន្តយ៉ាងច្រើនកុះករនៅតាមរមណីយដ្ឋាននានា ពោលគឺកើនឡើង១៤%បើធៀបនឹងឆ្នាំមុន។
បើតាមលោកស្រេង តុងឡាយ ប្រធានការិយាល័យផែនការ និងអភិវឌ្ឍមន្ទីរទេសចរណ៍ខេត្តប៉ៃលិនបានឱ្យដឹងថា នៅឆ្នាំ២០១៤នេះ ភ្ញៀវទេសចរបានកើនឡើងគួរឱ្យកត់សម្គាល់ ហើយនៅតាមរមណីយដ្ឋាននានាក្នុងខេត្តប៉ៃលិនមិនមានបញ្ហាអ្វីកើតឡើងទេ គ្រាន់តែមានការស្ទះចរាចរណ៍បន្តិចបន្តួចប៉ុណ្ណោះ។
នៅខេត្តប៉ៃលិនមានរមណីយដ្ឋានទឹកធ្លាក់ភ្នំខៀវ អូរតាវ៉ៅ រមណីយដ្ឋានភ្នំយ៉ាត ចំណែកផ្ទះសំណាក់ និងសណ្ឋាគារទាំងប៉ុន្មាននៅក្នុងក្រុងប៉ៃលិនគេឃើញភ្ញៀវជាតិ និងអន្តរជាតិចូលស្នាក់នៅពេញៗជារៀងរាល់ថ្ងៃស្ទើរតែរកកន្លែងទំនេរគ្មាន។
លោកស្រេង តុងឡាយ បានបញ្ជាក់ថា ជាមួយគ្នានេះភ្ញៀវទេសចរខ្លះបានរអ៊ូរទាំរឿងតម្លៃសំបុត្រ នៅរមណីយដ្ឋានទឹកធ្លាក់ភ្នំខៀវថា យកថ្លៃលើសគេ ដោយមានការឡើងថ្លៃលើសលប់ គឺលក់សំបុត្រតាំងពីផ្លូវចូលរហូតដល់កន្លែងផ្ញើម៉ូតូ និងរថយន្ត។
ទាក់ទិននឹងរឿងតំម្លៃសំបុត្រឡើងថ្លៃ អ្នកលក់សំបុត្រម៉ូតូ និងរថយន្តបានឱ្យដឹងថា គឺខាងថ្នាក់លើជាអ្នកដាក់ឱ្យពួកគេយកទេ ហើយពួកគេយកតាមតែតម្លៃដែលមាននៅក្នុងសំបុត្រកំណត់ប៉ុណ្ណោះ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ