កីឡាករប្រដាល់ហ្វ៊ីលីពីន ម៉ានី ប៉ាក់គីអាវសង្ឃឹមនឹងទទួលបានការប្រកួតជាមួយកីឡាករប្រដាល់មិនដែលចាញ់របស់អាមេរិកហ្វ្លយ មេវេដឌ័រ បន្ទាប់ពីបានយកឈ្នះខ្សែក្រវាត់ស្ថាប័ន WBO ក្នុងប្រភេទទម្ងន់ Welterweight ។ ការប្រកួតកាលពីថ្ងៃអាទិត្យសប្តាហ៍កន្លងទៅ ប៉ាក់គីអាវ បានយកឈ្នះប្រែ៊តលី ដោយពិន្ទុជាឯកច្ឆ័ន្ទ ។
កីឡាករវ័យ៣៥ឆ្នាំរូបនេះដែលបច្ចុប្បន្នគ្រងខ្សែក្រវាត់ពិភពលោក៨ប្រភេទទម្ងន់បានបន្លុយពាក្យពីការប្រកួតមួយរវាងរូបគេ និងម្ចាស់ខ្សែក្រវាត់ស្ថាប័ន WBC មេវេដឌ័រ ។ «ទ្វារគឺបើកចំហ២៤ម៉ោង និង៧ថ្ងៃក្នុងមួយសប្តាហ៍ ។ ប្រសិនជាគេចង់ នោះការប្រកួតមួយនឹងកើតឡើងភ្លាម» ។
ប៉ាក់គីអាវ និងមេវេដឌ័រ ត្រូវបានគេចាត់ទុកជាកំពូលជើងខ្លាំងក្នុងចំណោមអ្នកខ្លាំង ។ ទោះជាយ៉ាងនេះក្តី ជំរំហ្វឹកហាត់របស់ពួកគេពុំដែលបានឈានដល់កិច្ចព្រមព្រៀងណាមួយនាំពួកគេទាំង២នាក់ឱ្យឡើងតទល់គ្នាលើសង្វៀនឡើយ ។ មានដែរ ការព្រមព្រៀងមួយលើកប៉ុន្មានឆ្នាំមុន ប៉ុន្តែត្រូវបានអាក់ខានទៅវិញក្រោយមិនចុះសម្រុងលើនិតិវិធីធ្វើតេស្តឈាម ។
យ៉ាងណាក៏ដោយ នៅចំពោះមុខ ប៉ាក់គីអាវមានបំណងប្រាថ្នាដ៏ធំមួយទៀតនោះ គឺប្រកួតសងសឹកជាមួយចូអាន ម៉ានូអែល ម៉ាកហ្គេស ។ ការជួបគ្នាចំនួន៤លើក ប៉ាក់គីអាវ ធ្វើមិនបានល្អទេនៅមួយលើកចុងក្រោយកាលពីឆ្នាំ២០១២ ។ គេបានសន្លប់ក្រោមកណ្តាប់ដៃម៉ាកហ្គេស ហើយបានរងនូវការរិះគន់ និងបាក់មុខយ៉ាងខ្លាំង៕
ចែករំលែកព័តមាននេះ