ក្រោយកើតមានភាពចលាចលរយៈពេលជាង១ខែនៅភាគខាងកើតអ៊ុយក្រែនមក កិច្ចប្រជុំខាងការទូតកម្រិតខ្ពស់មួយដោយមានវត្តមានរបស់រុស្សុី អ៊ុយក្រែន សហរដ្ឋអាមេរិក និងសហភាពអឺរ៉ុប សម្រេចបានកិច្ចព្រមព្រៀងមួយស្តីពីដំណាក់កាលទាំងឡាយសម្រាប់ដោះស្រាយវិបត្តិអ៊ុយក្រែន ។
កិច្ចព្រមព្រៀងនោះចែងពីការរំសាយអាវុធពីបណ្តាក្រុមប្រដាប់អាវុធខុសច្បាប់ ដែលកំពុងមានសកម្មភាពខ្លាំងនៅអ៊ុយក្រែននាពេលនេះ ហើយដកពួកមនុស្សទាំងឡាុយចេញពីបណ្តាអគាររដ្ឋដែលពួកគេលុកចូលកាន់កាប់ ។ យោងតាមក្រុងគៀវថា ជនប្រដាប់អាវុធទាំងនេះដែលមានវត្តមានក្នុងទីក្រុងចំនួន១០នាភាគខាងកើតអ៊ុយក្រែន ជាកងទាហាននៃកងកម្លាំងពិសេសរុស្សុី មកពីតំបន់គ្រីមេ ដែលការអះអាងបែបនេះត្រូវបានប្រធានាធិបតីរុស្សុី លោកវ៉ា្លឌីមៀរ ពូទីន បដិសេធជាថ្មីក្នុងសុន្ទរកថាមួយ កាលពីថ្ងៃទី១៧ មេសា ។
កិច្ចព្រមព្រៀងនោះស្នើឱ្យបញ្ចប់អំពើហិង្សា អំពើសម្លុតបំភ័យ ឬអំពើបង្កហេតុនានា ។ ការលើកលែងទោសត្រូវផ្តល់ដល់ពួកបាតុករស្និទ្ធរុស្សុី ដែលចូលរួមក្នុងការបះបោរ លើកលែងតែពួកអ្នកដែលជាប់ចោទពីបទឧក្រិដ្ឋ ។ បេសកកម្មត្រួតពិនិត្យរបស់អង្គការសន្តិសុខ និងកិច្ចសហប្រតិបត្តិការនៅអឺរ៉ុប OSCE នឹងទទួលបន្ទុកជួយដល់អាជ្ញាធរអ៊ុយក្រែន ក្នុងការអនុវត្តវិធានការទាំងនេះ ។
ចំណែករដ្ឋមន្ត្រីការបរទេសរុស្សុី លោកស័រហ្គេយ ឡាវរ៉ូវ ដែលចូលរួមក្នុងកិច្ចប្រជុំនេះនាទីក្រុងហ្សឺណែវ អះអាងថា ភាគីទាំង៤ នឹងខិតខំបង្កើតការចរចាកម្រិតជាតិយ៉ាងទូលំទូលាយមួយ ដើម្បីធានាដល់កិច្ចការពារសិទ្ធិរបស់ពលរដ្ឋអ៊ុយក្រែន ។ ពុំមានភាពលម្អិតណាមួយត្រូវបានផ្តល់ទាក់ទិនដល់ការបោះឆ្នោតប្រធានាធិបតីអ៊ុយក្រែន ដែលគ្រោងធ្វើនាថ្ងៃទី២៥ ឧសភា ខាងមុខនេះ ដែលក្រុងមូស្គូ ចាត់ទុកថា ខុសច្បាប់នោះឡើយ ។
រុស្សុីផ្តោតលើប្រការដែលថា អ៊ុយក្រែនកំពុងស្ថិតលើមាត់ជ្រោះនៃសង្គ្រាមសុីវិលមួយ ហើយស្នើឱ្យសើរើរដ្ឋធម្មនុញ្ញដែលនឹងផ្តល់ស្វ័យភាពកាន់តែទូលាយដល់បណ្តាតំបន់មានពលរដ្ឋនិយាយភាសារុស្សុីភាគច្រើននាភាគខាងកើតអ៊ុយក្រែន ។ លោកឡាវរ៉ូវ អះអាងថា រុស្សុីគ្មានចេតនាណាមួយទន្ទ្រានយកតំបន់ភាគខាងកើតអ៊ុយក្រែនឡើយ ៕
ចែករំលែកព័តមាននេះ