មនុស្សមួយចំនួនធំបានជួបនឹងបញ្ហាជ្រុះសក់ជាប្រចាំក្នុងជីវិតរស់នៅរបស់ខ្លួន ។ ថ្វីបើហ្សែនតំណពូជជាចំណែកមួយសំខាន់ក្នុងបញ្ហានេះ ប៉ុន្តែមានកត្តាច្រើនយ៉ាងផ្សេងទៀតដែលបណ្តាលឱ្យសក់ជ្រុះ ក្នុងនោះមានដូចជា របបអាហារ ការខ្វះខាតសារធាតុរ៉ែជាដើម ។ យ៉ាងណាក៏ដោយ គេអាចកាត់បន្ថយបញ្ហានេះបានដោយអនុវត្តវិធីសាស្ត្រមួយចំនួនដូចតទៅ ៖
១- ទទួលអាហារសម្បូរដោយវីតាមីន ៈ
ដើម្បីដុះលូតលាស់ សក់ត្រូវការជាចាំបាច់នូវសារធាតុចិញ្ចឹម ។ ប្រភពដ៏សំខាន់របស់សារធាតុចិញ្ចឹមគឺវីតាមីន ។ ចូរធានាថា អាហាររបស់លោកអ្នកផ្ទុកទៅដោយវីតាមីន B6,B12 និងវីតាមីន D ។ វីតាមីនទាំងនេះមិនត្រឹមតែជួយផ្គត់ផ្គង់សារធាតុចិញ្ចឹមចាំបាច់ដល់រាងកាយប៉ុណ្ណោះទេ ប៉ុន្តែ ថែមទាំងជួយរាងកាយក្នុងការធ្វើឱ្យមានតុល្យភាពអ័រម៉ូនទៀតផង ។
២- កាត់បន្ថយកម្រិត Stress ៈ
លទ្ធផលនៃការសិក្សាស្រាវជ្រាវជាច្រើនបានបង្ហាញថា Stressកម្រិតខ្ពស់បណ្តាលឱ្យជ្រុះសក់ ។ នេះពីព្រោះនៅពេលបុគ្គលម្នាក់ជួបនឹងបញ្ហា Stressខ្លាំង ការផលិតអ័រម៉ូនឈ្មោះ Cortisolក៏មានកាន់តែច្រើនដែរ ។ ចូរកាត់បន្ថយ Stressតាមរយៈការហាត់ប្រាណនិងចំណាយពេលជជែកលេងកំសាន្តជាមួយមិត្តភក្តិឬមនុស្សនៅជុំវិញខ្លួនក្នុងពេលទំនេរពីការងារ ។
៣- ជៀសវាងប្រើផលិតផល ដូចជា ស្ព្រៃយ៍បាញ់សក់ឬថ្នាំលាប ៈ
យោងតាមអ្នកជំនាញផ្នែកសក់ ផលិតផលព្យាបាលនិងកាច់ម៉ូដសក់ ធ្វើឱ្យសក់ជំពាក់ជាប់គ្នានាំទៅរកការជ្រុះ ។ ត្រូវធ្វើឱ្យប្រាកដថា សក់លោកអ្នកជាសក់ពីកំណើតដោយជៀសវាងការប្រើស្ព្រៃយ៍បាញ់ពង្រឹងនិងថ្នាំលាបដែលមានលាយធាតុគីមី ។
ជំនួសឱ្យការប្រើផលិតផលទាំងនេះ គេគួរប្រើប្រេងបន្ទន់សក់និងសាប៊ូកកក់សក់ដែលមានសារធាតុផ្សំពីធម្មជាតិ ។
៤- ការពារសក់ពីអំបិលនិងក្លរីន ៈ
ភស្តុតាងវិទ្យាសាស្ត្របានបង្ហាញថា សារធាតុគីមីទាំង២ប្រភេទនេះអាចបំផ្លាញដល់ឫសសក់នាំឱ្យទំពែកមុនអាយុ ។ ក្លរីនត្រូវគេប្រើជាថ្នាំសម្លាប់មេរោគក្នុងទឹកម៉ាស៊ីននិងក្នុងអាងហែលទឹក ។ ដូច្នេះ ដើម្បីការពារសក់ គេគួរពាក់មួកប្លាស្ទិកក្នុងពេលហែលទឹក ។
ចំពោះអំបិល គេគួរការពារដោយការលាងជម្រះនឹងទឹកសាបជាពិសេសក្រោយពេលហែលទឹកសមុទ្ររួច ។
៥- ពិនិត្យមើលលើការផ្លាស់ប្តូររបបអាហារ ៈ
របបអាហារដែលផ្តល់នូវសុខភាពគឺជាកត្តាសំខាន់នៅពីក្រោយសុខភាពសក់ ។ ប្រូតេអុីនគឺជាធាតុមិនអាចខ្វះបានក្នុងការផលិត Keratin (ប្រូតេអុីនគ្មានពណ៌កើតពីធម្មជាតិមាននាទីបង្កើតសក់ ស្នែង ក្រចក…) ។ ចូរផ្តោតលើអាហារដែលសម្បូរប្រូតេអុីនក្នុងនោះមានដូចជា ត្រី សាច់មាន់ ស៊ុត ផលិតផលទឹកដោះគោ បណ្តាផ្លែឈើនិងបន្លែបៃតង ។
៦- ជៀសវាងការជក់បារីនិងផឹកស្រា ៈ
រហូតមកទល់នឹងបច្ចុប្បន្ននេះអ្នកវិទ្យាសាស្ត្ររកមិនឃើញទាល់តែសោះពីអត្ថប្រយោជន៍សុខភាពរបស់បារី ។ ផ្ទុយមកវិញ គេបែរជារកឃើញថា បារីធ្វើឱ្យមនុស្សឆាប់ស្លាប់ទៅវិញ ។ ការរកឃើញមួយបានបង្ហាញថា កាបូនម៉ូណូអុកស៊ីតក្នុងផ្សែងបារីដែលគេហឺតស្រូបចូលបានរំខានដល់ដំណើរអុកស៊ីសែនក្នុងឈាម ជាហេតុធ្វើឱ្យអាហារចិញ្ចឹមនានាមិនអាចទៅចិញ្ចឹមឫសសក់បាន ។ ចំណែកផលអាក្រក់គ្រឿងស្រវឹងវិញគឺ ៖
-ធ្វើឱ្យរាំងស្ទះដល់ដំណើរស្រូបយកសារធាតុស័ង្កសីរបស់រាងកាយ
-បណ្តាលឱ្យបាត់បង់ជាតិទឹកដែលជាយថាហេតុរំខានដល់ការស្រូបយកសារធាតុចិញ្ចឹម
– ធ្វើឱ្យសក់ស្រួយ បង្កើនការជ្រុះកាន់តខ្លាំង ៕
ចែករំលែកព័តមាននេះ