មនុស្សមួយចំនួនជាពិសេសស្ត្រីតែងកាត់បន្ថយការទទួលទានអាហារដើម្បីបញ្ចៀសការឡើងទម្ងន់ ប៉ុន្តែទង្វើនោះអាចមិនត្រឹមត្រូវនោះទេដ្បិត តាមការស្រាវជ្រាវថ្មីមួយបានបង្ហាញថា គន្លឹះសំខាន់គឺស្ថិតនៅលើពេលវេលាដែលគេចាប់ទទួលទានអាហារទាំង៣ពេល។
យោងតាមការស្រាវជ្រាវធ្វើឡើងដោយក្រុមហ៊ុនរបបអាហារ Forza Supplements ឱ្យដឹងថា ដើម្បីទប់ស្កាត់ការឡើងទម្ងន់ខ្លួនដែលបណ្តាលមកពីការទទួលទានអាហារក្នុងមួយថ្ងៃ៣ពេល គេចាំបាច់ត្រូវលៃពេលទទួលទាន ។ ពេលវេលាល្អបំផុតសម្រាប់ទទួលទានអាហារពេលព្រឹកគឺក្រោយម៉ោង៧បន្តិច មានន័យថា អាចម៉ោង៧និង១១នាទី ។ ចំណែកពេលវេលាសម្រាប់អាហារថ្ងៃត្រង់គឺនៅម៉ោង ១២ និង៣៨នាទី ពោលគឺចន្លោះពីម៉ោង១២និង៣០នាទីទៅម៉ោង១ ។ ឯពេលល្អបំផុតសម្រាប់ទទួលទានអាហារពេលល្ងាចគឺចន្លោះពីម៉ោង៦ទៅម៉ោង ៦និង៣០នាទី ។
ការស្រាវជ្រាវបានបង្ហាញទៀតថា ៨៤ភាគរយនៃអ្នកជំនាញខាងរបបអាហារគិតថា ការកំណត់ពេលវេលាទទួលទានអាហារទាំង៣ពេលគឺពិតជាមានសារសំខាន់បំផុតសម្រាប់អ្នកដែលមិនចង់ឡើងទម្ងន់ខ្លួន ។នាយកប្រតិបត្តិក្រុមហ៊ុន Forza Supplements លោក Lee Smithថ្លែងថា ៖«រឿងសំខាន់សម្រាប់អ្នកជំនាញរបបអាហារភាគច្រើនគឺមិនមែនស្ថិតនៅលើរយៈពេលដែលពួកគេទទួលទាននោះទេ តែគឺស្ថិតនៅលើ ថាតើចាប់ផ្តើមនៅពេលណា ។ យើងបានរកឃើញថា ពេលដែលល្អប្រសើរបំផុតសម្រាប់អាហារពេលព្រឹកគឺ ម៉ោង ៧.១១នាទី អាហារថ្ងៃត្រង់ ម៉ោង ១២.៣៨នាទីខណៈម៉ោង ៦.១៤នាទីជាពេលល្អបំផុតសម្រាប់ទទួលទានអាហារពេលល្ងាច ។ ប៉ុន្តែ តាមពិតទៅ គឺគ្មានអ្នកណាអាចប្រតិបត្តិតាមពេលពេលានោះដោយឥតល្អៀងនោះទេ »។
លោក Smith បន្តថា វិធីសាស្ត្រទប់ស្កាត់ការឡើងទម្ងន់ដ៏ជោគជ័យមួយផ្សេងទៀតគឺមិនត្រូវគេចវេះអាហារណាមួយក្នុងចំណោមទាំង៣ពេលជាពិសេសអាហារពេលព្រឹក ។ លោកថា ៖«លទ្ធផលស្រាវជ្រាវបានបង្ហាញថា អាហារពេលព្រឹកសំខាន់ជាងគេក្នុងចំណោមអាហារទាំង៣ពេល ។ ការគេចវេះទទួលទានអាហារពេលព្រឹកនឹងរឹតតែធ្វើឱ្យអ្នកឃ្លានខ្លាំង ហើយបង្កើនការទទួលទានអាហារថ្ងៃត្រង់និងពេលល្ងាច ។
សារសំខាន់បង្កប់នៅក្នុងការរកឃើញលើកនេះគឺថា គេមិនត្រូវគេចវេះមិនទទួលទានអាហារណាមួយក្នុងចំណោមទាំង៣ពេលឬទទួលទានអាហារពេលល្ងាចខកពេលយប់ជ្រៅនោះទេ ។ ការទទួលទានកៀកពេលចូលដេកពិតជាធ្វើឱ្យកម្រិតស្ករក្នុងឈាមនិងអ័រម៉ូនអាំងស៊ុយលីនកើន »៕
ចែករំលែកព័តមាននេះ