កូរ៉េខាងត្បូង ៖ចំនួនមនុស្សស្លាប់ដោយសារការលិចនាវាចម្លងរបស់កូរ៉ខាងត្បូង គិតត្រឹមព្រឹកថ្ងៃទី១៧ មេសា ២០១៤ បានកើនដល់០៩នាក់ហើយ ក្នុងនោះ១៧៩នាក់បានត្រូវសង្គ្រោះ និងបាត់ខ្លួន២៨៧នាក់ ។
យោងតាមទីភ្នាក់ងារព័ត៌មាន NHK របស់ជប៉ុនបានឲ្យដឹងទៀតថា នៅពេលនេះក្រុមទាហាន និង ឆ្មាំការពារឆ្នេរសមុទ្រកំពុងបន្តប្រតិបត្តិការជួយសង្គ្រោះ និង ស្វែងរកអ្នកបាត់ខ្លួន ក៏ដូចជាបើកការស៊ើបអង្កេតពីមូលហេតុនៃការលិចនាវា។
គួរបញ្ជាក់ថា នាវាចម្លងមួយគ្រឿងនេះបានផ្ទុកមនុស្ស៤៧៥នាក់ ដែលព័ត៌មានជំហានដំបូងថា មនុស្ស៤៧០នាក់ បានលិចនៅម៉ោង៩ព្រឹក ម៉ោងក្នុងប្រទេសកូរ៉េខាងត្បូង ថ្ងៃទី១៦ មេសា ២០១៤ ។
បើតាមមន្រ្តីកូរ៉េខាងត្បូង ក្នុងចំណោមមនុស្ស៤៧៥នាក់ ដែលនៅលើនាវានោះ គឺមានសិស្សវិទ្យាល័យចំនួន៣០០នាក់ និង ជនជាតិបរទេសចម្រុះជាតិសាសន៏៣នាក់ ។
នាវានេះបានបាត់សញ្ញាពីប្រព័ន្ឋរ៉ាដានៅចម្ងាយ ២០គីឡូម៉ែត្រពីកោះ Jindo ខេត្តJeolla ភាគខាងត្បូង ស្ថិតនៅភាគនិរតីនៃប្រទេសកូរ៉ខាងត្បូង ។
ក្រុមមន្រ្តីបាននិយាយថា នាវានេះលិចទំនងដោយសារបញ្ហាអាកាសធាតុ ព្រោះបើតាមឆ្មាំសមុទ្រគឺនៅជុំវិញកោះJindoកាលពីព្រឹកថ្ងៃម្សិលមិញ មានចុះអ័ព្ទខ្លំាង ប៉ុន្តែព័ត៌មាននៅថ្ងៃព្រហស្បតិ៍នេះបានបញ្ជាក់ថា នាវានេះអាចប៉ះទង្គិចជាមួយផ្ទាំងដុំថ្ម ៕
ចែករំលែកព័តមាននេះ