រាជធានីភ្នំពេញ ៖ យានដ្ឋានយីហោ ធារុន ហេង ហេង មួយកន្លែងស្ថិតនៅតាមបណ្តោយវិថី ម៉ុង រិទ្ឋី ក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ បានត្រូវក្រុមចោរគាស់ជញ្ជំាង និង បង្អួចចូលវាយបំបែកទូដែក យកគ្រឿងអលង្ការនិងលុយសរុបជិត៣ម៉ឺនដុល្លារអាមេរិក ខណៈម្ចាស់រវល់យកចង្ហាន់ទៅប្រគេនព្រះសង្ឃក្នុងថ្ងៃចូលឆ្នាំថ្មីថ្ងៃទី២ ។
ហេតុការណ៏នេះ បង្កឲ្យមានការភ្ញាក់ផ្អើលកាលពីម៉ោង១១និង៣០នាទីថ្ងៃត្រង់ថ្ងៃទី១៥ មេសា ២០១៤ ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សំដី លោក អ៊ឹម រិទ្ឋី ម្ចាស់យានដ្ឋានខាងលើឲ្យដឹងថា នៅមុនពេលកើតហេតុ ពោលគឺនៅវេលាព្រឹកថ្ងៃអង្គារម្សិលមិញ រូបលោកនិងភរិយាបានធ្វើចង្ហាន់យកទៅប្រគេនព្រះសង្ឃនៅវត្តអង្គតាភោគ ស្ថិតក្នុងស្រុកបាទី ខេត្តតាកែវ ដោយទុកកម្មករនិងអ្នកបើកបរម្នាក់ឲ្យនៅចំាយាមយានដ្ឋាន ប៉ុន្តែកម្មករឈ្មោះ សាន កុសល និងអ្នកបើររវល់ទៅដើរលេង លុះមកដល់ផ្ទះវិញក៏ស្រាប់តែឃើញជញ្ជាំងនិងបង្អួចត្រូវបានចោរគាស់ ក៏ទូរស័ព្ទបា្រប់លោក ខណៈលោកវិលត្រឡប់មកជិតដល់ផ្ទះដែរនោះ បង្កឲ្យមានការភ្ញាក់ផ្អើលតែម្តង ។
បើតាមម្ចាស់យានដ្ឋានគ្រឿងអលង្ការនិងលុយដែលចោរប្រមូលយកទៅនោះ មានក្រវិលមួយគូទម្ងន់១ជី ខ្សែកមាសមួយខ្សែទម្ងន់៥ជី ផ្លាកដៃមានដំាត្បូងទម្ងន់៥ជី ខ្សែកម៉ូដច្រវ៉ាក់ឆាបទម្ងន់១តម្លឹង ៤ជី មាសដុំទម្ងន់ ១០តម្លឹង និង លុយដុល្លារចំនួន២០០០ដុល្លារ ។
នៅពេលនេះ សមត្ថកិច្ចកំពុងស្រាវជ្រាវរកមុខសញ្ញាដើម្បីចាប់យកមកផ្តន្ទាទោសតាមច្បាប់ ៕
ចែករំលែកព័តមាននេះ