ខេត្តប៉ៃលិន៖ មានករណីគ្រោះថ្នាក់ចរាចរណ៍មួយបានកើតឡើងដោយម៉ូតូវីវ៉ាបើកបរក្នុងល្បឿនលឿនវ៉ារថយន្តមួយគ្រឿងជ្រុលទៅបុកម៉ូតូឌ្រីមមួយគ្រឿងទៀតដែលបើកបរក្នុងទិសដៅច្រាសគ្នា បណ្តាលឱ្យអ្នកបើកបរទាំងសងខាងស្តាប់ភ្លាមៗនៅនឹងកន្លែងកើតហេតុ និងអ្នករួមដំណើរម្នាក់ទៀតរងរបួសធ្ងន់ ។ ឧបទ្ទវហេតុនេះ បានកើតឡើងកាលពីម៉ោង៧និង១៥នាទីយប់ ថ្ងៃទី១៤ មេសា ២០១៤ ស្ថិតនៅបណ្តោយផ្លូវជាតិលេខ៥៧ ត្រង់ចំណុចស្តេចកន ក្នុងភូមិអូរបេង ឃុំស្ទឹងកាច់ ស្រុកសាលាក្រៅ ។
បើតាមអ្នកឆ្លើយឆ្លងព័ត៌មានកោះសន្តិភាពបានបញ្ជាក់ឲ្យដឹងទៀតថា អ្នកបើកបរម៉ូតូវីវ៉ាពណ៌ខ្មៅ ពាក់ស្លាកលេខ ប៉ៃលិន 1A-8211 ដែលស្លាប់ ឈ្មោះ គឹម ចាន់ ភេទប្រុស អាយុ២១ឆ្នាំ ជាកសិករ រស់នៅភូមិដូង ឃុំស្ទឹងកាច់ ស្រុកសាលាក្រៅ ។ ចំណែកអ្នកបើកបរម៉ូតូម៉ាកឌ្រីម ពាក់ស្លាកលេខ ប៉ៃលិន 1A-8267 ជនរងគ្រោះ ឈ្មោះ អ៊ីម រស្មី ភេទប្រុស អាយុ៣៤ឆ្នាំ ជាកសិករ ស្លាប់នៅនឹងកន្លែងដូចគ្នា និងអ្នករួមដំណើរម្នាក់ទៀត ឈ្មោះ អ៊ឹម រក្សាពៅ ភេទប្រុស អាយុ៣០ឆ្នាំ ជាកសិករ រងរបួសធ្ងន់ ទាំងពីរនាក់រស់នៅភូមិទឹកចេញ ឃុំស្ទឹងកាច់ ស្រុកសាលាក្រៅ ។
ក្រោយកើតហេតុសមត្ថកិច្ចបានប្រគល់សពជូនក្រុមគ្រួសារធ្វើបុណ្យតាមប្រពៃណី និងអ្នករបួសធ្ងន់បញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តចំណែកម៉ូតូទំាងពីរគ្រឿង ត្រូវបានបញ្ជូនយកមករក្សាទុកនៅការិយាល័យចរាចរណ៏ជើងគោកខេត្ត រង់ចាំដោះស្រាយតាមនីតិវិធីច្បាប់ ៕
ចែករំលែកព័តមាននេះ