ខេត្តបាត់ដំបង ៖ លោកអញ កាម៉ាល់មេបញ្ជាការរង មូលដ្ធានកងរាជអាវុធហត្ថស្រុកសំពៅលូន បានឲ្យដឹងថា ត្រាក់ទ័រមួយគ្រឿង បានកិនចំមីនតោន បណ្ដាលឲ្យផ្ទុះរបួសមនុស្ស២នាក់ គ្រាដែលកំពុងបើកភ្ជួរដីចំការដាំដំឡូងមី កាលពីវេលាម៉ោង៧និង៤០នាទីព្រឹកថ្ងៃទី១១មេសា នៅចំណុចថ្លុកសង្កែ ស្ថិតក្នុងភូមិអូរត្រាវជួ ឃុំសេរីមានជ័យ ស្រុកសំពៅលូន។
លោកអញ កាម៉ាល់ បានផ្ដល់ព័ត៌មានមកថា ជនរងគ្រោះដោយសារផ្ទុះគ្រាប់មីនតោននេះ ឈ្មោះពូ អេងលាង ភេទ ប្រុសអាយុ២៧ឆ្នាំ ជាអ្នកបើកត្រាក់ទ័រ របួសជើងខាងស្ដាំតែមិនធ្ងន់ធ្ងរទេ និង២.ឈ្មោះស រ៉ាត់ ប្រុស អាយុ៤២ឆ្នាំ មិនមានស្នាមរបួសទេ តែសន្លប់ធំ ដោយសារតែគាត់ដើរពង្រាយដើមដំឡូង តាមក្រោយត្រាក់ទ័រសំរាប់ទុកឲ្យកម្មករដាំ។
លោកបញ្ជាក់ថា ត្រាក់ទ័រនោះពណ៏ក្រហមផលិតនៅអតីតៈសហភាពសូវៀត រងការខូចខាតកង់ក្រោយផ្នែកខាងស្ដាំ។ លោកមរបញ្ជាការរងរូបនេះ បញ្ជាក់បន្ថែមថា ដីចំការនៅធ្លាប់ភ្ញួរដាំដំណាំរាល់ឆ្នាំ មិនដែលមានគ្រោះថ្នាក់អ្វីទេ លុះភ្ជូរលើកនេះក៏កិនចំគ្រាប់មីនតោន ដែលសេសសល់ ពីសម័យសង្រ្គាមបណ្ដាលឲ្យផ្ទុះកក្រើកដីតែម្ដង។
តាមប្រភពពីសាក្សីថា នៅតំបន់នោះកាលពីប៉ុន្មានឆ្នាំមុន ជាប្រភពនៃគ្រាប់មីនគ្រប់ប្រភេទ ដែលសេសសល់ពីសម័យសង្រ្គាម ហើយក៏មានប្រជាកសិករមួយចំនួន ធ្លាប់គ្រោះថ្នាក់ដោយសារ គ្រាប់មីនសំណល់ពីង្រ្គាមនេះដែរ។ ប្រភពដដែលបញ្ជាក់ដែរថា រហូតមកដល់ពេលនេះ បើទោះជាដីនៅតំបន់នោះ ត្រូវបានការឆ្ការភ្ជួរដំណាំច្រើនឆ្នាំទៅហើយក្ដី ក៏នៅមានសេសសល់គ្រាប់មីនខ្លះៗដែរ តែអាចនៅដោយកន្លែង។ ទោះជាយ៉ាងណាប្រជាកសិករគួរតែមានការប្រុងប្រយ័ត្ន ព្រោះគ្រាប់មីនទាំងនោះកប់ក្នុងដីមើលមិនឃើញទេ ។
ចែករំលែកព័តមាននេះ