រាជធានីភ្នំពេញ ៖ ក្រុមសមាជិកព្រឹទ្ធសភាខាងគណបក្សប្រជាជនកម្ពុជា បានចេញសេចក្តីថ្លែងការណ៍សម្តែងការសោកស្តាយចំពោះការធ្វើពហិការមិនចូលប្រជុំរបស់ក្រុមសមាជិកព្រឹទ្ធសភា១១រូបមកពីបក្សសម រង្ស៊ី នៅក្នុងការប្រជុំវិសាមញ្ញរបស់ព្រឹទ្ធសភា ដែលគណៈកម្មាធិការអចិន្ត្រៃយ៍ព្រឹទ្ធសភាបានកំណត់យកថ្ងៃទី១១ មេសា ប្រជុំវិសាមញ្ញដើម្បីពិនិត្យ និងឱ្យយោបល់លើេសចក្តីព្រាងច្បាប់ចំនួនបី ។
យោងតាមសេចក្តីថ្លែងការណ៍របស់ក្រុមសមាជិកព្រឹទ្ធសភាខាងគណបក្សប្រជាជនកម្ពុជានេះ គឺឆ្លើយតបទៅនឹងសេចក្តីថ្លែងការណ៍របស់ក្រុមសមាជិកព្រឹទ្ធសភាខាងគណបក្សសម រង្ស៊ី កាលពីថ្ងៃទី១០ មេសា ដែលប្រកាសពីការមិនចូលប្រជុំវិសាមញ្ញរបស់ព្រឹទ្ធសភា ។ សេចក្តីថ្លែងការណ៍របស់ក្រុមសមាជិកព្រឹទ្ធសភាខាងគណបក្សប្រជាជនកម្ពុជា លើកឡើងថា ចំពោះករណីនេះក្រុមសមាជិកព្រឹទ្ធសភាគណបក្សប្រជាជនកម្ពុជាសូមគូសបញ្ជាក់ថា ៖
១-គណៈកម្មាធិការអចិន្ត្រៃយ៍ព្រឹទ្ធសភាបានរៀបចំសម័យប្រជុំវិសាមញ្ញព្រឹទ្ធសភាស្របទៅតាមបទប្បញ្ញត្តិ និងនីតិវិធីកំណត់ក្នុងរដ្ឋធម្មនុញ្ញ និងបទបញ្ជាផ្ទៃក្នុងព្រឹទ្ធសភា ។
២-ការប្រកាសមិនចូលរួមក្នុងកិច្ចប្រជុំវិសាមញ្ញព្រឹទ្ធសភានាថ្ងៃទី១១ មេសា របស់សមាជិកព្រឹទ្ធសភាចំនួន១១រូបមកពីគណបក្សសម រង្ស៊ី ពុំមានឥទ្ធិពលអ្វីរារាំងបាននូវដំណើរការជាប្រក្រតីរបស់ព្រឹទ្ធសភាឡើយ ព្រោះក្នុងគ្រប់កាលៈទេសៈកូរ៉ុមនៅមានលើសពីពាក់កណ្តាលនៃចំនួនសមាជិកព្រឹទ្ធសភាទាំងមូល ។
៣-រដ្ឋសភានៃព្រះរាជាណាចក្រកម្ពុជានីតិកាលទី៥ បានកើតចេញពីឆន្ទៈរបស់ប្រជាពលរដ្ឋកម្ពុជា តាមរយៈការបោះឆ្នោតជាសាកល ដោយសេរី ស្មើភាព ដោយចំពោះ និងជាសម្ងាត់ ហើយមានភាពរលូន គ្មានអំពើហិង្សា ។ រដ្ឋសភានេះ បាននិងកំពុងដំណើរការរបស់ខ្លួនស្របតាមរដ្ឋធម្មនុញ្ញ និងបទបញ្ជាផ្ទៃក្នុងនៃរដ្ឋសភា ហើយមាននីត្យានុកូលភាពពេញលេញក្នុងការអនុវត្តការងារ ។
៤-អ្នកធ្វើពហិការមិនចូលរួមប្រជុំព្រឹទ្ធសភា ក៏ដូចជាអ្នកធ្វើពហិការមិនចូលប្រជុំរដ្ឋសភា សុទ្ធតែជាអ្នកទទួលខុសត្រូវក្នុងការអនុវត្តនូវភាពតំណាងដែលជាឆន្ទៈប្រគល់ដោយប្រជាពលរដ្ឋកម្ពុជា ។ ពហិការពុំមែនជាដំណោះស្រាយឡើយ ។ សូមបញ្ជាក់ថា ក្រុមសមាជិកព្រឹទ្ធសភាខាងគណបក្សប្រជាជនកម្ពុជាបានចេញសេចក្តីថ្លែងការណ៍សម្តែងការសោកស្តាយចំពោះការមិនចូលប្រជុំព្រឹទ្ធសភារបស់សមាជិកព្រឹទ្ធសភាខាងគណបក្សសម រង្ស៊ីនេះ គឺបន្ទាប់ពីក្រុមសមាជិកព្រឹទ្ធសភា១១រូបរបស់គណបក្សសម រង្ស៊ី បានចេញសេចក្តីថ្លែងការណ៍ធ្វើពហិការមិនចូលប្រជុំវិសាមញ្ញព្រឹទ្ធសភានៅថ្ងៃទី១១ មេសា ។ ក្នុងសេចក្តីថ្លែងការណ៍ដែលចុះហត្ថលេខាដោយក្រុមសមាជិកព្រឹទ្ធសភាគណបក្សសម រង្ស៊ី ទាំង១១រូបសរសេរថា ក្រុមសមាជិកព្រឹទ្ធសភា១១រូបមកពីគណបក្សសម រង្ស៊ី សម្រេចមិនចូលរួមប្រជុំវិសាមញ្ញនៅថ្ងៃទី១១ មេសា ឆ្នាំ២០១៤ ដើម្បីពិនិត្យផ្តល់យោបល់លើច្បាប់មួយចំនួនដែលបញ្ជូនមកដោយរដ្ឋសភាឯកបក្សនោះ។
សេចក្តីថ្លែងការណ៍នេះ ក៏បានទទូចឱ្យគណបក្សនយោបាយឈ្នះទទួលបានអាសនៈក្នុងរដ្ឋសភាកាលពីពេលបោះឆ្នោតថ្ងៃទី២៨ កក្កដា ២០១៣ ពិភាក្សាបញ្ចប់ជាបន្ទាន់អំពីសមាសភាពឯករាជ្យរបស់គណៈកម្មាធិការជាតិរៀបចំការបោះឆ្នោត (គ.ជ.ប) ការកែទម្រង់នីតិវិធីការបោះឆ្នោត និងការបោះឆ្នោតឡើងវិញ ដើម្បីផ្តល់យុត្តិធម៌ និងផ្តល់សិទ្ធិដល់ប្រជាពលរដ្ឋគ្រប់រូប សម្រាប់ការបោះឆ្នោតដែលប្រជាពលរដ្ឋ និងសាធារណមតិអន្តរជាតិទាមទារយ៉ាងខ្លាំងនោះ។ ក្រុមសមាជិករបស់គណបក្សប្រឆាំងចង់ឃើញរដ្ឋសភាត្រឹមត្រូវ ពេញលេញ បញ្ចប់ចរិតរដ្ឋសភាឯកបក្ស ។ ក្រុមសមាជិកព្រឹទ្ធសភាខាងគណបក្សសម រង្ស៊ី ស្នើឱ្យគណបក្សនយោបាយទាំងពីរដែលឈ្នះបានអាសនៈក្នុងរដ្ឋសភានីតិកាលទី៥ តម្កល់ផលប្រយោជន៍ប្រទេសជាតិ និងប្រជាពលរដ្ឋកម្ពុជា ដែលមានស្មារតីកិច្ចព្រមព្រៀងទីក្រុងប៉ារីសឆ្នាំ១៩៩១ ជាគន្លឹះដើម្បីសន្តិភាព ស្ថិរភាព និងអភិវឌ្ឍន៍ពិតប្រាកដ ។
ក្រុមអ្នកវិភាគនិយាយថា ការប្រកាន់ជំហររឹងត្អឹងរបស់គណបក្សប្រឆាំងនៅក្នុងព្រឹទ្ធសភានេះ គឺគ្រាន់តែជាចេតនាអូសបន្លាយនូវស្ថានភាពបច្ចុប្បន្នឱ្យប្រឈមនឹងការលំបាកមួយចំនួន តែសម្រាប់គណបក្សប្រជាជនកម្ពុជា ដែលជាសសរស្តម្ភនៃនិរន្តរភាពជាតិ អាចទ្រោលស្ថានការណ៍នេះបានដដែល ។ ការធ្វើពហិការនេះក៏មិនមែនជាឆន្ទៈស្វែងរកដំណោះស្រាយបញ្ហាជាតិពិតប្រាកដនោះដែរ ព្រោះបើនិយាយពីចំនួន «កូរុ៉ម» នៃអង្គប្រជុំ ទោះបីគ្មានការចូលរួមពីគណបក្សប្រឆាំង ក៏កិច្ចប្រជុំនោះនៅតែដំណើរការបានដដែល គ្មានអ្វីខុសច្បាប់នោះទេ។
នេះជាបញ្ហាប្រទាំងប្រទើសគ្នាមួយនៅក្នុងស្ថាប័ននីតិប្បញ្ញត្តិ ខណៈស្ថាប័ននីតិប្រតិបត្តិកំពុងតែផ្តល់នូវការវិវត្តថ្មីនៃការរកដំណោះស្រាយបញ្ហានយោបាយ ដែលផ្តើមចេញពីការជួបសន្ទនាគ្នាក្រៅផ្លូវការរវាងថ្នាក់ដឹកនាំគណបក្សជាប់ឆ្នោតទាំងពីរ ទោះបីនៅមានការបង្ហាញពីភាពខ្វែងគ្នាមួយចំនួនក្តី តែឆន្ទៈចង់រកដំណោះស្រាយពិតប្រាកដមួយបានចាប់ផ្តើមបើកទ្វារហើយ ៕
ចែករំលែកព័តមាននេះ