ខេត្ដពោធិ៍សាត់ ៖ បុរស២នាក់បានស្លាប់ភ្លាមៗដោយសារបត់ម៉ូតូចូលផ្ទះកៀកពីមុខរថយន្ដក្រុងដឹកអ្នកដំណើរមួយគ្រឿងដែលកំពុងពេញល្បឿនក៏បុកម៉ូតូជាប់ពីក្រោមអូសជាង១០០ម៉ែត្របែកផ្កាភ្លើងព្រាតធ្លាយស៊ីទែនសាំងឆាបឆេះសន្ធោសន្ធៅធ្វើឱ្យអ្នកដំណើរសម្រុកចេញក្នុងសភាពភ័យស្លេកមុខទាំងអស់គ្នា ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះបានកើតឡើងនៅលើកំណាត់ផ្លូវជាតិលេខ៥ ស្ថិតក្នុងភូមិស្វាយស ឃុំស្នាអន្សារ ស្រុកក្រគរ កាលពីវេលាម៉ោង៤និង២០នាទីរសៀលថ្ងៃទី១០ មេសា ។ សំណាងល្អអ្នកជិះក្នុងរថយន្ដក្រុងរួចផុតជីវិត ប៉ុន្ដែរថយន្ដនិងម៉ូតូឆេះហ្មត់ ។ លោកវរសេនីយ៍ត្រី ប៊ិន វណ្ណា អធិការនគរបាលស្រុកក្រគរឱ្យដឹងថា រថយន្ដក្រុងដឹកអ្នកដំណើរដែលឆេះខ្ទេចគ្មានសល់នេះជារបស់ក្រុមហ៊ុន KSO ។ ឯអ្នកជិះម៉ូតូ២នាក់ដែលស្លាប់ម្នាក់ឈ្មោះ កែ វុទ្ធី អាយុ ២៨ឆ្នាំ និងម្នាក់ទៀតឈ្មោះ ឆន ឡី អាយុ ២៧ឆ្នាំ រស់នៅភូមិ-ឃុំកើតហេតុជាមួយគ្នា ។
ទាក់ទិននឹងករណីគ្រោះថ្នាក់ចរាចរណ៍នេះលោកអធិការបានឱ្យដឹងថា នៅរសៀលនោះជនរងគ្រោះទាំង២នាក់បន្ទាប់ពីចាក់សាំងរួចក៏ជិះម៉ូតូឌុបគ្នាក្នុងទិសដៅពីកើតទៅលិច ឯរថយន្ដក្រុងបោះពួយយ៉ាងលឿនពីកើតទៅលិចដូចគ្នា ។ លុះពេលទៅដល់ចំណុចកើតហេតុ អ្នកជិះម៉ូតូបត់ឆ្វេងចូលផ្ទះកៀកពីមុខរថយន្ដដែលកំពុងពេញល្បឿនផងក៏បុកពេញទំហឹងបណ្ដាលឱ្យផ្លោងអ្នកជិះម៉ូតូទាំងពីរនាក់បោកទៅលើថ្នល់ស្លាប់ភ្លាមៗ ។ ចំណែកម៉ូតូជាប់ពីក្រោមរថយន្ដអូសនឹងផ្លូវជាតិចម្ងាយ១៦០ម៉ែត្រ ចេញផ្កាភ្លើងធ្លាយស៊ីទែនសាំងម៉ូតូឆាបឆេះសន្ធោសន្ធៅ ។ ខណៈនោះភ្ញៀវដែលជិះក្នុងរថយន្ដភ័យស្លន់ស្លោនាំគ្នាហក់ចេញពីរថយន្ដទាំងព្រលឹងចុងសក់ ដែលខ្លះជាមនុស្សចាស់ជរា និងខ្លះទៀតបីកូនតូច។ ប៉ុន្ដែទោះជាយ៉ាងណា អ្នកជិះក្នុងរថយន្ដបានរួចផុតជីវិតទាំងអស់គ្នា ពុំមានអ្នកណាម្នាក់ស្លាប់ដោយគ្រោះអគ្គិភ័យឆេះរថយន្ដក្រុងរបស់ក្រុមហ៊ុន KSO នេះទេ គ្រាន់តែរបស់របរមួយចំនួន មិនអាចយកចេញទាន់ ក្លាយជាចំណីព្រះអគ្គីតែប៉ុណ្ណោះ ។
លោក ប៊ិន វណ្ណា បានបញ្ជាក់ថា នៅកន្លែងរថយន្ដក្រុងឆេះនោះ ពេលយប់ថ្ងៃដដែលស្រាប់តែមានរថយន្ដដឹកស្រាបៀរមួយគ្រឿងទៀតក្រឡាប់នៅទីនោះដែរ ប៉ុន្ដែមិនមែនវាក់នឹងសពរថយន្ដក្រុងនោះទេ គឺចាំងភ្លើងហ្វារថយន្ដផ្សេងមកពីមុខ ។ ចំពោះករណីគ្រោះថ្នាក់ចរាចរណ៍នេះ នឹងត្រូវដោះស្រាយតាមច្បាប់ ។ នេះគឺជាគ្រោះថ្នាក់ចរាចរណ៍មួយដែលអ្នកបើកបរខ្វះការប្រុងប្រយ័ត្ន មិនគោរពច្បាប់ និងគ្មានការយោគយល់អធ្យាស្រ័យឱ្យគ្នាទៅវិញទៅមក ។ ពិសេសក្នុងឱកាសដើរលេងបុណ្យចូលឆ្នាំថ្មីប្រពៃណីជាតិយើងខាងមុខ គួរអ្នកបើកបរកុំធ្វេសប្រហែសហួសហេតុពេកពេលធ្វើដំណើរ ពោលគឺកុំបើកបរក្នុងពេលស្រវឹង ៕
ចែករំលែកព័តមាននេះ