ប្រធានាធិបតីរុស្ស៊ីលោកវ៉្លាឌីមៀរពូទីន កាលពីថ្ងៃទី១០ មេសា បានដាស់តឿនពួកអឺរ៉ុបឱ្យជួយធានាដល់ការសងបំណុលអ៊ុយក្រែនជាច្រើនពាន់លានដុល្លារ ឬក៏សុខចិត្តឱបដៃមើលការផ្គត់ផ្គង់ឧស្ម័នដល់ប្រទេសនេះរងការគំរាមកំហែង ។ បែបនេះបង្ហាញពីវិបត្តិរវាងលោកខាងកើត និងលោកខាងលិចដ៏អាក្រក់បំផុតមួយចាប់តាំងពីបញ្ចប់សង្គ្រាមត្រជាក់មក ។
ទន្ទឹមនឹងនេះដែរ ការប្រឈមមុខដាក់គ្នានៅតែខ្លាំងក្លារវាងពួកអ្នកសិ្នទ្ធរុស្ស៊ី និងពួកអ្នកគាំទ្ររដ្ឋាភិបាលក្រុងគៀវនាភាគខាងកើតអ៊ុយក្រែន ទោះបីជារដ្ឋអំណាចស្និទ្ធអឺរុ៉បនៃទីក្រុងគៀវប្រកាសពីការលើកលែងទោសមួយក្តី ។ ក្នុងសារលិខិតមួយច្បាប់ផ្ញើជូនមេដឹកនាំអឺរុ៉ប១៨រូប លោកពូទីន អះអាងថា ប្រទេសរបស់យើងបានជួយទ្រទ្រង់ដល់សេដ្ឋកិច្ចអ៊ុយក្រែន មានទឹកប្រាក់ដល់ទៅជាង៣៥ពាន់លានដុល្លារចាប់តាំងពី៤ឆ្នាំកន្លងមកនេះ ហើយលោកទាមទារឱ្យការជួយទ្រទ្រង់នោះចាប់ពីពេលនេះតទៅឈរលើលក្ខណៈស្មើភាពគ្នា ។
ពេលដែលក្រុងមូស្គូបង្កើនកាលពីសប្តាហ៍មុនដល់ទៅ៨០% នៃតម្លៃឧស្ម័នរបស់ខ្លួនលក់ឱ្យក្រុងគៀវ ដែលកំពុងគ្មានប្រាក់ លោកពូទីន បានព្រមានថា ក្នុងករណីមិនមានការបង់ថ្លៃឧស្ម័ននោះរ៉ូប៊ីណេឧស្ម័ននឹងត្រូវបិទដែលនេះជាស្រមោលនៃសង្គ្រាមឧស្ម័នដែលធ្លាប់កាត់បន្ថយការផ្តល់ឧស្ម័នរុស្ស៊ីដល់អឺរ៉ុបខាងលិចកាលពីឆ្នាំ២០០៦ និង២០០៩ ។ ការគំរាមនេះកាន់តែដាក់ទម្ងន់លើសហភាពអឺរុ៉បដែលនាំចូល១ភាគ៤ នៃសេចក្តីត្រូវការឧស្ម័នពីរុស្ស៊ី ហើយជិតពាក់កណ្តាលបង្ហូរកាត់អ៊ុយក្រែន ។
លោកពូទីន ទាមទារឱ្យមានការពិគ្រោះយោបល់គ្នាថ្នាក់រដ្ឋមន្ត្រីក្នុងពេលដ៏ឆាប់ដើម្បីចាត់វិធានការរួមធ្វើឱ្យមានស្ថេរភាពដល់សេដ្ឋកិច្ចរបស់អ៊ុយក្រែន និងដើម្បីធានាការផ្តល់ឧស្ម័ននិងការបង្ហូរឧស្ម័នកាត់ប្រទេសនេះទៅអឺរុ៉បខាងលិច។ ចំណែកធនាគារជាតិអ៊ុយក្រែនលាតត្រដាងកាលពីថ្ងៃទី១០ មេសាថា ប្រាក់ HRIVNA របស់ប្រទេសកំពុងធ្លាក់ថ្លៃក្នុងកម្រិតទាបបំផុតពុំធ្លាប់មាន បើប្រៀបទៅនឹងប្រាក់ដុល្លារ និងប្រាក់អឺរ៉ូ ។
ធនាគារកណ្តាលអ៊ុយក្រែនបានទម្លាក់អត្រាប្តូរប្រាក់ HRIVNA ជាផ្លូវការចំនួន៦% មក១២,៦ HRIVNA ទល់១ដុល្លារ និង១៧,៤ HRIVNA ទល់១អឺរ៉ូ បើប្រៀបធៀបទៅនឹងកាលពីថ្ងៃទី៩ មេសា ត្រឹម១៦,៣ HRIVNA ក្នុង១អឺរ៉ូ ៕
ចែករំលែកព័តមាននេះ