អង្គការសិទ្ធិមនុស្សស៊ីរីស្និទ្ធពួកឧទ្ទាម OSDH រាយការណ៍ថា យុទ្ធជនជាង៥០នាក់បានត្រូវស្លា.ប់កាលពីថ្ងៃទី១០ មេសា ក្នុងការប៉ះទង្គិចគ្នាថ្មីៗនៅស៊ីរីរវាងពួកជីហាដ និងពួកឧទ្ទាម ដែលកាលពីមុនពួកគេជាសម្ព័ន្ធមិត្តនឹងគ្នាក្នុងការតស៊ូប្រឆាំងរបបលោកបាចាអាល់អាសាដ ។
អង្គការសិទ្ធិមនុស្សស៊ីរីស្និទ្ធពួកឧទ្ទាម OSDH រាយការណ៍ថា យុទ្ធជនជាង៥០នាក់បានត្រូវស្លាប់កាលពីថ្ងៃទី១០ មេសា ក្នុងការប៉ះទង្គិចគ្នាថ្មីៗនៅស៊ីរីរវាងពួកជីហាដ និងពួកឧទ្ទាម ដែលកាលពីមុនពួកគេជាសម្ព័ន្ធមិត្តនឹងគ្នាក្នុងការតស៊ូប្រឆាំងរបបលោកបាចាអាល់អាសាដ ។
OSDH បញ្ជាក់ថា ការប្រយុទ្ធគ្នាទាំងនោះផ្ទុះឡើងជាមួយការវាយលុកនាវេលាព្រឹកព្រហាមរបស់ពួកជីហាដនៃក្រុមរដ្ឋអ៊ិស្លាមនៅអុីរ៉ាក់ និង LEVANT (EIIL) លើទីតាំងទាំងឡាយកាន់កាប់ដោយក្រុមរណសិរ្សអាល់ណូស្ត្រាមានទំនាក់ទំនងជាមួយអាល់កៃដា និងពួកសម្ព័ន្ធមិត្តនៅព្រំដែនស៊ីរី-អុីរ៉ាក់ ។
យោងតាម OSDH ដែលផ្អែកលើប្រភពព័ត៌មានពីពួកឧទ្ទាម និងប្រភពមន្ទីរពេទ្យក្នុងប្រទេសកំពុងមានសង្គ្រាមនេះថា ការប្រយុទ្ធគ្នាជាពិសេសនៅជុំវិញទីក្រុងប៊ូកាម៉ាល់ ដែលនៅទីនោះពួកជីហាដនៃក្រុម EIIL បានរុលទៅមុខសំដៅទៅបុ៉ស្តិ៍ព្រំដែនដើម្បីបុ៉នប៉ងចាប់ដៃជាមួយបងប្អូនរួមអាវុធពួកគេនៅអុីរ៉ាក់ ។
OSDH បញ្ជាក់ថា ពួក EIIL ដណ្តើមកាន់កាប់សង្កាត់ជាច្រើននៃទីក្រុងប៊ូកាម៉ាល់ពីក្រុមអាល់ណូស្ត្រា និងពួកឧទ្ទាមអ៊ិស្លាមនិយមឯដទៃៗទៀត ។ ក្រៅពីយុទ្ធជន៥១នាក់ស្លាប់ សាកសពរបស់យុទ្ធជន១០នាក់ទៀតប្រហែលជាត្រូវពិឃាតដោយពួក EIIL ត្រូវបានរកឃើញនៅខាងក្រៅក្រុងប៊ូកាម៉ាល់ ។ បើតាមនាយទាហានម្នាក់របស់កងទ័ពស៊ីរីសេរី ASL ដែលបង្កើតឡើងមួយផ្នែកធំដោយពួកទាហានស៊ីរីរត់ចោលជួរថា ក្រុមរបស់គេនៅតែត្រួតត្រាបុ៉ស្តិ៍ព្រំដែនជាប់ជាមួយអុីរ៉ាក់នៅឡើយ ។ នាយទាហានឧទ្ទាមរូបនេះបន្តថា ពួក EIIL បានវាយប្រហារបណ្តាទីតាំងរបស់យើងនៅក្រុងប៊ូកាម៉ាល់ ហើយការប៉ះទង្គិចគ្នានៅបន្ត។
ចំណែកវរសេនីយ៍ឯកម្នាក់នៃកងទ័ពអុីរ៉ាក់និយាយថា កងទ័ពអុីរ៉ាក់បានដាក់បារ៉ាស់ការពារពីបេតុងប្រវែងជាច្រើនរយម៉ែត្រ ព្រមទាំងដាក់បាវខ្សាច់តាមកន្លែងខ្លះចន្លោះពីកៃអុីមនៅអុីរ៉ាក់ និងក្រុងប៊ូកាម៉ាល់ ។ យើងខ្លាចពួក EIIL ដណ្តើមត្រួតត្រាបុ៉ស្តិ៍ព្រំដែននោះ ។
ស្ថិតក្នុងខេត្ត DEIR EZZOR ក្រុងប៊ូកាម៉ាល់មានប្រជាជន៧០.០០០នាក់កាលមុនជម្លោះ ។ ទីក្រុងនោះស្ថិតក្នុងកណ្តាប់ដៃពួកឧទ្ទាមចាប់តាំងពីដំណាច់ឆ្នាំ២០១២ ក្រោយការប៉ុនប៉ងវាយដណ្តើមយកវិញជាច្រើនលើករបស់កងទ័ពស៊ីរី ។ ត្រូវបណ្តេញចេញពីខេត្តសំបូរប្រេងកាត និងឧស្ម័ននេះកាលពីដើមខែកុម្ភៈ ២០១៤ ក្រុម EIIL បុ៉នប៉ងវាយដណ្តើមកាន់កាប់ទីនោះវិញ ។
ជម្លោះនៅស៊ីរីក្លាយទៅជាស្មុគស្មាញកាន់តែខ្លាំងជាមួយនឹងការប៉ះទង្គិចគ្នារវាងពួកឧទ្ទាម និងពួកជីហាដ ដែលភាគច្រើនមកពីបរទេស ។ ពីខែមករាមកខែកុម្ភៈ ការប្រយុទ្ធគ្នារវាងពួកជីហាដ និងពួកឧទ្ទាមស៊ីរីបណ្តាលឱ្យមនុស្សស្លាប់ជាច្រើនពាន់នាក់ ។
ទន្ទឹមនឹងនេះ ក្រុមរណសិរ្សអាល់ណូស្ត្រាតាមរយៈសេចក្តីប្រកាសមួយបានអះអាងពីការវាយប្រហារភេរវកម្ម២ ប្រើរថយន្តផ្ទុកគ្រឿងផ្ទុះដែលសម្លាប់មនុស្សយ៉ាងតិច២៥នាក់ កាលពីថ្ងៃទី៩ មេសាកន្លងមកនេះ ក្នុងសង្កាត់មួយនៃទីក្រុងហូមភាគកណ្តាលស៊ីរី ៕
ចែករំលែកព័តមាននេះ