រាជធានីភ្នំពេញ ៖ តារាចម្រៀងនៅផលិតកម្មM នាងតាក់ម៉ា បានងាកទៅចូលផលិតកម្មសាន់ដេ ដែលប្រជុំដោយតារាចម្រៀងវ័យក្មេងនិងមានឈ្មោះបោះសំឡេងវិញ ។ ចំពោះវត្តមានរបស់តារាចម្រៀងថ្មីតាក់ ម៉ា នាពេលនេះ អ្នកគ្រប់គ្រងទូទៅរបស់ផលិតកម្មសាន់ដេបញ្ជាក់ថា ផលិតកម្មរបស់លោកបានត្រៀមបទ ថ្មីៗនិងស្ទីល ប្លែកៗមួយចំនួនទៀត សម្រាប់នាងដើម្បីបំបែកភាពស្ងប់ស្ងាត់មួយរយៈរបស់នាង ។
វត្តមានរបស់តាក់ ម៉ា នៅសាន់ដេចាត់ទុកថា ជាតារាចម្រៀងទី៤ ហើយដែលចាកចេញពីផលិតកម្មM បន្ទាប់ពីតារាចម្រៀង៣ដួងទៀតគឺលោកឆាយ វីរៈយុទ្ធ អេនជី និងនីកូ ។ បើទោះបីជាវត្តមានក្នុងនាមជាតារាចម្រៀងចំណូលថ្មីក្នុងផលិតកម្មសាន់ដេ ដែលពោរពេញទៅដោយតារាចម្រៀង ល្បីៗ និងមានឥទ្ធិពលក៏ដោយ ប៉ុន្តែតាក់ម៉ាក់ បានការស្វាគមន៍ និងការលើកទឹកចិត្តពីម្ចាស់ផលិតកម្ម។
ថ្លែងប្រាប់កោះសន្តិភាពតាមទូរស័ព្ទ អ្នកចាត់ការទូទៅរបស់ផលិតកម្មសាន់ដេលោកឡាយ សុខចំរើន ឲ្យដឹងថា តារាចម្រៀងតាក់ ម៉ា ចូលផលិតកម្មរបស់លោកបានមួយរយៈហើយ ប៉ុន្តែក្រុមហ៊ុនមិនទាន់បញ្ចេញព័ត៌មានឲ្យដឹងដើម្បីទុកឲ្យទស្សនិកជនមានការភ្ញាក់ផ្អើល ។ បើទោះបីជាតាក់ម៉ា ជាតារាចម្រៀងចំណូលថ្មីរបស់ផលិតកម្មពិតមែន ប៉ុន្តែផលិតកម្មតែងតែលើកទឹកចិត្ត និងត្រៀមបទចម្រៀងឱ្យជាបន្តបន្ទាប់ដូចតារាចម្រៀងឯទៀតនៅក្នុងផលិតកម្មដែរ ។ ជាក់ស្តែងផលិតកម្មបានរៀបចំបទចម្រៀងថ្មីៗមួយចំនួនដែលជាបទកន្ទ្រឹមសម្រាប់តាក់ ម៉ា ដើម្បីចេញលក់នៅក្នុងឱកាសបុណ្យចូលឆ្នាំក្រុមហ៊ុននឹងត្រៀមរៀបចំបទ ថ្មីៗ ប្លែកៗតាមបែបយុវវ័យបន្ថែមទៀតសម្រាប់តារាចម្រៀងរូបនេះ។
លោកឡាយ សុខចំរើន បញ្ជាក់ថា វត្តមានថ្មីរបស់តាក់ម៉ា នាពេលនេះផលិតកម្មរបស់លោកបានរៀបចំស្ទីល ប្លែកៗខុសពីមុនដែលតារាចម្រៀងរូបនេះធ្លាប់នៅផលិតកម្មចាស់។ផលិតកម្មលោកនឹងខិតខំធ្វើយ៉ាងណាលើកស្ទួយគ្រប់បណ្តាតារាចម្រៀងទាំងអស់ដែលមានវត្តមានក្នុងផលិតកម្មរបស់លោកឲ្យបាន ស្មើៗគ្នា ។
វត្តមានរបស់តាក់ ម៉ា នៅក្នុងផលិតកម្មសាន់ដេនាពេលនេះលោកឡាយ សុខចំរើន សង្ឃឹមថា រឹតតែធ្វើឲ្យទស្សនិកជនមានការគាំទ្រផលិតកម្មបន្ថែមទៀត ខណៈពេលតារាចម្រៀងរូបនេះមិនមែនជាតារាចម្រៀងថ្មី ហើយធ្លាប់មានឈ្មោះបោះសំឡេងគួរសម ។តារាចម្រៀងតាក់ម៉ាបានចូលប្រឡូកក្នុងពិភពសិល្បៈចម្រៀងនៅឆ្នាំ២០០៦ តាមរយៈផលិតM ។
ក្រៅពីអាជីពសិល្បៈ តារាចម្រៀងរូបនេះមានជំនាញនិយាយភាសាអង់គ្លេសបានយ៉ាងល្អ ហើយនាងក៏ជាបុគ្គលិកបម្រើការងារនៅក្រុមហ៊ុនឯកជនមួយដែរ ៕
ចែករំលែកព័តមាននេះ