រាជធានីភ្នំពេញ ៖ ក្រុមតារាចម្រៀងស្រីកូរ៉េ៤ដួង បាននិយាយថា ពួកនាងមានក្ដីរំភើបយ៉ាងខ្លាំងនៅពេលបានមកសម្ដែងរយៈពេល២ថ្ងៃនៅក្នុងកម្មវិធីប្រគំតន្ដ្រីនៅសាលមហោស្រពកោះពេជ្រ នៃរាជធានីភ្នំពេញ កាលពី ពេលថ្មីៗនេះ ។ ព្រឹត្ដិការណ៍នៃការប្រគំតន្ដ្រីនេះ បានលក់សំបុត្រដាច់អស់ និងទាក់ទាញអ្នកចូលរួមទស្សនារហូតដល់ទៅ៣.០០០នាក់ក្នុងមួយយប់ ដែលជាការរៀបចំឡើងដោយក្រុមហ៊ុន Beeline ជាក្រុមហ៊ុនបណ្ដាញទូរស័ព្ទមានគុណភាពខ្ពស់ និងឈានមុខគេនៅក្នុងប្រទេសកម្ពុជា ។
តារាចម្រៀងកូរ៉េ Miss A បានថ្លែងអំណរគុណចំពោះការគាំទ្រ និងក្ដីស្រឡាញ់ពីក្រុមអ្នកគាំទ្រនៅកម្ពុជា កាលពីចុងសប្ដាហ៍កន្លងទៅ ដែលក្រុមតារាចម្រៀងទាំងនេះបានបង្ហាញខ្លួននៅរាជធានីភ្នំពេញ ជាលើកដំបូង ។ កញ្ញា Min ជាសមាជិកក្រុមម្នាក់និយាយថា «យើងពិតជាមានការចាប់អារម្មណ៍លាយឡំនឹងក្ដីរំភើបយ៉ាងខ្លាំងនៅពេលឃើញអ្នកគាំទ្រស្រែកអបអរ និងស្រឡាញ់ចូលចិត្ដច្រើន ។ ពីមុន នាងខ្ញុំមិនបានដឹងមុនទេថា មានអ្នកគាំទ្រដល់ថ្នាក់ហ្នឹងសោះ ហើយមានអ្នកជិះម៉ូតូតាមពីក្រោយយើងខ្ញុំ ហើយរង់ចាំនៅមុខសណ្ឋាគាររហូតដល់ទៅ១០ម៉ោង» ។
ក្រុមតារាចម្រៀងស្រីកូរ៉េទាំងអស់បានកោតសរសើរពីអាហារ និងវប្បធម៌កម្ពុជា ។ ពួកនាងបានធ្វើដំណើរទៅទស្សនាសារមន្ទីរជាតិ និងចូលបួងសួងសុំសេចក្ដីសុខនៅវត្ដឧណ្ណាលោមផងដែរ ។
កញ្ញា Min នៅមិនអាចបំភ្លេចបានឡើយ ចំពោះអនុស្សាវរីយ៍គឺអ្នកគាំទ្រ ។ នាងបានបង្ហាញក្ដីស្រឡាញ់ដល់ពួកគេ ហើយនាងថា ពួកគេក៏ស្រឡាញ់ពួកនាងដែរ ។ នេះគឺជាការ ទាក់ទងគ្នាមួយដ៏ល្អ មិនអាចកាត់ថ្លៃបាន ។ ពួកនាងសង្ឃឹមថានឹងបានវិលមកកម្ពុជាម្ដងទៀតនៅលើកក្រោយ និងទទួល បាន ការគាំទ្រពីយុវវ័យសាជាថ្មីទៀត ។
ក្រុមតារាចម្រៀងស្រីកូរ៉េទាំង៤នាក់ កាន់តែមិនភ្លេចនៅពេលដែលឡើងសម្ដែងនៅលើឆាកតន្ដ្រីត្រូវអ្នកគាំទ្ររាប់ពាន់នាក់នាំគ្នាស្រែកថា «Miss A! Miss A! » មិនដាច់ពីមាត់ ។ ក្រុម Miss A មានគ្នា៤នាក់ Jai ,Min ,Fei និង Suzy បានសម្ដែងបទចម្រៀង ល្បីៗរបស់ខ្លួនដូចជា Hush Breath និង Goodbye baby ។ នៅថ្ងៃបន្ទាប់បានសម្ដែងបទ Bad Girl ,Good Girl ,Hush និង Breath ។
តំណាងក្រុមហ៊ុន Beeline និយាយថា ក្រុម Miss A បានធ្វើឱ្យមានការចាប់អារម្មណ៍ខ្លាំងពីទស្សនិកជនជាមួយនឹងការប្រគំតន្ដ្រីរួមគ្នាមានគុណភាពខ្ពស់ស័ក្ដិសមនឹងការរំលឹកខួប៥ឆ្នាំរបស់ Beeline ។
Beeline បានចាប់ផ្ដើមដំណើរការអាជីវកម្មនៅកម្ពុជានៅខែឧសភា ឆ្នាំ២០០៩ ហើយតាំងពីពេលនោះមកបានក្លាយជាក្រុមហ៊ុនផ្ដល់សេវាកម្មឈានមុខគេ និងមានលំដាប់ថ្នាក់ខ្ពស់ក្នុងចំណោមក្រុមហ៊ុនទូរស័ព្ទជាច្រើននៅកម្ពុជា ហើយជាក្រុមហ៊ុនគ្រប់គ្រងដោយជនជាតិខ្មែរ១០០ភាគរយ ៕
ចែករំលែកព័តមាននេះ