អត្រាសម្រាលកូនកើន៣០ភាគរយក្នុងរយៈពេល១០ថ្ងៃដើមឆ្នាំ
ព័ត៌មានពីមន្ទីរពេទ្យគាំពារមាតា និងទារក នៅក្រុងណានជីង ខេត្តជាងស៊ូ ឱ្យដឹងថា ក្នុងរយៈពេល១០ថ្ងៃ ចាប់ពីថ្ងៃទីមួយចូលឆ្នាំមមី មានទារក ទារិកា រហូតដល់៥០០នាក់ បានប្រសូតចេញពីផ្ទៃមាតាក្នុងមន្ទីរពេទ្យនេះ ។ បើប្រៀបធៀបទៅរយៈពេលដូចគ្នាកាលពីឆ្នាំទៅ (ឆ្នាំម្សាញ់) គឺកើនឡើង៣០ភាគរយ ។ ថ្ងៃធម្មតា មុនៗក្នុងមួយថ្ងៃមានទារក-ទារិកា កើតជាមធ្យម៦០នាក់ លុះគ្រាន់តែចូលឆ្នាំមមីភ្លាម ចំនួននេះស្ទុះឡើងច្បាស់ក្រឡែត កើនរហូតដល់៨៧នាក់ ។ ជនជាតិចិនជាច្រើនជឿថា ទារក-ទារិកា ដែលកើតឆ្នាំមមីនេះ (រាប់ចាប់ពីថ្ងៃទី៣១ មករា ឆ្នាំ២០១៤ទៅ) ជាមនុស្សមានសំណាងល្អ ។
នៅមន្ទីរពេទ្យគាំពារមាតា និងទារក កា យីសុិន ខេត្តហាក់ឡុងជាង ទារក-ទារិកា ១៣៣នាក់ បានកើតចេញពីផ្ទៃមាតាក្នុងរយៈពេល៦ថ្ងៃ រាប់ចាប់ពីថ្ងៃចូលឆ្នាំមមី ។ បើប្រៀបធៀបទៅឆ្នាំមុន (ឆ្នាំម្សាញ់) រយៈពេលដូចគ្នានេះ មានតែ៩២នាក់ប៉ុណ្ណោះ នេះបើតាមការលើកឡើងរបស់កាសែត Life Daily ក្នុងស្រុក។ ចំណែកវែបសាយ Jiaodong.net នៅខេត្តសានទុង បានឱ្យដឹងថា មន្ទីរសម្ភពទាំងអស់ក្នុងខេត្តសានទុង កត់ត្រាឃើញមានការសម្រាលកូនកើនឡើង៣០ភាគរយ គិតចាប់ពីថ្ងៃចូលឆ្នាំមមី ភ្លាមដែរ ។
ខណៈការសម្រាលកូនមានការកើនឡើងបែបនេះ ការជ្រើសយករបៀបសម្រាលក៏មានការប្រែប្រួល ។ ពីមុនការសម្រាលដោយវះកាត់មានរហូតដល់៤០ភាគរយ ប៉ុន្តែចាប់ពីចូលឆ្នាំមមីរហូតដល់សព្វថ្ងៃ ការជ្រើសរើសយករបៀបសម្រាលដោយវះកាត់ នៅសល់ត្រឹមតែ៣០ភាគរយប៉ុណ្ណោះ ។
នាងតាវ ហ្វេ ដែលទើបសម្រាលកូន៣ថ្ងៃ និយាយថា មូលហេតុនាងជ្រើសយកការសម្រាលកូនតាមធម្មតា ព្រោះឮគ្រូពេទ្យប្រាប់ថា បើសម្រាលកូនដោយវះកាត់ ត្រូវរង់ចាំយ៉ាងតិច២ឆ្នាំ ទើបអាចមានផ្ទៃពោះទៀតបាន ព្រោះត្រូវទុកពេលឱ្យស្បូនសម្រាកបានយូរបន្តិច ។
តាមការស្រាវជ្រាវទូទាំងប្រទេសដែលអនុវត្តដោយកាសែតយុវជនចិន កាលពីខែវិច្ឆិកា ឆ្នាំ២០១៣ ប្រជាជន៦២,៥ភាគរយ ដែលត្រូវសួរ បាននិយាយថា ចង់បានកូន២នាក់ ប្រសិនបើច្បាប់អនុញ្ញាត ខណៈ៥,៩ភាគរយ និយាយថា ចង់បាន៣នាក់ ឬច្រើនជាងនេះ ។
ប្រទេសចិនបានបន្ធូរបន្ថយច្បាប់ផែនការគ្រួសារក្នុងខែវិច្ឆិកា ឆ្នាំ២០១៣ កន្លងទៅ អនុញ្ញាតឱ្យពីរនាក់ប្តីប្រពន្ធ បើមានម្នាក់ណាជាកូនទោល ទោះប្តីក៏ដោយ ប្រពន្ធក៏ដោយ អាចមានកូនទី២បាន ។ នេះជាមូលហេតុនាំឱ្យអត្រាកូនកើតច្រើន ។
ដោយដឹងមុនថា មុខជាមានការសម្រាលកូនច្រើនក្នុងឆ្នាំមមី ម្យ៉ាងមកពីច្បាប់មានការបន្ធូរបន្ថយ និងម្យ៉ាងទៀតមកពីផ្នត់គំនិតពេញចិត្តឆ្នាំមមីផង មន្ទីរពេទ្យគាំពារមាតា និងទារក នៅក្រុងណានជីង បានសាងសង់ថែម «មជ្ឈមណ្ឌលសុខាភិបាលប្រសូតកូនទីពីរ» នៅចុងឆ្នាំ២០១៣។ លោកវេជ្ជបណ្ឌិត ហួង ចានយីង និយាយថា សំណួរដែលបងប្អូន ស្រីៗជាច្រើនតែងសួរ ពិសេស ស្រីៗមានអាយុចាប់ពី៣៥ឆ្នាំឡើងទៅ គឺតើពួកនាងមានផ្ទៃពោះទៀតបានទេ ខណៈពោះរបស់ខ្លួនទំនេរយូរឆ្នាំណាស់មក ហើយ ?
ពេលវេលាដែលមន្ទីរសម្ភពណែនបំផុត
តាមទ្រឹស្តីធាតុទាំង៥ ក្នុងក្បួនហោរាចិន ឆ្នាំមមី ត្រូវចំធាតុមាស ដូច្នេះឆ្នាំនេះគេហៅថា សេះមាស ។ ក្បួនហោរាចិនទាយថា អ្នកកើតឆ្នាំមមី ចិត្តទូលាយ រហ័សរហួន ចូលចិត្តតុបតែងខ្លួនទាន់សម័យ ពូកែឆ្លើយឆ្លង ពូកែខាងការងារការបរទេស កម្លាំងពិនិត្យពិច័យល្អ ខួរក្បាលរហ័សរហួន មានបញ្ញាល្អ ចូលចិត្តដើរហើរសេរី មិនចូលចិត្តត្រូវបង្ខំឱ្យធ្វើអ្វីមួយ ចូលចិត្តធ្វើការងារតាមចំណង់របស់ខ្លួន ឧស្សាហ៍ផ្លាស់ប្តូរ ឆាប់ទាក់ចិត្ត តែក៏ឆាប់ធុញ ចិត្តក្តៅ ឆាប់ខឹង តែក៏ឆាប់បាត់ទៅវិញ ចរិតសាវាមួយ ឆាបៗ ឆាប់ធុញទ្រាន់អ្វី ដដែលៗ មាននិន្នាការចូលចិត្តធ្វើដំណើរទៅឆ្ងាយ តែមិនចូលចិត្តសំចតយូរនៅកន្លែងណាមួយ ។ ពណ៌ដែលអ្នកកើតឆ្នាំមមី ចូលចិត្តជាងគេគឺ ពណ៌លឿង និងពណ៌ទឹកក្រូច ។
ជនជាតិចិនមួយចំនួនជឿតាមគ្រូហុងស៊ុយថា ខែល្អសម្រាប់ការសម្រាលកូន គឺខែ៣,៦,៧,៨,៩,១២ តាមប្រតិទិនចន្ទគតិចិន ហើយខែដែលកូនកើតមកមានវាសនាល្អច្រើន គឺខែ៣,៦,៩,១២ តាមប្រតិទិនចន្ទគតិ ។ អាស្រ័យហេតុនេះ គេយល់ថា បណ្តាខែទាំងនោះជាខែមានការសម្រាលកូនច្រើនជាងគេនៅប្រទេសចិន ព្រោះ អ្នកណាៗក៏ចង់ឱ្យការសម្រាលកូនរបស់ខ្លួនចំខែទាំងនោះ ៕
ចែករំលែកព័តមាននេះ