រាជធានីភ្នំពេញ ៖ តារាចម្រៀងស្រីល្បីឈ្មោះ៣ដួង គឺកញ្ញាឱក សុគន្ធកញ្ញា កញ្ញាសួស វីហ្សា និងកញ្ញាផន ស្រីខួច លោកអ្នកប្រាកដជាស្គាល់ច្បាស់ ប៉ុន្តែប្រហែលជាមិនដឹងទេថា ពួកនាងមានប្រភពមកពីណា ។ តារាស្រីទាំង៣ដួងនេះ មានប្រភពដើមជាអ្នកសិល្បៈបុរាណ និងចេញពីសាលាតែមួយ គឺសាលាវិចិត្រសិល្បៈ ។
ខណៈបុណ្យចូលឆ្នាំថ្មីប្រពៃណីជាតិ ជិតឈានចូលមកដល់នេះ កោះសន្តិភាព សូមលើកពីគុណសម្បត្តិរបស់កញ្ញាឱក សុគន្ធកញ្ញា កញ្ញាសួស វីហ្សា និងកញ្ញាផន ស្រីខួច មកបង្ហាញលោកអ្នកនាង ។
កញ្ញាឱក សុគន្ធកញ្ញា អតីតជាសិស្សសាលាវិចិត្រសិល្បៈផ្នែករបាំបុរាណ ។ នាងបានហាត់រៀននៅទីនោះច្រើនឆ្នាំ ។ ស្រីតូចច្រឡឹងរូបនេះពីដំបូង ច្រៀងឱ្យផលិតកម្មរស្មីស្ទឹងសង្កែ ។ ទោះជានាងហាត់រៀនរបាំបុរាណមែន តែនៅសាលាវិចិត្រសិល្បៈ នាងក៏ទទួលបានការបណ្តុះបណ្តាលផ្នែកសំឡេងច្រៀងបទបុរាណ ប្រពៃណី និងបែបចម្រៀងសម័យ ។ ការហាត់ពត់សំឡេងច្រៀងនេះ នាងបានទទួលពីលោកគ្រូ អ្នកគ្រូនៅសាលាវិចិត្រសិល្បៈមិនតិចនាក់ទេ ។ ដូច្នេះហើយទើបសុគន្ធកញ្ញា មានបច្ចេកទេសប្រើប្រាស់សំឡេង ពិសេសការលើកដាក់ក្នុងបទ នីមួយៗបានល្អ ស្ទើរគ្រប់បទ ។
យុវវ័យ និងអ្នកគាំទ្រ ឱក សុគន្ធកញ្ញា ចាត់ទុកថា នាងជាតារាចម្រៀងមានទេពកោសល្យល្អ ។ ដោយសារតែមានវិធីប្រើសំឡេងចេញពីសាលាវិចិត្រសិល្បៈ ទើបសុគន្ធកញ្ញា ច្រៀងពីរោះ និងទទួលបានការគាំទ្រច្រើន ។ ឱក សុគន្ធកញ្ញា ច្រៀងបទសម័យមុនក៏ល្បីមិនចាញ់បទថ្មីដែរ ជាក់ស្តែងបទ «ឆ្នាំអូន៣១» «ក្រមុំទាំងបី» និងបទ «ផ្ការីកលើមេឃ» ជាដើម ។
ចំពោះកញ្ញាសួស វីហ្សា មានប្រវត្តិសិក្សានៅសាលាវិចិត្រសិល្បៈដែរតាំងពីនៅតូចម៉្លេះ ។ វីហ្សា ទទួលបានជំនាញផ្នែករបាំ ល្ខោនបាសាក់ និងយីកេ ។ សួស វីហ្សា មានឈ្មោះដើម សួស ស្រីថុល ធ្លាប់ធ្វើជាអ្នកសម្តែងឈុតរឿង ខ្លីៗប្រចាំស្ថានីយទូរទស្សន៍សុីធីអិន ក្នុងកម្មវិធី «មន្តស្នេហ៍សំនៀង» អស់រយៈពេលជាច្រើនឆ្នាំ ព្រោះនាងជាសមាជិកក្រុមសិល្បៈមន្ទីរវប្បធម៌ និងវិចិត្រសិល្បៈរាជធានីភ្នំពេញ ។ ការសម្តែងរបស់វីហ្សា បានតំណែងតួឯកញឹកញាប់ ។
ទន្ទឹមអាជីពជាអ្នកសិល្បៈបុរាណ វីហ្សា បានចូលរួមប្រឡងចម្រៀង និងជាប់ចំណាត់ថ្នាក់លេខ១ ក្នុងកម្មវិធីរ៉ុកស្តារ ។ តាំងពីពេលនោះមក វីហ្សា ក្លាយជាតារាចម្រៀងផលិតកម្មរ៉ុក និងចុងក្រោយនេះអណ្តែតទៅដល់ផលិតកម្មហង្សមាស ។ មានបទចម្រៀងជាច្រើនដែលធ្វើឱ្យសួស វីហ្សា ល្បីឈ្មោះ ។ សំឡេងវីហ្សា ធ្ងន់ និងស្រែកបានខ្ពស់ល្អ ។ វីហ្សា ឆ្នាំនេះឡើងកូដខ្លាំងណាស់ ពិសេសនាងបានបញ្ចេញក្បាច់រាំយ៉ាងរស់រវើកទាក់ទាញអារម្មណ៍មហាជន ។
ដោយឡែកកញ្ញាផន ស្រីខួច អតីតជាសិស្សសាលាវិចិត្រសិល្បៈម្នាក់ដែរ ។ ស្រីខួច មានទេពកោសល្យច្រៀងបទមនោសញ្ចេតនាបានយ៉ាងពីរោះរណ្តំ ។ បើបទប្រពៃណីវិញ ស្រីខួច ក៏ច្រៀងពីរោះដែរ ។ ផន ស្រីខួច រៀននៅសាលាវិចិត្រសិល្បៈផ្នែកចម្រៀងបុរាណ ។ មានបទចម្រៀងនៅផលិតកម្មហង្សមាសបែបមនោសញ្ចេតនា និងបែបញាក់កន្ត្រាក់អារម្មណ៍ជាច្រើនបទ ដែលផន ស្រីខួច ទទួលបានការគាំទ្រច្រើនគួរសម ៕
ចែករំលែកព័តមាននេះ