អ្នកបោះឆ្នោតឥណ្ឌាជាច្រើនរយលាននាក់បានទៅបោះឆ្នោតកាលពីថ្ងៃ១០ មេសា ក្នុងក្របខណ្ឌនៃការបោះឆ្នោតសភា ដែលនេះជាដំណាក់កាលសំខាន់ ព្រោះការបោះឆ្នោតនាថ្ងៃនោះប្រព្រឹត្តទៅជាពិសេសនៅទីក្រុងញូវដែល្លី និងនៅរដ្ឋធំជាងគេរបស់ប្រទេស គឺរដ្ឋអ៊ុតតាប្រាដេស ។នេះជាការបោះឆ្នោតប្រជែងគ្នារវាងគណបក្សកុងក្រេសដែលកាន់អំណាច និងគណបក្ស BHARATIYA JANATA (BJP) ជាគណបក្សប្រឆាំង ។
បន្ទាប់ពីការបោះឆ្នោតដំបូងនៅតំបន់ភាគឦសាន ពលរដ្ឋឥណ្ឌាទៅបោះឆ្នោតតាមបណ្តាមណ្ឌលបោះឆ្នោតនៅក្រុងញូវដែល្លី និងក្នុងរដ្ឋហារីយ៉ាណា កឺរ៉ាឡា អ៊ុតតាប្រាដេស ប៊ីហារ អូរីសា និងមហារ៉ាស្ត្រា ដើម្បីជ្រើសរើសតំណាងពួកគេ៩១រូបក្នុងចំណោមសមាជិកសភាសរុបទាំង៥៤៣រូប ។
គណបក្ស BJP តាមរយៈការស្ទាបស្ទង់មតិនានាថា អាចឈ្នះលើគណបក្សកុងក្រេសនៅញូវដែល្លី រដ្ឋហាយ៉ាណា ភាគខាងលិចរដ្ឋអ៊ុតតាប្រាដេស ភាគខាងត្បូងប៊ីហារ និងនៅភាគខាងកើតរដ្ឋមហារ៉ាស្ត្រា ហើយអាចមានការប្រជែងគ្នាតឹងតែងបំផុតក្នុងមណ្ឌលបោះឆ្នោតសំខាន់ទាំងឡាយ ។ ការបោះឆ្នោតទូទៅនៅឥណ្ឌា ចាប់ផ្តើមពីថ្ងៃទី៧ មេសាមក ហើយបន្តធ្វើរយៈពេល១ខែជា៩ដំណាក់កាល៕
ចែករំលែកព័តមាននេះ