រាជធានីភ្នំពេញ ៖ នៅទីបំផុតកីឡាករវ័យក្មេងជើងខ្លាំង ផល សោភ័ណ្ឌ មកពីក្លិបតាឡីដំរីមានឫទ្ធិ បានត្រឡប់មកកាន់សង្វៀនប្រដាល់វិញហើយ បន្ទាប់ពីដកខ្លួនអស់ជាច្រើនខែទៅធ្វើជាអ្នកបើករថយន្ត និងអ្នកការពារឱ្យអ្នកជំនួញម្នាក់។ អ្វីដែលសំខាន់ការបង្ហាញខ្លួនរបស់គេ នាថ្ងៃសុក្រ ទី១១ មេសានេះ នឹងប៉ះដៃគូចាស់ នន់ ជំនិត មកពីក្លិប CMAC នៅសង្វៀនបាយ័នស្ទឹងមានជ័យ ។
រាជធានីភ្នំពេញ ៖ នៅទីបំផុតកីឡាករវ័យក្មេងជើងខ្លាំង ផល សោភ័ណ្ឌ មកពីក្លិបតាឡីដំរីមានឫទ្ធិ បានត្រឡប់មកកាន់សង្វៀនប្រដាល់វិញហើយ បន្ទាប់ពីដកខ្លួនអស់ជាច្រើនខែទៅធ្វើជាអ្នកបើករថយន្ត និងអ្នកការពារឱ្យអ្នកជំនួញម្នាក់។ អ្វីដែលសំខាន់ការបង្ហាញខ្លួនរបស់គេ នាថ្ងៃសុក្រ ទី១១ មេសានេះ នឹងប៉ះដៃគូចាស់ នន់ ជំនិត មកពីក្លិប CMAC នៅសង្វៀនបាយ័នស្ទឹងមានជ័យ ។
កន្លងមកកីឡាករផល សោភ័ណ្ឌ ធ្លាប់បំបាក់ជើងចាស់ នន់ ជំនិត រួចម្តងហើយកាលពីថ្ងៃទី១១ វិច្ឆិកា ឆ្នាំ២០១២ ក្នុងវគ្គប្រកួតជម្រុះដណ្តើមខ្សែក្រវាត់ស្រាបៀរកម្ពុជាក្នុងប្រភេទទម្ងន់៦៣,៥គីឡូក្រាម ។ ដ្បិតថាជ័យជម្នះនោះ គឺជាការឈ្នះពិន្ទុ បុ៉ន្តែអ្នកណាក៏ឃើញដែរថា គេបានឈ្នះដាច់ដោយក្នុងទឹកទី២ ផល សោភ័ណ្ឌ បានបំបុក នន់ ជំនិត ដោយកែងនិងម៉ាត់ធ្វើឱ្យ នន់ ជំនិត ត្រូវរាប់៨ ដោយនឹកស្មានមិនដល់ទៀតផង ។ កាលពីជាង១ឆ្នាំមុន ផល សោភ័ណ្ឌ ត្រូវគេស្គាល់ថា ជាកីឡាករជើងខ្លាំង និងមានសមត្ថភាពខ្ពស់ណាស់ ដោយក្រោយពីវាយបំបាក់កីឡាករវង្ស ណយ ដណ្តើមបានខ្សែក្រវាត់ស្រាបៀរកម្ពុជា ហើយគេក៏បានទាំងធ្វើឱ្យ វង្ស ណយ បោះបង់ជំហរសងសឹក ព្រោះតែភាពស្ទុះឡើងរបស់គេនាពេលនោះផងដែរ ។ យ៉ាងណាក៏ដោយ ផល សោភ័ណ្ឌ បានដកខ្លួនពីសង្វៀនប្រដាល់អស់មួយរយៈធំទៅធ្វើជាអ្នកបើករថយន្ត និងជាអ្នកការពារឱ្យអ្នកជំនួញម្នាក់ ទើបគេមិនដឹងថា ឱកាសឡើងរេញដែលនឹងធ្វើឡើងនៅល្ងាចថ្ងៃសុក្រនេះ តើគេនឹងនៅតែខ្លាំង ឬចុះខ្សោយកម្លាំងជាងមុន ។
មួយរយៈមុន ផល សោភ័ណ្ឌ ត្រូវគេដឹងថាបាត់មុខស្ទើរទាំងស្រុងពីការហ្វឹកហាត់ និងថែបំប៉នសុខភាព ។ ប្រភពពីក្រុមគ្រូបង្វឹកបានអះអាងថា ចាប់តាំងពីបានការងារថ្មីធ្វើ ផល សោភ័ណ្ឌ មានពេលតិចណាស់ជាមួយនឹងការងារហ្វឹកហាត់ ហើយបើទោះជាយូរៗម្តងគេបានបង្ហាញមុខក្នុងក្លិប ក៏ភាគច្រើនទៅលេង និងបានហ្វឹកហាត់តិចតួចបុ៉ណ្ណោះ ។ ដ្បិតតែបុ៉ន្មានថ្ងៃមុនគេស្ទុះស្ទាខ្លាំងជាមួយនឹងការឡើេងរេញជាថ្មី ក៏សភាពនៃការប្រឹងប្រែងនោះហាក់នៅទាបឆ្ងាយណាស់ បើធៀបនឹងអំឡុងពេលមិនទាន់ទៅធ្វើជាអ្នកបើករថយន្តឱ្យគេ ។ ផល សោភ័ណ្ឌ ខ្លួនឯងក៏សារភាពដែរថា ការមមាញឹកនឹងការងារជាប់លាប់មិនសូវអំណោយផលឱ្យលោកបានចូលក្លិបហ្វឹកហាត់ និងថែបំប៉នកម្លាំងស៊ុហ្វបុ៉ន្មានទេ ។ បុ៉ន្តែមកពីការស្រឡាញ់ ទើបទទួលឡើងរេញភ្លាមៗដោយគ្រាន់តែបានទំនេរបន្តិចបន្តួចពីការងារស៊ីប្រាក់ខែ ។ ទោះយ៉ាងណា លោកក៏នៅតែមានការរំពឹងថា អាចយកឈ្នះកីឡាករនន់ ជំនិត ដោយមិនលំបាកនោះដែរ ដោយសារតែរយៈពេលចុងក្រោយ នន់ ជំនិត ក៏ចុះខ្សោយខ្លាំង ហើយមមាញឹកនឹងការងាររកប្រាក់ខាងក្រៅដូចគ្នា ដែលមិនមានពេលថែបំប៉នសុខភាព និងហ្វឹកហាត់មិនខុសពីខ្លួនគេបុ៉ន្មាន ។
ផល សោភ័ណ្ឌ មានចំណុចពិសេសមួយ គឺខ្លាំងកណ្តាប់ដៃ រហ័ស លឿន ហើយចេះផ្លាស់ទីបានរហ័សដើម្បីគេចចេញពីការវាយបក ។ ក្នុងនោះសូម្បីតែកែងរបស់គេក៏មុតស្រួច ពិបាកឱ្យដៃគូគេចផុតផងដែរគ្រប់ពេលវាយចេញ ។ អុីចឹងហើយទើប ផល សោភ័ណ្ឌ នៅតែជាប់ឈ្មោះជាកីឡាករជម្រើសជាតិផ្នែកប្រដាល់សាកលរហូតមកទល់ពេលនេះ ។ ចំណែក នន់ ជំនិត វិញ គេមានចំណុចខ្លាំងមួយ គឺនៅមានផ្លែដៃល្អ បុ៉ន្តែឆាប់ហត់បន្តិច ។ ទោះបីយ៉ាងណា ម្នាក់ៗកំពុងចាំមើលថា តើការឡើងរេញរបស់ ផល សោភ័ណ្ឌ លើកនេះនៅតែបន្តឈ្នះ នន់ ជំនិត ដូចមុនឬយ៉ាងណា ក្នុងពេលដែល ផល សោភ័ណ្ឌ ហាក់ឃ្លាតឆ្ងាយមួយរយៈធំផុតពីផ្លូវប្រដាល់មិនដូចពេលមុនបែបនេះនោះ ?
ការប្រកួតរបស់ ផល សោភ័ណ្ឌ កំពុងតែមានការចាប់អារម្មណ៍ខ្លាំង ហើយបើសិននិយាយពីសន្ទុះចង់ដឹង ក៏ស្ទើរតែប្រហាក់ប្រហែលនឹងព្រឹត្តិការណ៍ប្រដាល់អន្តរជាតិ ដែលទូរទស្សន៍បាយ័ននឹងរៀបចំធ្វើឡើងនៅថ្ងៃស្អែកនោះផងដែរ ។ នេះបើយោងតាមការជជែកពិភាក្សាដែលគេបានឮក្នុងចង្កោមអ្នកស្នេហាកីឡាប្រដាល់ ដែលភាគច្រើនគឺអ្នករត់ម៉ូតូឌុប អ្នកភ្នាល់ និងអ្នកបើកវេទិកាតុមូលនៅតាមរោងកាហ្វេ ៕
ចែករំលែកព័តមាននេះ