រាជធានីភ្នំពេញ ៖ រហូតមកទល់នឹងពេលនេះ លទ្ធផលនៃការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរលីអូក្នុងប្រភេទទម្ងន់៦០គីឡូក្រាម បានបង្ហាញឱ្យឃើញច្បាស់ជាបណ្តើរៗហើយពីអ្នកដែលត្រូវជ្រុះចេញ និងអ្នកដែលត្រូវឡើងទៅប្រកួតបន្តនៅវគ្គពាក់កណ្តាលផ្តាច់ព្រ័ត្រ ។
នៅលើសង្វៀន CTN នារសៀលថ្ងៃសៅរ៍ ទី១២ មេសាខាងមុខនេះ ឆាយ មាស មកពីក្លិបសំរោងកោងកីឡាខេត្តបាត់ដំបង ត្រូវជួបជាមួយ នឿន សាវឌី មកពីក្លិបអេភូថងកីឡា ចំណែក សុខ សុវណ្ណ មកពីក្លិបកងពលតូចលេខ៣១ ជួបជាមួយ ផាន់ គ្រាន់ មកពីក្លិបព្រះខ័នរាជនៃកងរាជអាវុធហត្ថខេត្តលើផ្ទៃប្រទេស ។ ឆាយ មាស និងនឿន សាវឌី ត្រូវបានគេមើល ឃើញថា នឹងអាចជ្រុះចេញពីវគ្គប្រកួតជម្រុះនេះដោយស្វ័យប្រវត្តិ ដោយសារតែលទ្ធផលប្រកួតនាពេលកន្លងមក គឺពួកគេចាញ់ច្រើនជាងឈ្នះ ។ ឆាយ មាស ប្រកួតបាន៤លើក ឈ្នះ១ ចាញ់៣ ចំណែកឯ នឿន សាវឌី ប្រកួតបាន៤លើកដូចគ្នា អត់ទាន់ស្គាល់ពាក្យថាឈ្នះម្តងណាឡើយ ដូច្នេះលើកនេះការប្រកួតរបស់ពួកគេធ្វើឡើងដើម្បីបង្គ្រប់កិច្ចបុ៉ណ្ណោះ ទោះចាញ់ឬឈ្នះក៏មិនអាចស្រោចស្រង់វិញបានដែរ ។
សុខ សុវណ្ណ និងផាន់ គ្រាន់ វិញទាំង២នាក់មិនបារម្ភសោះឡើយ ព្រោះពិន្ទុរបស់ពួកគេទាំង២ល្មមអាចឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀតដោយស្វ័យប្រវត្តិ ។ សុខ សុវណ្ណ ប្រកួតបាន៤លើករួចមកហើយ បុ៉ន្តែនៅមិនទាន់ស្គាល់ពាក្យថាចាញ់ម្តងណាឡើយ ពេលនេះគេកំពុងតែប្រជែងយកតំណែងលេខ១ ក្នុងពូលជាមួយ ឡៅ ចន្ទ្រា មកពីក្លិបទ័ពពិសេសឆត្រយោង៩១១ ដែលកំពុងតែមាន១២ពិន្ទុក្នុងដៃដូចគ្នា ។ ចំណែក ផាន់ គ្រាន់ វិញនោះប្រកួតបាន៤លើក ឈ្នះ៣ ចាញ់១ គឺចាញ់ពិន្ទុ ឡៅ ចន្ទ្រា កាលពីសប្តាហ៍មុននេះ ។ ទោះបីយ៉ាងណា ការបរាជ័យមួយលើករបស់គេមិនមែនជាឧបសគ្គក្នុងការរារាំងមិនឱ្យគេឡើងទៅកាន់កៅអីវគ្គពាក់កណ្តាលផ្តាច់ព្រ័ត្រជាបន្តទៀតនោះឡើយ ។
បុ៉ន្តែការមានបំណងចង់ស្វែងរក៣ពិន្ទុពីការប្រកួតលើកនេះ គឺមិនមែនជារឿងងាយស្រួលបុ៉ន្មាននោះឡើយព្រោះ សុខ សុវណ្ណ គឺជាកំពូលអ្នកប្រើស្នៀតកែង និងជង្គង់យ៉ាងស្ទាត់ជំនាញ ដែលមិនងាយនរណាអាចបំបាក់បានទេ ។ យ៉ាងណាក៏ដោយ សុខ សុវណ្ណ ក៏មិនហ៊ានមើលស្រាល ផាន់ គ្រាន់ ដែរ ទើបគេនិយាយថា ចាញ់ឬឈ្នះគេមិនដឹងមុនឡើយ ដរាបណាការប្រកួតជាក់ស្តែងមិនទាន់ឈានចូលមកដល់ ៕
ចែករំលែកព័តមាននេះ