កាលពីថ្ងៃពុធ ទី៩ មេសា កីឡាកររ៉ូជើ ហ្វេដឺរ័រ បានទទួលយកការអញ្ជើញឱ្យទៅចូលរួមប្រកួតក្នុងព្រឹត្តិការណ៍ Monte Carlo Masters ហើយបន្ទាប់ពីបានខកខានអស់រយៈពេល២ឆ្នាំកន្លងមក ។ ម្ចាស់ពានជើងឯកក្របខ័ណ្ឌធំ១៧ ជំនាន់រូបនេះដែលធ្លាប់បរាជ័យក្នុងវគ្គផ្តាច់ព្រ័ត្រក្រោមថ្វីដៃកីឡាកររ៉ាហ្វាអែល ណាដាល់៣លើកបន្តបន្ទាប់គ្នាក្នុងឆ្នាំ ២០០៦, ២០០៧ និងឆ្នាំ ២០០៨ មិនបានមកចូលប្រកួតក្នុងព្រឹត្តិការណ៍នេះទេចាប់តាំងពីឆ្នាំ២០១១មក ពោលគឺក្រោយពេលដែលរូបគេបានចាញ់កីឡាករ Jurgen Melzer ក្នុងវគ្គ១/៤ផ្តាច់ព្រ័ត្រ ។
ហ្វេដឺរ័រ បានបើករដូវកាលប្រកួតឆ្នាំថ្មីរបស់ខ្លួនជាមួយនឹងជ័យជម្នះពានជើងឯកនៅក្រុងឌូបៃ។ នៅទីនោះ កីឡាករវ័យ៣២ឆ្នាំរូបនេះបានបំបាក់កីឡាករជើងខ្លាំងរបស់ស៊ែប៊ីណូវ៉ាក់ យ៉ូកូវិច ក្នុងលទ្ធផល៣សិតផ្ទួនៗគ្នាក្នុងវគ្គពាក់កណ្តាលផ្តាច់ព្រ័ត្រ ។ នៅក្នុងក្របខ័ណ្ឌធំ Australian Open វិញ គេបានបរាជ័យក្នុងវគ្គពាក់កណ្តាលផ្តាច់ព្រ័ត្រ ។ សូមបញ្ជាក់ថា ហ្វេដឺរ័រធ្លាប់បានឈានចូលដល់វគ្គផ្តាច់ព្រ័ត្រក្របខ័ណ្ឌធំមួយនេះចំនួន៣លើក ។
ការប្រកួតបន្ទាប់ក្នុងកម្មវិធី BNP Paribas Open កាលពីខែមុន គេបានចាញ់យ៉ាងប្រផិតប្រផើយក្នុងវគ្គផ្តាច់ព្រ័ត្រក្រោមថ្វីដៃ ណូវ៉ាក់ យ៉ូកូវិច ។ វាជាការបរាជ័យដែលមានសណ្ឋានដូចគ្នានឹងការបរាជ័យរបស់គេក្រោមថ្វីដៃកីឡាករលីតុន ហេវីត នៅទីក្រុងប្រ៊ីសបេន កាលពីដើមខែមករា ឆ្នាំ២០១៤ ៕
ចែករំលែកព័តមាននេះ