ខេត្តកែប ៖ លោក យី សារុន អតីតកីឡាករវាយកូនបាល់ជើងចាស់ដ៏ល្បីរបស់កម្ពុជានាឆ្នាំ១៩៦០ កាលពីចុងសប្តាហ៍មុននេះ បានចុះទៅបង្ហាត់បង្រៀនដល់កីឡាករ-កីឡាការិនីវាយកូនបាល់វ័យក្មេងនៅខេត្តកែប ដើម្បីបង្កើនសមត្ថភាពពួកគេឱ្យកាន់តែល្អប្រសើរ និងមានការតស៊ូក្នុងការហ្វឹកហាត់ជាមួយនឹងលោក ងូវ សុខ គ្រូបង្វឹកកីឡាវាយកូនបាល់ប្រចាំខេត្តកែប ។
នៅក្នុងបេសកកម្មចូលរួមបណ្តុះបណ្តាលក្មេងៗនៅខេត្តកែបរបស់លោក យី សារុន ខាងលើនេះ គឺមានរយៈពេល២ថ្ងៃ ចាប់ពីថ្ងៃទី៥ ដល់ថ្ងៃទី៦ ខែមេសា ឆ្នាំ២០១៤ ដែលរៀបចំឡើងដោយថ្នាក់ដឹកនាំសហព័ន្ធកីឡាវាយកូនបាល់កម្ពុជា ។ លោក ជា ពៅ គ្រូបង្វឹកកីឡាវាយកូនបាល់ជម្រើសជាតិកម្ពុជា បានថ្លែងនៅថ្ងៃទី៩ ខែមេសា ឱ្យដឹងថា ការដែលថ្នាក់ដឹកនាំកីឡាវាយកូនបាល់កម្ពុជាអញ្ជើញលោក យី សារុន ទៅបង្ហាត់បង្រៀនដល់កុមារា-កុមារីខេត្តកែបនោះ គឺដើម្បីណែនាំពួកគេឱ្យស្គាល់ពីសមាសភាព និងស្នាដៃរបស់គាត់ក្នុងវិស័យកីឡាកម្ពុជា ជាពិសេសគឺការផ្តល់ដំបូន្មានល្អៗដល់ក្មេងៗ និងយុវជនជំនាន់ក្រោយក្នុងខេត្តកែបផងដែរ ។
គ្រូបង្វឹករូបនេះ បានបន្តទៀតថា លោក យី សារុន ធ្លាប់ឆ្លងកាត់បទពិសោធន៍ប្រកួតច្រើនឆ្នាំមកហើយ ហើយលោកក៏ធ្លាប់បានចូលរួមប្រកួតកីឡាវាយកូនបាល់នៅប្រទេសរុស្សុីទៀតផង ។ ដូច្នេះការបង្ហាញវត្តមានលោក យី សារុន នៅខេត្តកែបលើកដំបូងនេះ គឺក្នុងគោលបំណងចង់ឱ្យក្មេងៗទាំងអស់ ខិតខំប្រឹងប្រែងហ្វឹកហាត់ និងតស៊ូគ្រប់ឧបសគ្គសព្វបែបយា៉ង ដើម្បីក្លាយខ្លួនទៅជាកីឡាករ-កីឡាការិនីអាជីពម្នាក់ ដែលមានកេរ្តិ៍ឈ្មោះល្បីល្បាញយូរអង្វែងពិតប្រាកដ។ នៅក្នុងឱកាសនោះ លោក យី សារុន បានធ្វើការប្រកួតជាមួយក្មេងៗ រួមទាំងបានបង្ហាញពីបច្ចេកទេសផ្សេងៗទាក់ទងនឹងកីឡាវាយកូនបាល់ ដើម្បីឱ្យពួកគេត្រៀមប្រកួតក្នុងព្រឹត្តិការណ៍ Tournoi des Petits AS de kep ។
លោកសង្ឃឹមថា ក្មេងៗនៅខេត្តកែបមួយចំនួន ពួកគេមានទេពកោសល្យល្អក្នុងការលេងកីឡា ប៉ុន្តែមួយចំនួនទៀត ហាក់មានកម្រិតទាបនៅឡើយ ដូច្នេះយើងត្រូវផ្តល់ដំបូន្មាន និងបង្ហាត់បង្រៀនពួកគេឱ្យបានជាប់លាប់ដើម្បីឱ្យពួកគេមានសមត្ថភាព និងអាចចូលរួមប្រកួតប្រជែងលើឆាកជាតិ-អន្តរជាតិធំៗបាន ៕
ចែករំលែកព័តមាននេះ