រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំឈានទៅដណ្តើមខ្សែក្រវាត់ស្រាបៀរភ្នំពេញ ក្នុងប្រភេទទម្ងន់៥៤គីឡូក្រាមនៅលើសង្វៀន CTN នាថ្ងៃព្រហស្បតិ៍ ទី១០ មេសានេះបានឈានចូលដល់សប្តាហ៍ទី៩ ហើយ។ បេក្ខភាពដែលត្រូវឡើងប្រកួតនៅថ្ងៃនេះមាន ហេង សត្រា មកពីក្លិបតាព្រហ្មមានជ័យបង្ក្រាបគ្រឿងញៀន ជួបជាមួយ ទឹម សុជាតិ មកពីក្លិបកងរាជអាវុធហត្ថរាជធានីភ្នំពេញ ចំណែកខឹក សុខឿន មកពីក្លិបកងពលតូចទ័ពពិសេសឆត្រយោង៩១១ ជួបជាមួយ គឿម សុវណ្ណឌឿត មកពីក្លិបមោងឫស្សីខេត្តបាត់ដំបង។
រវាង ទឹម សុជាតិ និងហេង សត្រា មានប្រវត្តិប្រកួតមិនដូចគ្នាទេ ។ តាមពិតពួកគេទាំងពីរត្រូវប្រកួតបាន៤លើកម្នាក់ដូចគ្នា បុ៉ន្តែដោយសារតែសប្តាហ៍មុន ទឹម សុជាតិ មានបញ្ហាផ្នែកសុខភាព ទើបមានការខកខានអស់មួយប្រកួត ។ ដូច្នេះ ទឹម សុជាតិ ប្រកួតបាន៣លើក ឈ្នះ២ ចាញ់១ មាន៧ពិន្ទុ ចំណែក ហេង សត្រា ប្រកួតបាន៤លើក ឈ្នះ៣លើក ចាញ់១ មាន១០ពិន្ទុ ។ ទឹម សុជាតិ បើសិនជាឈ្នះការប្រកួតលើកនេះទៀតអាចមានសង្ឃឹមបានឡើងទៅប្រកួតនៅវគ្គបន្ត បុ៉ន្តែបើសិនជាចាញ់អាចជួបការលំបាកបន្តិចហើយ ។ ដោយឡែក សម្រាប់ ហេង សត្រា វិញនោះ បើសិនជាការប្រកួតលើកនេះឈ្នះគេនឹងឡើងទៅប្រកួតនៅវគ្គពាក់កណ្តាលផ្តាច់ព្រ័ត្រដោយស្វ័យប្រវត្តិ ។ បុ៉ន្តែគូនេះមិនអាចទាយទុនមុនបានឡើយ ព្រោះអីបើពិនិត្យទៅលើបច្ចេកទេសប្រកួតនៅលើសង្វៀន គឺមិនលើសគ្នាទេ ។ ទឹម សុជាតិ ពូកែខាងប្រើស្នៀតជើងទាត់ កណ្តាប់ដៃម៉ាត់ តែអន់ស្នៀតកែង និងជង្គង់បន្តិច ។ ចំណែក ហេង សត្រា ល្អស្នៀតកែង និងជង្គង់ ឯចិត្តក៏សឿងទៀត ។ ចាំមើល គូនេះអ្នកណាមានសំណាងរកបាន៣ពិន្ទុបន្ថែមទៀត ។
ខឹក សុខឿន កាលពីសប្តាហ៍មុនក៏មានការខកខានអស់មួយប្រកួតដែរ ព្រោះគេត្រូវជួប ទឹម សុជាតិ ដែលមានបញ្ហាសុខភាព ។ ខឹក សុខឿន ប្រកួតបាន៣លើក ចាញ់ទាំង៣លើក ឯគឿម សុវណ្ណឌឿត ប្រកួតបាន៤លើក ឈ្នះ២ ចាញ់២ ។ តាមរយៈលទ្ធផលនេះ ខឹក សុឃឿន អាចនឹងជ្រុះចេញពីវគ្គជម្រុះនេះមិនខាន ចំណែកឯ គឿម សុវណ្ណឌឿត វិញ វាសនារបស់គេក៏មិនសូវជាល្អបុ៉ន្មានដែរ លើកលែងតែការប្រកួតទាំងលើកនេះ និងលើកក្រោយៗទៀតគេឈ្នះជាបន្តបន្ទាប់ទើបជាការល្អ តែបើសិនជាចាញ់វិញនោះ គឺច្បាស់ជាអស់ផ្លូវអ៊ុតហើយ ៕
ចែករំលែកព័តមាននេះ