រាជធានីភ្នំពេញ ៖ អតីតតន្ត្រីករប្រចាំវិទ្យុជាតិក្នុងទសវត្សរ៍ទី៦០ និងអ្នកលែងហ្គីតាសូឡូដ៏ល្បីឈ្មោះលោកឡាំ ហឹង បានទទួលមរណភាពហើយក្នុងជន្មាយុ៨៥ឆ្នាំ នៅ sacramento រដ្ឋ California សហរដ្ឋអាមេរិក ដោយសារជំងឺមហារីកគ្រលៀន។
ដំណឹងពីមរណភាពរបស់អតីតតន្ត្រីកររូបនេះ ត្រូវបានលោកសុះ ម៉ាច ប្រធានសមាគមសិល្បករខ្មែរផ្សព្វផ្សាយជាសាធារណៈតាមបណ្តាញសង្គមហ្វេសប៊ុក បន្ទាប់ពីលោកបានទទួលដំណឹងនេះ ដូចគ្នាពីប្អូនស្រីឈ្មោះលីន ដា ដែលរស់នៅ sacramento ត្រូវជាជីដូនមួយរបស់កញ្ញាទូច ស៊ុននិច។
តាមការបញ្ជាក់របស់លោកសុះ ម៉ាច លោកឡាំ ហឺង មានស្នាដៃជាច្រើនក្នុងសម័យនោះ ដោយលោកបានចូលរួមលែងបទចម្រៀងជាច្រើនដូចជា ចំប៉ាបាត់ដំបង, ចំប៉ីសៀមរាប, ទីក្រុងកែប, ខ្យល់សមុទ្រ, ទឹកហូរក្រោមស្ពាន, ភ្លៀងស្រក់មាត់បង្អួច, ចន្ទ្រារះហើយ, ដៃសមុទ្រត្រពាំងរូង, ទ្វីសៗខ្ញុំ របស់លោកជុំកែម។ល។ ក្នុងសារដែលបានសសេរលោកសុះ ម៉ាច បានសម្តែងការសោកស្តាយចំពោះការបាត់បង់អតីតន្ត្រីករដ៏ឆ្នើមរូបនេះ ហើយលោកបានចាត់ទុកមរណភាពរបស់លោក គឺជាការបាត់បង់មរតកសិល្បៈជាតិដែរ។ ក្នុងនាមជាប្រធានសមាគមសិល្បៈ និងតំណាងឱ្យសិល្បករ សិល្បការិនីទាំងអស់ រូបលោកសូមចូលរួមរំលែកទុក្ខ និងសោកស្តាយពីចំងាយជាមួយក្រុមគ្រួសារសព និងសូមបួងសួងព្រលឹងលោកឡាំ ហឺង ទៅកាន់សុខតិភពកុំបីឃ្លាតឡើយ៕
ចែករំលែកព័តមាននេះ