រាជធានីភ្នំពេញ ៖ រយៈពេលប៉ុន្មានជិត២សប្តាហ៍មកហើយ ដែលនាងអៀង ច័ន្ទថាវី និងកញ្ញាស្រីណេ អ្នកសិល្បៈប្រចាំក្រុមសិល្បៈរាជធានីភ្នំពេញ ចេញទៅច្រៀងរាំនៅប្រទេសអាមេរិក រយៈពេល៣ខែ ដោយពួកគេបានចាកចេញពីស្រុកខ្មែរមុនបំណាច់ខែមីនា មកម្ល៉េះ ។ តាំងពីពួកគេចាកចេញទៅអាមេរិកសម្តែងមកតារាចម្រៀងទាំង២ដួងនេះ ទទួលបានសញ្ញាវិជ្ជមានខ្លាំងគ្រាន់បើ គឺទទួលបានការគាំទ្រពីមហាជននៅឯនាយសមុទ្រច្រើន ព្រោះតែពួកគេសុទ្ធតែមានជំនាញសិល្បៈម្យ៉ាងម្នាក់។
មុនចាកចេញទៅកាន់ប្រទេសអាមេរិកតារាចម្រៀងមុខស្រស់បែបខ្មែរ អ្នកនាងអៀង ច័ន្ទថាវី ដែលមានប្រភពចេញពីខេត្តតាកែវ និងជាអ្នកសិល្បៈបុរាណផ្នែកយីកេ ហើយទើបតែរៀបការថ្មីៗបានឲ្យដឹងថា នាងត្រូវបានគេអញ្ជើញឲ្យទៅសម្តែងនៅអាមេរិក៣ខែទៅ៦ខែ ដោយទៅជាមួយកញ្ញាស្រីណេ នៅខាងសិល្បៈរាជធានី ដែលមានជំនាញខាងច្រៀងបទសម័យបានពីរោះណាស់ដែរ។
ពួកយើងត្រូវបានគេហៅទៅសម្តែងនៅអាមេរិកនេះ ម្នាក់ៗសប្បាយចិត្តណាស់ មិននឹកថា បានទៅទេ ព្រោះយើងទាំង២មិនល្បីឈ្មោះខ្លាំងនៅស្រុកខ្មែរទេ តែឮអ្នកធានាប្រាប់ថា ពួកយើងពូកែខាងសម្តែង បើខាងល្ខោនក៏បាន ខាងយីកេក៏បាន សម័យក៏បាន ពោលគឺចង់ស្តាប់បទយីកេច្រៀងបាន ចង់ស្តាប់បទជំនាន់លោកស្រី រស់ សេរីសុទ្ឋា ក៏យើងអាចច្រៀងបាន និងចេះចាំបានស្ទើរតែគ្រប់បទមិនថា ញាក់ ឬស្លូឡើយ។
ចំណែកកញ្ញាស្រីណេ ដែលរំលេចចេញជាអ្នកសិល្បៈរាជធានីភ្នំពេញ ហើយបានចាប់យកអាជីពជាអ្នកចម្រៀងធា្លប់បានអះអាងប្រាប់អ្នកយកព័ត៌មានយើងដែរថា នាងធ្លាប់ទៅសម្តែងក្នុងតំបន់អាស៊ីបានច្រើនប្រទេសដែរ នៅពេលជាប់ការងារនៅក្នុងសិល្បៈរាជធានី មានតាំងពីសម្តែងរបាំ ឬការសម្តែងបែបយីកេ ល្ខោន គឺនាងអាចធ្វើបានទាំងអស់។ ប៉ុន្តែការសម្តែងនៅក្រៅប្រទេស ពិសេសនៅអាមេរិកបែបនេះ នៅមិនទាន់មានឱកាសនៅឡើយទេ ទើបតែពេលនេះនាងបានសម្តែង គឺប្លែក ព្រោះពួកយើងបានតាំងចិត្ត ហើយនិងពាំនាំឈុតឆាកសម្តែងឲ្យមានសភាពប្លែក ដូចជា សម្តែងយីកេសម្តែងល្ខោន ឬច្រៀងសម័យ ដោយធ្វើយ៉ាងណាឲ្យទទួលបានការទាក់ទាញ។ ម្យ៉ាងទៀត ព្រោះតែយល់តែមានការឲ្យតម្លែខ្ពស់ផ្នែកសិល្បៈផងនោះ កាន់តែធ្វើឲ្យពួកយើងសប្បាយចិត្ត ព្រោះបើនិយាយពីលំដាប់កេរ្តិ៍ឈ្មោះលើពិភពសិល្បៈពួកយើងមិនល្បីល្បាញកំពូលនោះទេ តែបានទៅអាមេរិកសម្តែង ពិតជាពិសេសដែលខាងអ្នករៀបចំគាត់បានសម្លឹងមើលឃើញពីតម្លៃទេពកោសល្យរបស់សិល្បការិនីយើងទាំងពីរ ដែលមានជំនាញបែបសិល្បៈស្ទើរតែគ្រប់ផ្នែកទាំងអស់តាំងពីយូរមកហើយនោះ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ