ខេត្តសៀមរាប៖ ជនសង្ស័យ២នាក់បានត្រូវកងកម្លំាងរាជអាវុធហត្ថខេត្តដឹកនំាដោយលោកវរៈសេនីយ៏ឯក ស្រី យូរ៉ា មេបញ្ជាការរងនិងជាប្រធានមន្ទីរស្រាវជ្រាវ និងយុត្តិធ៌មនៃទីបញ្ជាការកងរាជអាវុធហត្ថខេត្តសៀមរាបឃាត់ចាប់ខ្លួនបន្តបន្ទាប់កាលពីម៉ោង៣និង៣០នាទីទៀបភ្លឺថ្ងៃទី០៨ មេសា ២០១៤ នៅផ្ទះសំណាក់ដែលមានយីហោ ធួក ប៊ុនថុន ស្ថិតក្នុងសង្កាត់សាលាកម្រើក ក្រុងសៀមរាប ពីបទកាច់កម៉ូតូ ។
ជនសង្ស័យមានឈ្មោះ សួន រិទ្ឋី ហៅធី ភេទប្រុស អាយុ ២៣ឆ្នាំ រស់នៅភូមិវត្តស្វាយ សង្កាត់សាលាកម្រើក ក្រុងសៀមរាប និង ម្នាក់ទៀតឈ្មោះ ស៊ឹម សាវី ភេទប្រុសអាយុ២៥ឆ្នាំ រស់នៅភូមិសំរោងធំ ឃុំសំរោងធំ ស្រុកជីក្រែង ។
បើតាមភ្នាក់ងារកោះសន្តិភាពបានស្រង់សម្តីសមត្ថកិច្ចឲ្យដឹងទៀតថា ការចាប់ឃាត់ខ្លួនជនសង្ស័យទំាងពីរនាក់ខាងលើ គឺធ្វើឡើងតាមពាក្យបណ្តឹងរបស់ឈ្មោះ មុន គន់ ភេទប្រុសអាយុ៣៨ឆ្នាំ រស់នៅភូមិខ្លាត ឃុំ-ស្រុកជីក្រែង ដែលអះអាងថាបានត្រូវចោរកាច់កម៉ូតូលួចយកទៅបាត់កាលពីម៉ោងជិត១ រំលងអធ្រាត្រឈានចូលថ្ងៃទី០៨ មេសា ២០១៤ នៅចំណុចផ្ទះជនរងគ្រោះផ្ទាល់ ។
ម៉ូតូដែលចោរលួចនោះម៉ាកសេ១២៥ ស៊េរីឆ្នាំ២០០៧ ព៌ណខ្មៅ ពាក់ស្លាកលេខ សៀមរាប 1D 4070 ។
ក្រោយឃាត់ខ្លួនសមត្ថកិច្ចដកហូតបានម៉ូតូខាងលើ ទូរស័ព្ទដៃ០២គ្រឿង កាបូបលុយ២ សោលេខ៨សម្រាប់កាច់កម៉ូតូចំនួន១ ដេកឆាប១ និង រណាចំនួន១ ។
សេចក្តីរាយការណ៏បានបញ្ជាក់ឲ្យដឹងដែរថា នៅរសៀលថ្ងៃទី០៨ មេសា ២០១៤នេះ ជនសង្ស័យទំាងពីរនាក់ត្រូវបានកងរាជអាវុធហត្ថបញ្ជូនទៅតុលាការចាត់ការតាមច្បាប់ ៕
ចែករំលែកព័តមាននេះ