រាជធានីភ្នំពេញ ៖ កាលពីថ្ងៃទី៦ មេសា កន្លងទៅនេះ ក្រុមហ៊ុន DKSH កម្ពុជា រួមជាមួយនឹងក្រុមហ៊ុនផលិតឱសថភ្ជែហ្វាប បានរៀបចំបើកកម្មវិធីប្រកួតបាល់អោបរបស់ប្រជាជនកម្ពុជាលើកទី១ សម្រាប់ឆ្នាំ២០១៤ នៅលើទីលានស្តាតចាស់ ។ ក្នុងឱកាសនោះ ក្រុមហ៊ុនទាំងពីរបានផ្តល់រង្វាន់លើកទឹកចិត្តដល់ក្មេងៗ របស់អង្គការកម្ពុជាបាល់អោបនូវអាវកីឡាបាល់អោបដែលមានឈ្មោះល្បីល្បាញពីក្រុមកីឡាបាល់អោបអាជីពរបស់បារាំងឈ្មោះថា Castres Olympique ផងដែរ ។
សម្រាប់ការរៀបចំព្រឹត្តិការណ៍ប្រកួតកីឡាបាល់អោប និងឧបត្ថម្ភអាវកីឡាដល់អង្គការកម្ពុជាបាល់អោបប្រចាំឆ្នាំ២០១៤ នេះ គឺធ្វើឡើងក្នុងគោលបំណងដើម្បីលើកកម្ពស់ក្មេងៗដែលមិនមានលទ្ធភាពក្នុងការរស់នៅបានសមរម្យតាមរយៈកីឡាគឺជាការសំខាន់ ព្រោះការលេងកីឡាបាល់អោបជាយុទ្ធនាការដ៏ល្អក្នុងការបង្រួបបង្រួមទំនាក់ទំនងគ្នាទៅវិញទៅមក ។ ម្យ៉ាងវិញទៀត បច្ចុប្បន្ននេះក្រុមហ៊ុន DKSH និងក្រុមហ៊ុនផលិតឱសថភ្ជែហ្វាប ក៏កំពុងខិតខំជួយឱ្យវិស័យកីឡាបាល់អោបកម្ពុជាមានការរីកចម្រើនកាន់តែខ្លាំងឡើងថែមទៀតផង ។
សូមរំលឹកថា កាលពីឆ្នាំ២០១៣ ក្រុមហ៊ុន DKSH រួមជាមួយនឹងអង្គការកម្ពុជាបាល់អោបធ្លាប់បានធ្វើជាដៃគូសហការគ្នាប្រកបដោយជោគជ័យនៅក្នុងការរៀបចំព្រឹត្តិការណ៍ប្រកួតកីឡាបាល់អោបសម្រាប់ប្រជាជនកម្ពុជា ហើយក្រុមហ៊ុនក៏បានបន្តកិច្ចសហប្រតិបត្តិការយ៉ាងស្អិតរមួត ព្រមទាំងជួយឧបត្ថម្ភអង្គការកម្ពុជាបាល់អោបតាមរយៈកម្មវិធីផ្សេងៗទៀត និងបានបន្តរហូតដល់ឆ្នាំ២០១៤ នេះ ៕
ចែករំលែកព័តមាននេះ