រាជធានីភ្នំពេញ ៖ លោកបណ្ឌិតជីវ កេង ប្រធានសាលាដំបូងរាជធានីភ្នំពេញ បានឱ្យដឹងតាមរយៈសុន្ទរកថារបស់លោក នៅក្នុងពិធីអបអរសាទរខួបលើកទី១០៣ នៃទិវាអន្តរជាតិនារី ៨ មីនា ដែលបានប្រារព្ធធ្វើនៅសាលាដំបូងរាជធានី កាលពីរសៀលថ្ងៃទី៦ មីនា ថា នៅឆ្នាំ២០១៣ រដ្ឋបាលសាលាដំបូងរាជធានីភ្នំពេញ បានទទួលពាក្យបណ្តឹងលែងលះចំនួន១.២៨៧ បណ្តឹង ។
លោកបណ្ឌិតប្រធានសាលាដំបូងឱ្យដឹងទៀតថា ក្នុងចំណោមពាក្យបណ្តឹងទាំងជាង១.២០០នោះ ភាគច្រើនគឺបណ្តឹងរបស់ស្ត្រីសុំលែងលះប្តី ។ បើគិតជាបរិមាណ ប្រពន្ធប្តឹងលែងប្តីអាចដល់៧០% ។ ចំណែកប្តីប្តឹងសុំលែងប្រពន្ធវិញមានប្រមាណ៣០% ប៉ុណ្ណោះ។
មន្ត្រីតុលាការកាន់សំណុំរឿងលែងលះនិយាយថា មានបណ្តឹងខ្លះត្រូវបានសះជាគ្នាវិញក៏មានដែរ មិនមែនបណ្តឹងទាំងអស់នោះ សម្រេចលែងលះទាំងអស់នោះទេ ។ មន្ត្រីដដែលឱ្យដឹងថា បណ្តឹងរបស់ស្ត្រីភាគច្រើនគឺខឹងប្តីដើរលេងយប់មិនចូលផ្ទះ ចុះចោលដំណេកជាដើម ។ ចំណែកបណ្តឹងរបស់បុរសច្រើនតែអះអាងថា រស់នៅមិនចុះសម្រុងគ្នាជាមួយប្រពន្ធ ។
អ្នកមាត់ដាចខ្លះនិយាយថា បានជាបុរសមិនសូវដាក់បណ្តឹងលែងលះប្រពន្ធនោះ គឺបុរសម្នាក់ៗគ្មានបុរសណាចង់លែងប្រពន្ធមួយហើយទៅយកប្រពន្ធម្នាក់ទៀតនោះទេ គឺមានតែយកថែម សមដូចបទចម្រៀងលោកស៊ិន ស៊ីសាមុត មានទំនុកថា «ប្រពន្ធបងមិនលែងមានតែយកថែម »ហើយបើប្រពន្ធព្រមនោះពិតជាធ្វើបែបនេះឯង ។ ចំណែកប្តីមួយប្រពន្ធមួយជាបំណងប្រាថ្នារបស់ស្ត្រីខ្មែរគ្រប់រូប ។
ពិតណាស់ម្ទេសណាមិនហឹរ បើប្តីទៅលួចមានស្រីក្រៅផ្ទះ គឺជាបន្ទុះភ្នំភ្លើងសម្រាប់ស្ត្រីជាភរិយា ហើយបញ្ហាបែបនេះតែងក្លាយជាបណ្តឹងនៃការលែងលះ ប៉ុន្តែនៅមានបញ្ហាជាច្រើនទៀតដែលបណ្តាលឱ្យស្ត្រីបានក្លាយជាអ្នកនាំមុខបុរស ក្នុងបណ្តឹងលែងលះនេះ ៕
ចែករំលែកព័តមាននេះ