រថយន្តរបស់ថៅកែចែចន្ថា ដឹកស៊ីម៉ង់ត៍៤០តោនបំបាក់ស្ពានដែកបេឡេត៍ធ្លាក់ចូលស្ទឹង
ដោយ ៖ឈិត គឹមឆុន
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១៥:៣០
កោះសន្តិភាព
ស្ពានដែកបេឡេត៍បានបាក់ខ្ទេចទាំងស្រុងដោយសាររថយន្តយក្សដឹកស៊ីម៉ង់ត៍
ខេត្តបាត់ដំបង ៖ ស្ពានដែកបេឡេត៍មួយខ្សែមានឈ្មោះថា «ស្ពានកងពល» ប្រវែង៤៨ម៉ែត្រឆ្លងកាត់ស្ទឹងបវេល បានបាក់ខ្ទេចទាំងស្រុងដោយសាររថយន្តយក្សដឹកស៊ីម៉ង់ត៍របស់ថៅកែចែចន្ថាផ្ទុកលើសចំណុះរហូតដល់៤០តោន បើកឆ្លងកាត់ កាលពីវេលាម៉ោង៧និង៥០នាទីយប់ ថ្ងៃទី៥ កញ្ញា ស្ថិតក្នុងភូមិទំនប់ទឹក ឃុំបវេល ស្រុកបវេល ។
តាមការដាក់ស្លាកសំគាល់ត្រង់ក្បាលស្ពានគឺស្ពាននេះមានទំហំ៤ម៉ែត្រគុណ៤៨ម៉ែត្រ អាចទ្រទំងន់បាន២៥តោនប៉ុណ្ណោះ លុះដល់ពេលដឹក៤០តោន គឺបានបាក់ធ្លាក់ទាំងស្ពាន និងឡានចូលទៅក្នុងទឹកតែម្តង ។ លោកទឹម ដារ៉េត អភិបាលស្រុកបវេលបានប្រាប់កោះសន្តិភាពថា ស្ពានដែកនេះបានបាក់ដោយសារតែរថយន្តដឹកលើសចំណុះបង្កឱ្យមានការភ្ញាក់ផ្អើល និងកកស្ទះចរាចរណ៍ ។
លោកទឹម ដារ៉េត បានបញ្ជាក់ថា នៅព្រឹកថ្ងៃទី៦ កញ្ញា អាជ្ញាធរបានបង្កើតក្បូនឫស្សី និងទូកសំរាប់ចំលងអ្នកដំណើរជាបណ្តោះអាសន្ន ប៉ុន្តែមិនអាចចំលងសំភារធ្ងន់ៗបានទេ ដែលជាប្រការមួយធ្វើឱ្យអ្នកដំណើរជួបការលំបាកយ៉ាងខ្លាំង ហើយមានរយៈពេលយូរទៀតផង ។ រថយន្តបង្កមហន្តរាយនេះម៉ាកហ៊ីណូ យីឌុប ពាក់ស្លាកលេខ ភ្នំពេញ 3A-1179 របស់ថៅកែឈ្មោះចែចន្ថា មានអ្នកបើកបរឈ្មោះហ៊ុយ ប្រុស អាយុ៤៩ឆ្នាំ រស់នៅឃុំកំពង់ព្រៀង ស្រុកសង្កែ ខេត្តបាត់ដំបង ហើយអាជ្ញាធរកំពុងតែទាមទារឱ្យក្រុមហ៊ុនដឹកជញ្ជូនមួយនេះសងការខូចខាតស្ពានទាំងស្រុង ៕
