រាជធានីភ្នំពេញ ៖ លោកចា រិទ្ធី ជាអ្នករៀបចំកម្មវិធីប្រគំតន្ត្រីជាយូរឆ្នាំមកហើយនៅស្ថានីយទូរទស្សន៍ប៉ុស្តិ៍លេខ៥ បច្ចុប្បន្នមិនមានវត្តមាននៅទីនោះទៀតទេ ខណៈលោកគួច ខេវិន ក៏ចាកចេញពីតំណែងដូចគ្នានេះពីស្ថានីយទូរទស្សន៍អាស៊ីអាគ្នេយ៍ដែរ ។ លោកចា រិទ្ធី បានទៅជំនួសកន្លែងលោកគួច ខេវិន នៅទូរទស្សន៍អាស៊ីអាគ្នេយ៍ តែសម្រាប់លោកគួច ខេវិន មិនទាន់ដឹងកន្លែងថ្មីនៅឡើយទេ ។
លោកចា រិទ្ធី ជាអ្នកដឹកនាំកម្មវិធីសិល្បៈតន្ត្រីនៅស្ថានីយទូរទស្សន៍ប៉ុស្តិ៍លេខ៥ ជាយូរមកហើយ ប៉ុន្តែមួយរយៈចុងក្រោយនេះ គេកត់សម្គាល់ឃើញថា កម្មវិធីដែលលោកកាន់កាប់នោះខកខានផ្សាយផ្ទាល់ គឺកម្មវិធី «តារាមាសតន្ត្រី» ។
ថ្មីៗនេះ តាមដំណឹងពីអ្នកសិល្បៈឱ្យដឹងថា លោកចា រិទ្ធី លាឈប់ជាផ្លូវការហើយពីទូរទស្សន៍លេខ៥ ដោយផ្លាស់ទៅធ្វើជាអ្នកចាត់ចែងកម្មវិធីប្រគំតន្ត្រីនៅស្ថានីយទូរទស្សន៍អាស៊ីអាគ្នេយ៍វិញ ។
ដោយសារតែលោកចា រិទ្ធី ទៅរៀបចំកម្មវិធីប្រគំតន្ត្រីនៅស្ថានីយទូរទស្សន៍អាស៊ីអាគ្នេយ៍នេះហើយ ទើបមួយរយៈនេះឃើញប្លែកពីមុន គឺ រៀបឆាកថ្មី និងអ្នកសិល្បៈចូលរួមសម្តែងសុទ្ធតែតារា ល្បីៗ មានទាំងលោកព្រាប សុវត្ថិ និងឱក សុគន្ធកញ្ញា ជាដើម ។ លើសពីនេះតារាកំប្លែង នាយក្រឹម ពុំធ្លាប់សម្តែងនៅអាស៊ីអាគ្នេយ៍សោះ ក៏ប្រែជាឃើញមុខចូលរួមសម្តែងដែរ ។
ជុំវិញរឿងលោក ចា រិទ្ធី លាឈប់ពីទូរទស្សន៍ប៉ុស្តិ៍លេខ៥ដែលធា្លប់បម្រើការងារអស់ពេលជាច្រើនឆ្នាំមកហើយនោះ អ្នកយកព័ត៌មានកោះសន្តិភាពនៅមិនទាន់អាចទាក់ទងសុំការបកស្រាយពីរូបលោកផ្ទាល់បាននៅឡើយទេ ។ ទោះជាយ៉ាងណាក្តី បើតាមប្រភពនៅកៀកកិតក្នុងពិភពសិល្បៈឱ្យដឹងថា លោកចា រិទ្ធី បានចូលទៅកាន់កម្មវិធីសិល្បៈនៅទូរទស្សន៍អាស៊ីអាគ្នេយ៍រយៈពេល២សប្តាហ៍មកហើយ ដោយលោកលាឈប់ពីទូរទស្សន៍ប៉ុស្តិ៍លេខ៥ ។ ដូច្នេះហើយទើបបានជាមួយរយៈនេះ កម្មវិធីប្រគំតន្ត្រីនៅទូរទស្សន៍អាស៊ីអាគ្នេយ៍ប្លែកច្រើន ដោយមានតារាចម្រៀង ល្បីៗ អ្នកកំប្លែង ល្បីៗឡើងសម្តែង ខណៈទូរទស្សន៍ប៉ុស្តិ៍លេខ៥ មិនឃើញផ្សាយផ្ទាល់កម្មវិធី «តារាមាសតន្ត្រី» ។
ប្រភពព័ត៌មានឱ្យដឹងទៀតថា លោកចា រិទ្ធី លាឈប់ពីទូរទស្សន៍ប៉ុស្តិ៍លេខ៥ ទៅកាន់កន្លែងថ្មីគ្រប់គ្រងកម្មវិធីសិល្បៈចំនួន៤ សុទ្ធសឹងតែជាកម្មវិធីប្រគំតន្ត្រី ។ លោក រិទ្ធី ទៅកែលម្អកម្មវិធីប្រគំតន្ត្រីនៅទីនោះឱ្យប្លែក ក្នុងនោះឆាកតន្ត្រីលម្អភ្លើងពណ៌ប្រណីត ក្នុងពេលស្ថានីយផ្សេងទៀតរៀបចំឆាកតន្ត្រីកាន់តែទំនើបឡើងៗ ។
ទន្ទឹមនឹងមានព័ត៌មានថាលោកចា រិទ្ធី ចាកចេញពីទូរទស្សន៍ប៉ុស្តិ៍លេខ៥ ទៅកាន់ការងារនៅទូរទស្សន៍អាស៊ីអាគ្នេយ៍នោះ ក៏លេចឮថា លោកគួច ខេវិន ដែលជាអ្នករៀបចំកម្មវិធីប្រគំតន្ត្រីនៅទូរទស្សន៍អាស៊ីអាគ្នេយ៍ ចាកចេញទៅកន្លែងថ្មីដែរ ។ មានន័យថា លោកចា រិទ្ធី បានទៅជំនួសកន្លែងលោកគួច ខេវិន ខណៈលោកគួច ខេវិន ទៅសាងស្នាដៃនៅកន្លែងថ្មីផ្សេងទៀត ។
លោកគួច ខេវិន ជាអ្នករៀបចំកម្មវិធីប្រគំតន្ត្រីនៅស្ថានីយទូរទស្សន៍អាស៊ីអាគ្នេយ៍ជាយូរមកហើយ ប៉ុន្តែឥឡូវនេះលោកផ្លាស់ប្តូរទៅកន្លែងផ្សេងវិញ ។
ចំពោះលោកគួច ខេវិន ក៏កោះសន្តិភាពព្យាយាមទាក់ទងសួរនាំពុំទាន់បានសម្រេចដែរ ។ មិនមានប្រភពបញ្ជាក់ពីមូលហេតុនៃការចាកចេញពីកន្លែងចាស់ទៅសាងស្នាដៃនៅកន្លែងថ្មី របស់លោកចា រិទ្ធី និងលោកគួច ខេវិន ទេ ៕
ចែករំលែកព័តមាននេះ