លោកប្រាយុទ្ធ ច័ន្ទអូចា មេបញ្ជាការកងទ័ពជើងគោកថៃ មានក្តីបារម្ភលើស្ថានការណ៍ទំនាស់ក្នុងពេលអនាគត ដោយបានចេញបញ្ជាឱ្យកងទ័ពធ្វើកំណែទម្រង់ផែនការការពារសន្តិសុខ និងមានការសោកស្តាយលើការស្លាប់បាត់បង់ជីវិតមន្ត្រី និងប្រជាជននៅក្នុងហេតុការណ៍ប៉ះទង្គិចគ្នានៅតាមទីតាំងរបស់ក្រុមអ្នកតវ៉ា កាលពីថ្ងៃទី១៨ កុម្ភៈ កន្លងទៅ ។
កាលពីថ្ងៃទី២០ កុម្ភៈ សារព័ត៌មានថៃផ្សាយដោយយោងតាមសម្តីរបស់លោកវីនថាយ ស្វារី អ្នកនាំពាក្យកងទ័ពជើងគោកថា ឧត្តមសេនីយ៍ប្រាយុទ្ធ ច័ន្ទអូចា មានក្តីបារម្ភចំពោះស្ថានការណ៍នយោបាយក្នុងពេលអនាគត ទើបបញ្ជាដល់កងទ័ពឱ្យកែទម្រង់កិច្ចការពារសន្តិសុខនៅក្នុងតំបន់ដែលទទួលខុសត្រូវ ដោយធ្វើការរឹតបន្តឹង និងឱ្យមានប្រសិទ្ធភាពកាន់តែខ្លាំង រួមទាំងសុំឱ្យគ្រប់ភាគីត្រូវយោគយល់ពីហេតុផលចាំបាច់ក្នុងកិច្ចប្រតិបត្តិការរបស់អាជ្ញាធរ ។
ទាក់ទិននឹងរឿងនយោបាយក្នុងប្រទេសថៃ ដែលកំពុងមានភាពរង្គោះរង្គើ បច្ចុប្បន្នលោកស្រីយីងឡាក់ សុីណាវ៉ាត្រា នាយករដ្ឋមន្ត្រីចាំផ្ទះ ជួបសម្ពាធពីគ្រប់មជ្ឈដ្ឋាន រួមទាំងការគាបសង្កត់របស់ក្រុមអ្នកតវ៉ាបណ្តេញត្រកូលថាក់សុីន ការសួរចម្លើយពីអំពើពុករលួយ ព្រមទាំងការតវ៉ារបស់ក្រុមកសិករដែលទាមទារថ្លៃទិញស្រូវពីតាមបណ្តាខេត្តនានានៅទូទាំងប្រទេស ។
ជាក់ស្តែងនៅថ្ងៃទី២១ កុម្ភៈ ក្រុមកសិករមកពីភាគកណ្តាលប្រទេសជាច្រើននាក់ បាននាំក្បួនគោយន្ត និងរថយន្តផ្នែកកសិកម្ម ធ្វើដំណើរឆ្ពោះទៅអាកាសយានដ្ឋានសុវណ្ណភូមិ ដើម្បីតវ៉ាដល់រដ្ឋាភិបាលទាមទារប្រាក់ដែលមិនបានចំណាយក្នុងគម្រោងទិញស្រូវ ។
លោកឆាដា ថៃ សេស អតីតតំណាងរាស្ត្រក្នុងខេត្តអ៊ូថាយធានី ជាមេដឹកនាំក្រុមអ្នកតវ៉ាកសិករពីភាគកណ្តាលប្រទេសថ្លែងថា រូបគេនឹងធ្វើការចរចាជាមួយលោកស្រីយីងឡាក់ និងរង់ចាំនៅត្រឹមម៉ោង១២ថ្ងៃត្រង់ ថ្ងៃទី២១ កុម្ភៈ រួចប្រសិនបើមិនបានជួបចរចា ឬបើការចរចាមិនទទួលបានលទ្ធផលល្អ នោះក្រុមកសិករនឹងដង្ហែក្បួនចូលទៅទីតាំងអាកាសយានដ្ឋានសុវណ្ណភូមិភ្លាមៗតែម្តង ។ ស្របពេលជាមួយគ្នានោះដែរ ប្រភពព័ត៌មានរបស់ថៃផ្សាយថា ក្រុមកសិករតវ៉ា បានយល់ព្រមត្រឡប់ទៅលំនៅឋានវិញ ក្រោយពីចរចាទទួលបានលទ្ធផលល្អ ដោយរដ្ឋាភិបាលសន្យានឹងប្រគល់ប្រាក់ក្នុងរយៈពេល១សប្តាហ៍ទៀត ។ ជាមួយគ្នានេះ ក្រុមអ្នកតវ៉ាបានគំរាមថា បើមិនបានប្រាក់ ពួកគេនឹងត្រឡប់មកដេញរដ្ឋាភិបាលជាថ្មី និងធ្ងន់ធ្ងរជាងមុន ។
ចំណែកលោកចារូពង្ស រឿងស៊ូវ៉ាន់ ប្រធានគណបក្សភឿថៃ បានដឹកនាំតំណាងគណបក្សចម្រុះចំនួន៤ ក្នុងរដ្ឋាភិបាល ចុះហត្ថលេខាលើសេចក្តីថ្លែងការណ៍រួមមួយអំពាវនាវដល់គណៈកម្មាធិការបោះឆ្នោត ឱ្យរៀបចំការបោះឆ្នោតឱ្យស្របតាមកាលកំណត់ និងទទួលបានជោគជ័យ។ កាលពីថ្ងៃទី២១ កុម្ភៈ មេដឹកនាំបណ្តាគណបក្សក្នុងរដ្ឋាភិបាលចម្រុះ ដឹកនាំដោយលោកចារូពង្ស រឿងស៊ូវ៉ាន់ រួមជាមួយតំណាងគណបក្សចំនួន៤ក្នុងរដ្ឋាភិបាល បានរួមប្រជុំស្តីពីស្ថានការណ៍នយោបាយ និងពីការបោះឆ្នោត ។
សេចក្តីថ្លែងការណ៍រួមចែងថា តាមធម្មតា គណបក្សទាំង៤ បានពិភាក្សារួមគ្នាជារឿយៗ ពិសេសក្នុងអំឡុងពេលប្រទេសមានបញ្ហានយោបាយ ប៉ុន្តែអ្វីដែលបារម្ភក្នុងពេលបច្ចុប្បន្ន គឺការបោះឆ្នោតមិនទទួលបានលទ្ធផលល្អ ។គណបក្សទាំង៤ក្នុងរដ្ឋាភិបាលចម្រុះ យល់ឃើញថា ដើម្បីឱ្យការបោះឆ្នោតដំណើរការបានល្អ និងបង្កើតសភាបាន នោះក្រុមចម្រុះក្នុងរដ្ឋាភិបាលយល់ថា គណៈកម្មាធិការបោះឆ្នោត គួរបំពេញតួនាទីឱ្យបានល្អ ហើយឱ្យទទួលបានជោគជ័យទៅតាមការកំណត់នាពេលខាងមុខ ៕
ចែករំលែកព័តមាននេះ