រាជធានីភ្នំពេញ ៖ តារាសម្តែងល្បីឈ្មោះតាំងពីនៅវ័យកុមារនាងលី ច័ន្ទសីហា កាលពីពេល ថ្មីៗនេះត្រូវជនម្នាក់ក្លែងឈ្មោះជាតារាសម្តែងលោកហេង ប៊ុនលាភ ខ្ចីលុយតាមហ្វេសប៊ុក ដោយប្រាប់ថាមានបញ្ហាត្រូវការជំនួយបន្ទាន់ ។ ដោយយល់ថាជារឿងឆបោក លី ច័ន្ទសីហា មិនព្រមវេរលុយឱ្យជនកំហូចម្នាក់នោះទេ ថែមទាំងព្រមានប្តឹងប៉ូលិសទៀតផង ។
លី ច័ន្ទសីហា ជាសិល្បការិនីទី២ហើយ ដែលអំពាវនាវឱ្យមហាជនបានដឹងជាសាធារណៈជុំវិញជនឆបោកលុយតាមរយៈហ្វេសប៊ុក ដោយយកឈ្មោះលោកហេង ប៊ុនលាភ អតីតតារាសម្តែងល្បីឈ្មោះមកប្រើ ខណៈម្ចាស់ខ្លួនមិនបានដឹងសោះនោះ ។ មុននេះតារាចម្រៀងអ្នកនាងម៉ៅ សីុណាត បានប្រកាសថាមានគេយកឈ្មោះ លោកហេង ប៊ុនលាភ បន្លំបោកយកលុយពីនាងហើយនាងវិះតែចាញ់បោកគេអស់៣០០ដុល្លារ ។ នាងស្គាល់អត្តចរិតលោកប៊ុនលាភ ដែលធ្លាប់រួមអាជីពជាមួយគ្នា ដូច្នេះហើយទើបមិនភ្លាត់ស្នៀតចាញ់ល្បិចជនខិលខូច ។ ចំណែកតារាសម្តែង លី ច័ន្ទសីហា ក៏ជួបរឿងនេះដែរ តែនាងមិនចាញ់ល្បិចឆបោកនោះទេ ។
ក្នុងជំនួបកាលពីរាត្រីថ្ងៃទី១៧ កុម្ភៈ ២០១៤ លី ច័ន្ទសីហា ដែលចូលរួមពិធីខួបកំណើតតារាចម្រៀង ឆៃលី ដាឡែន ប្រាប់អ្នកយកព័ត៌មានកោះសន្តិភាពទាំងហួសចិត្តថា នាងមិនភ្លើចាញ់បោកមនុស្សកំហូចម្នាក់នោះទេ ។ នាងគ្មានអស់លុយដោយសារតែពួកប្រើល្បិចកុហកនោះទេ គឺមួយរយលុយខ្មែរក៏មិនអស់ដែរ ។ ម្ចាស់ហ្វេសប៊ុកនោះ លី ច័ន្ទសីហា អះអាងថា ជាមនុស្សប្រុសម្នាក់ធ្វើជាស្គាល់គេឯងពិសេសអ្នកសិល្បៈ និងតាំងខ្លួនជាលោកហេង ប៊ុនលាភ ។ ជនកំហូចនោះធ្វើជាខូចរថយន្តនៅកន្លែងនេះនៅកន្លែងនោះ ហើយខ្វះលុយក៏សូមខ្ចីសិន ជាក់ស្តែងគឺខ្ចីរូបនាងតែម្តង ។ តាមរយៈហ្វេសប៊ុក ជនបោកប្រាស់នោះប្រើពាក្យ «អូនសីហា បងប៊ុនលាភ ឥឡូវបងខូចឡានកុនលុយ ប្អូនអាចវេរលុយឱ្យចំនួន៣០០ដុល្លារសិនបានទេ ចាំដល់ផ្ទះវេរសងវិញតាមក្រោយ» ។
សីហានិយាយថា «ប្រាប់តាមត្រង់ទៅចុះរវាងខ្ញុំ និងលោកប៊ុនលាភ គឺស្គាល់គ្នាយូរឆ្នាំមកហើយ និងមិនដែលមានពាក្យពេចន៍អីហៅខ្ញុំអូនបងពេញមាត់នោះទេ ។ គាត់ធ្លាប់តែហៅខ្ញុំថាកូន ហើយខ្ញុំធ្លាប់ហៅគាត់ថា ប៉ាៗពេញមាត់ រឿងអីនិយាយប្លែកបែបនេះ ។ នៅទីបំផុតខ្ញុំកាត់យល់ថា នោះជាល្បិចមិនខាន ទើបនាងខ្ញុំប្រាប់ទៅតាមហ្វេសប៊ុកវិញថា កុំមកបោកអីធ្វើដូចគេមិនស្គាល់ប៊ុនលាភ ។ បន្ទាប់មកខ្ញុំលុបឈ្មោះនោះចេញពីហ្វេសប៊ុកចោលទៀតផង ។ មុនលុបចេញ ខ្ញុំព្រមានហេង ប៊ុនលាភ ក្លែងក្លែយនោះថា បើហ៊ានធ្វើបែបនេះទៀត នឹងចាត់ការតាមច្បាប់ ឱ្យគេតាមស្វែងរកតែម្តង ព្រោះខ្លាចធ្លាក់ទៅលើអ្នកដទៃទៀត» ។
លី ច័ន្ទសីហា ដែលកំពុងតែធ្វើជាបេក្ខនារីប្រកួតប្រជែងយកពានរង្វាន់អប្សរា២០១៤ បានអំពាវនាវដល់អ្នកនិយមលេងហ្វេសប៊ុកទាំងអស់គួរតែប្រើក្នុងផ្លូវត្រូវ ប្រកបដោយសុជីវធម៌ មិនត្រូវលេងដើម្បីបោកគេឯងនោះទេ ។ នាងសរសើរដែលប្រជាជនយើងចេះប្រើប្រព័ន្ធទំនើប ដែលអាចដឹងពីស្ថានភាពស្រុកទេស និងស្រុកគេតែគួរតែលេងក្នុងផ្លូវល្អ ៕
ចែករំលែកព័តមាននេះ