អេស្ប៉ាញត្រៀមទទួលអ្នកទោសនយោបាយគុយបា៩នាក់ទៀត
ដោយ ៖ ប្រុសកោះ
ថ្ងៃចន្ទ ទី១៩ ខែកក្កដា ឆ្នាំ២០១០ ម៉ោង ១៦:១៧
គេហទំព័របរទេស
អ្នកទោសនយោបាយគុយបាដែលទៅដល់ក្រុងម៉ាឌ្រីដ
យោងតាមរដ្ឋមន្ដ្រីការបរទេសអេស្ប៉ាញ លោកមីហ្គែល អានហ្សែល មូរ៉ាទីណូស ថា អ្នកទោសនយោបាយគុយបា៩នាក់ទៀត ដែលគុយបាដោះលែងនឹងមកដល់ទីក្រុងម៉ាឌ្រីដ តាមយន្ដហោះនាសបា្ដហ៍នេះ រួមជាមួយនឹងសាច់ញាតិរបស់ពួកគេ៥០នាក់ ។ រដ្ឋមន្ដ្រីការបរទេសអេស្ប៉ាញថ្លែងថា ពួកប្រឆាំងដែលទទួលការដោះលែងទាំងនេះត្រូវមកដល់អេស្ប៉ាញនាថ្ងៃទី២០ កក្កដា ដោយអ្នកនយោបាយគុយបាទទួលការដោះលែងដែរ១១នាក់មកដល់ទីនោះរួចហើយ។
អាជ្ញាធរគុយបាសន្យាដោះលែងអ្នកទោសនយោបាយ៥២នាក់ដែលជាប់ឃុំឃាំងចាប់តាំងពីឆ្នាំ២០០៣មកក្នុងក្របខណ្ឌនៃ កិច្ចព្រមព្រៀងមួយជាមួយរដ្ឋាភិបាលអេស្ប៉ាញ និងព្រវិហារកាតូលិក ។ លោកម៉ូ រ៉ាទីណូស បញ្ជាក់ថា រដ្ឋាភិបាលរបស់លោករង់ចាំមនុស្សជាច្រើនរយនាក់ចាកចេញពីគុយបាមកកាន់អេស្ប៉ាញ បន្ទាប់ពីកិច្ចព្រមព្រៀងមួយជាមួយរបបក្រុងឡាហាវ៉ាន ៕
