រាជធានីភ្នំពេញ ៖ តារាចម្រៀងដែលទើបហក់ចូលផលិតកម្មរស្មីហង្សមាស បន្ទាប់ពីសម្ងំច្រៀងអស់ជាច្រើនឆ្នាំឱ្យផលិតកម្មរ៉ុក នាងសួស វីហ្សា តាំងពីឡើងកូដច្រៀងឱ្យផលិតកម្មរស្មីហង្សមាសមក សង្កេតឃើញថា ទីផ្សារចម្រៀងរបស់តារាចម្រៀងរូបនេះហាក់មានការគាំទ្រខ្លាំងតែម្តង ដោយសារតែនាងមានទឹកដមសំឡេងច្រៀងពីរោះ និងធ្ងន់ល្អកម្ររក ។ ក្នុងភាពទទួលបាននូវការងារថ្មីៗក្នុង
រាជធានីភ្នំពេញ ៖ តារាចម្រៀងដែលទើបហក់ចូលផលិតកម្មរស្មីហង្សមាស បន្ទាប់ពីសម្ងំច្រៀងអស់ជាច្រើនឆ្នាំឱ្យផលិតកម្មរ៉ុក នាងសួស វីហ្សា តាំងពីឡើងកូដច្រៀងឱ្យផលិតកម្មរស្មីហង្សមាសមក សង្កេតឃើញថា ទីផ្សារចម្រៀងរបស់តារាចម្រៀងរូបនេះហាក់មានការគាំទ្រខ្លាំងតែម្តង ដោយសារតែនាងមានទឹកដមសំឡេងច្រៀងពីរោះ និងធ្ងន់ល្អកម្ររក ។ ក្នុងភាពទទួលបាននូវការងារថ្មីៗក្នុងអាជីពសិល្បៈ ដែលអាចថាជាជោគជ័យមួយនៃឆាកជីវិត វីហ្សា ក៏មិនភ្លេចរឿងគ្រាកម្សត់ កាលពីចូលសិល្បៈដំបូងៗឡើយ ពោលគឺនាងហែលឆ្លងជីវិតតស៊ូដូចអ្នកដទៃដែរ ទម្រាំឆ្លងដល់ថ្ងៃញញឹមរីកមុខដូចពេលនេះ ។
ក្រុមយុវវ័យដែលតែងតែឱ្យតម្លៃលើការសម្តែងរបស់នាងសួស វីហ្សា ដែលមានឈ្មោះពិតថា សួស ស្រីថុល ពួកគេសុទ្ធតែនិយាយថានាងជាតារាចម្រៀងដែលមានសំឡេងច្រៀងយា៉ងពីរោះរណ្តំចិត្ត ហើយកន្លងមកនាងធ្លាប់បានច្រៀងបទមនោសញ្ចេតនាឱ្យផលិតកម្មហង្សមាស គឺពិតជាត្រូវនឹងសំឡេងនាងណាស់ ស្តាប់ទៅជក់អារម្មណ៍បូកទាំងការបញ្ចេញកាយវិការយា៉ងស៊ីសង្វាក់ទៀតនោះ ។ ប្រសិនបើនាងងាកមកច្រៀងចម្រៀងបែបជំនាន់អ្នកស្រីរស់ សេរីសុទ្ធា វិញក៏ជក់ចិត្តមួយបែបដែរ ទើបគ្រាន់តែនាងហក់មកច្រៀងឱ្យផលិតកម្មហង្សមាស ក្រោយពីផលិតកម្មរ៉ុកបិទលែងដំណើរការ កេរ្តិ៍ឈ្មោះនាងក៏ស្ទុះទៅមុខយា៉ងលឿនស្ទើរតែមិននឹកស្មានដល់ ស្របពេលដែលបណ្តាបទចម្រៀងរបស់នាងនៅផលិតកម្មហង្សមាសជាទ្រនំថ្មីសុទ្ធតែមានសំឡេងគាំទ្រពីគ្រប់មជ្ឈដ្ឋានទាំងអស់ ។
ក្នុងជំនួបមួយកាលពីថ្ងៃទី២១ មករា ពេលកំពុងថតកម្មវិធី «ផ្កាយរះក្នុងសួន» ឱ្យអ្នកដឹកនាំកម្មវិធីលោកហ្វៃ សំអាង នៅស្ថានីយទូរទស្សន៍អប្សរា តារាចម្រៀងសាច់សខ្ចីរូបសម្រស់ស្រស់ស្អាតសំឡេងបានរូបនេះ បានប្រាប់អ្នកយកព័ត៌មានយើងថា តាំងពីនាងចូលច្រៀងប្រចាំផលិតកម្មរស្មីហង្សមាសមក នាងពិតជាទទួលបានការគាំទ្រពីសំណាក់មជ្ឈដ្ឋានមហាជនគ្រប់ទិសទី នៅពេលដែលបទចម្រៀងរបស់នាងចេញលក់ម្តងៗ។ នាងពិតជារីករាយបំផុតនៅពេលដែលផលិតកម្មរស្មីហង្សមាសសម្លឹងឃើញទេព្យកោសល្យរបស់នាង រហូតអាចចូលច្រៀងបានដូចបងៗអ្នកចម្រៀងនៅទីនោះដែរ ។
នាងពិតជារំភើបក្រោយពីដឹងថា ផលិតកម្មហង្សមាសទទួលយកនាងឱ្យច្រៀងហើយដឹងខ្លួនច្បាស់ថា ផលិតកម្មហង្សមាសច្បាស់ជាធ្វើឱ្យនាងលេចធ្លោ ព្រោះថាតារាជាសមាជិកនៅទីនោះម្នាក់ៗសុទ្ធតែខាងហង្សមាសចាត់ចែងឱ្យមានបទចម្រៀងរៀងៗខ្លួនឱ្យល្បីដូចគ្នា ។ ទាំងនេះហើយជាភាពកក់ក្តៅមួយសម្រាប់សមាជិកទាំងអស់ ស្របពេលដែលខាងក្រុមការងារសុទ្ធតែមានជំនាញគិតរកអ្វីប្លែកៗផងនោះ ទើបចេះតែទទួលបានភាពលេចធ្លោ ។ តារាចម្រៀងដែលមានប្រវត្តិធ្លាប់ហាត់សម្តែងជាសិស្សសាលាប្រចាំសាកលវិទ្យាល័យភូមិន្ទវិចិត្រសិល្បៈរូបនេះបន្តទៀតថា ដើម្បីចែករំលែកពីភាពតស៊ូ កាលពីនាងចូលសិល្បៈដំបូងនោះ គឺនាងធ្លាប់ជាសិស្សរៀននៅសាលាវិចិត្រសិល្បៈ បន្ទាប់មកក៏ផ្លាស់ទៅធ្វើការជាអ្នកសិល្បៈប្រចាំរាជធានីភ្នំពេញបានជាច្រើនខែ ហើយមានទម្រង់សិល្បៈជាច្រើនឱ្យតែបែបបុរាណៗមិនថាតែការច្រៀងយីកេ បាសាក់នោះទេគឺនាងអាចធ្វើបាន ។ ជាមួយនេះ ក៏ធ្លាប់រួមសម្តែងជាមួយបងៗជំនាន់មុនជាប្រចាំដែរ មុនឆ្លងដល់ក្លាយជាអ្នកចម្រៀងបែបសម័យយុវវ័យនេះ ។
អតីតសិល្បការិនីក្នុងក្រុមសម្តែងប្រចាំរាជធានីភ្នំពេញរូបនេះបន្តថា កាលពីនាងប្រឡងចម្រៀងនៅផលិតកម្មរ៉ុកគឺឆ្លងកាត់ការប្រកួតមិនតិចវគ្គទេ ទម្រាំបានជាប់ពីមួយវគ្គទៅមួយវគ្គនោះ ។ អ្វីដែលនាងចាំមិនភ្លេច ឱ្យតែពេលទៅច្រៀងប្រកួតម្តងៗគឺរកតែប្រាក់ទិញគ្រឿងតុបតែងខ្លួនមិនបានផង ហើយមានតែម៉ូតូចាស់មួយគ្រឿងជិះពីរនាក់ឪពុកទៅច្រៀងប្រកួតទាំងមិនសង្ឃឹមទេ ព្រោះតែអ្នកប្រកួតជំនាន់នាងសុទ្ធតែខ្លាំងៗមានសំឡេងពីរោះ សូម្បីតែវគ្គប្រកាសលទ្ធផលជាផ្លូវការក៏អត់សង្ឃឹមដែរ ។ អីុចឹងហើយ ទើបនាងចង់ឱ្យប្អូនៗជំនាន់ក្រោយត្រូវព្យាយាមបើស្រឡាញ់សិល្បៈត្រូវតស៊ូ ហើយបើជាអ្នកប្រឡងត្រូវឱ្យច្បាស់ខ្លួនឯង មិនត្រូវប្រកួតបែបលេងសើចឡើយ ពិសេសការគោរពពេលវេលាក៏ជាការសំខាន់ដែរព្រោះអ្នកសិល្បៈសំខាន់ណាស់ពេលម៉ោងហ្នឹង ដើម្បីកុំឱ្យស្ទះការងារ។រឿងមួយទៀត ពេលក្លាយជាតារាមានឈ្មោះល្បីហើយកាន់តែប្រយ័ត្នថែមទៀត មិនឆ្មើងឆ្មៃថាមានតែឯងនោះទេ ត្រូវចេះគោរពរាក់ទាក់ជាមួយអ្នកដទៃជាមួយទឹកមុខញញឹម បើទោះជាគេមិនស្គាល់ឬយើងមិនស្គាល់គេក៏ដោយ ព្រោះនេះក៏ជាសំឡេងគាំទ្រមួយដែរ ៕
ចែករំលែកព័តមាននេះ