វិរះ សុធី ជម្រះបញ្ជីជាមួយ ទឹម សាន ខណះ កាន់ សុវណ្ណ ចង់ស្គាល់ស្នៀតកែង ឯម វិចិត្រ នៅបាយ័ន
ដោយ ៖ឈិត គឹមឆុន
ថ្ងៃសុក្រ ទី៦ ខែសីហា ឆ្នាំ២០១០ ម៉ោង ១០:៣៤
រាជធានីភ្នំពេញ ៖ វិរៈ សុធី អ្នកប្រដាល់មកពីក្លឹបតេជរាជសីហ៍ ខេត្ដក្រចេះ បានណាត់ ជួបជាមួយទឹម សាន ក្លឹបអាស៊ីកីឡា ដើម្បីជំរះ បញ្ជីចាស់នៅលើសង្វៀនប្រដាល់ស្ថានីយ ទូរទស្សន៍បាយ័ន នារសៀលថ្ងៃសៅរ៍ ទី៧ សីហា ឆ្នាំ២០១០ ។ ទឹម សាន ជាអ្នកប្រដាល់ ចាស់វស្សាមួយរូប ដែលពីមុនមានឈ្មោះថា សិង្ហ កងសាន នៅក្លឹបសិង្ហកីឡា ។ បន្ទាប់ពីបាត់ មុខមួយរយៈ ពេលត្រឡប់មកវិញ គេបានប្ដូរ ឈ្មោះមកជា ទឹម សាន និងប្ដូរក្លឹបពីសិង្ហកីឡា មកអាស៊ីកីឡាវិញ ។ រីឯ វិរៈ សុធី ទោះបីមិន សូវមាននរណាស្គាល់ ប៉ុន្ដែគេក៏មិនធម្មតាដែរ តាមរយៈការបង្ហាញខ្លួនលើសង្វៀនទើបតែ២ ប្រកួតប៉ុណ្ណោះ វិរៈ សុធី បានធ្វើឱ្យទស្សនិកជន មានការចាប់អារម្មណ៍យ៉ាងខ្លាំង ។ ប្រកួតចុង ក្រោយកាលពីថ្ងៃទី១៧ កក្កដា កន្លងមកនេះ វិរៈ សុធី ត្រូវទឹម សាន វាយឱ្យមានរបួសនៅ លើចិញ្ចើមខាងឆ្វេង ហើយត្រូវគ្រូពេទ្យបញ្ឈប់ ត្រឹមទឹកទី១ ។
ទោះបីជាបែបណា ការប្រកួតនាពេលនោះ វិរៈ សុធី បានបង្ហាញនូវការមានប្រៀបលើទឹម សាន ដាច់តែម្ដង ប៉ុន្ដែដោយសារតែគេមាន របួសបែកធំពេក ទើបត្រូវបានគ្រូពេទ្យបញ្ឈប់ ធ្វើឱ្យ ទឹម សាន ក្លាយជាអ្នកឈ្នះ ។ ពេល នោះប្រសិនបើ សុធី មិនមានរបួសទេ គេជឿ ថា ទឹម សាន នឹងត្រូវសន្លប់ក្នុងទឹកទី៣ទៅ*ហើយ ។ បើកុំតែគ្រូពេទ្យបញ្ឈប់ការប្រកួត សុធី នឹងមិនធ្វើឱ្យអ្នកគាំទ្ររូបគេអស់សង្ឃឹម ឡើយ។
ឯម វិចិត្រ មកពីក្លឹបគ្រុឌមានជ័យ ត្រូវបាន ផ្គូផ្គងឱ្យជួបប្រកួតជាមួយកាន់ សុវណ្ណ មកពី ក្លឹបយុវកីឡាខេត្ដកណ្ដាល (អតីតក្លឹបតាខ្មៅ មានឫទ្ធិ ខេត្ដកណ្ដាល) ។ វិចិត្រ មានស្នៀត ជង្គង់ និងកែងល្អ គេជាងជើងខ្លាំងមួយរូបក្នុង ប្រភេទទំងន់៦៣,៥០គីឡូក្រាម ដែលមិនងាយ បំបាក់បានដោយងាយទេ ។ រីឯ កាន់ សុវណ្ណ ក៏មិនធម្មតាដែរ គេមានស្នៀតកណ្ដាប់ដៃល្អ តែ ទន់ជ្រាយបន្ដិច ។ អ្នកប្រដាល់រូបនេះ មិនសូវ ចេះស៊ូទ្រាំនឹងការឈឺចាប់ប៉ុន្មានឡើយ នៅពេល គូប្រកួតវាយត្រូវល្មមៗ គឺគេត្រូវសន្លប់ និងសុំ ចុះចាញ់ភ្លាម ។ ពេលនេះ កាន់ សុវណ្ណ ក៏មិន ស្រណុកចិត្ដប៉ុន្មានដែរ ខណៈពេលដែលត្រូវប៉ះ ជាមួយឯម វិចិត្រ ។
ព្រែក បូរិន មកពីក្លឹបនិរោធមានជ័យ ត្រូវ ប្រកួតជាមួយ ជ័យ សំរិទ្ធ មកពីក្លឹបវីអាយភី ចំការមន ។ កាលពីថ្ងៃទី១១ កក្កដា កន្លងមក ព្រែក បូរិន បានចូលរួមប្រកួតក្នុងព្រឹត្ដិការណ៍ អន្ដរជាតិនៅសង្វៀនទូរទស្សន៍បាយ័ននេះ ប៉ុន្ដែ ក្នុងចំណោមការប្រកួតជាលក្ខណៈអន្ដរជាតិ ទាំង៦គូ រាប់ទាំងកីឡាការិនីមួយគូផងដែរ គឺ មានតែព្រែក បូរិន ម្នាក់ប៉ុណ្ណោះ ដែលប្រកួត ចាញ់ អ្រធែៅឌ្រីណែ មកពីប្រទេសបារាំង ក្រៅពីនេះកីឡាករកម្ពុជា បានយកឈ្នះកីឡា ករបរទេសទាំងអស់។ ទោះបីជាបែបនេះក៏ ដោយ ក៏ទស្សនិកជនមួយចំនួននៅតែមានជំនឿ ថា ជ័យ សំរិទ្ធ ទំនងជាមិនអាចយកឈ្នះ បូរិន បានដែរ ។
នៅមានកីឡាករស្រករក្រោយច្រើនគូទៀត ដែលការប្រកួតរបស់គេមិនចាញ់ស៊េរីចាស់នោះ ទេ គឺមាននួន សារិកា មកពីក្លឹបអេភូថងកីឡា ត្រូវប្រកួតជាមួយឡុង សុខជា មកពី ក្លឹបគជ សារកីឡា ។ អ៊ុល រ៉ាវី មកពីក្លឹបកងពលតូច លេខ៣១ ត្រូវប្រកួតជាមួយឈិន សោភ័ណ្ឌ មកពីក្លឹបអប់រំកាយស្រុកអន្លង់វែង។ រីឯគង់ កីឡា មកពីក្លឹបកងរថក្រោះត្រូវប្រកួតជាមួយ យ៉ាម វ៉ិត មកពីក្លឹបរស្មីកុមារកំព្រា៕
