គ.ជ.ប ប្រកាសថា មានពលរដ្ឋជាង៣១ម៉ឺននាក់មិនទាន់ចុះឈ្មោះបោះឆ្នោត
ដោយ ៖ អប្សរា
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១៦:២៣
ស.សុខុម
លោកអ៊ឹម សួស្តី ប្រធាន គ.ជ.ប បានមានប្រសាសន៍នៅក្នុងសន្និសីទកាសែត
រាជធានីភ្នំពេញ ៖ មន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃទី៩ កញ្ញា ឆ្នាំ២០១០ បានធ្វើការអំពាវនាវឱ្យពលរដ្ឋដែលមិនទាន់ចុះឈ្មោះបោះឆ្នោតត្រូវទៅចុះឈ្មោះ និងអ្នកមានឈ្មោះបោះឆ្នោតរួចហើយ កាលពីពេលបោះឆ្នោតកន្លងទៅ ត្រូវទៅពិនិត្យឈ្មោះនៅតាមឃុំ-សង្កាត់ ដែលខ្លួនរស់នៅ ។ គ.ជ.ប បានបង្ហាញថា ពលរដ្ឋដែលមិនទាន់បានចុះឈ្មោះបោះឆ្នោតមានរហូតដល់ទៅជាង៣១ម៉ឺននាក់ ខណៈអ្នកមានឈ្មោះចំនួន២៣.១២៧នាក់ នឹងត្រូវបានដកសិទ្ធិបោះឆ្នោត ។
លោកអ៊ឹម សួស្តី ប្រធាន គ.ជ.ប បានមានប្រសាសន៍នៅក្នុងសន្និសីទកាសែតកាលពីម្សិលមិញថា ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១០ ចាប់ផ្តើមពីថ្ងៃទី១ តុលា ដល់ថ្ងៃទី ៣១ ធ្នូ ឆ្នាំ២០១០ ។ ប្រជាពលរដ្ឋខ្មែរទាំងពីរភេទដែលមានអាយុ១៨ឆ្នាំឡើងទៅគិតដល់ថ្ងៃទី៣១ ធ្នូ ឆ្នាំ២០១០ ដែលមិនទាន់ចុះឈ្មោះបោះឆ្នោត ឬបានផ្លាស់ប្តូរទីលំនៅមានសិទ្ធិសុំចុះឈ្មោះបោះឆ្នោតក្នុងការិយាល័យណាមួយក្នុងឃុំ-សង្កាត់ដែលខ្លួនកំពុងរស់នៅ ។
យោងតាមតារាងស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មានសំរាប់បំរើការពិនិត្យបញ្ជីឈ្មោះ និងចុះឈ្មោះបោះឆ្នោតដែលផ្សព្វផ្សាយដោយ គ.ជ.ប បានឱ្យដឹងថា ប្រជាពលរដ្ឋដែលមិនទាន់ចុះឈ្មោះបោះឆ្នោតមានចំនួនប្រមាណ៣១៩.១៩៣នាក់ ប្រជាពលរដ្ឋដែលបានផ្លាស់ប្តូរទីលំនៅមានប្រមាណ៥៤.២១២នាក់ ត្រូវបានដកសិទ្ធិ និងមានឈ្មោះស្ទួន និង២៦.៧៨៥នាក់ បានស្លាប់ ។ គ.ជ.ប បានឱ្យដឹងទៀតថា គ.ជ.ប បានប្រកាសផងដែរដល់តំណាងអង្គការសង្គមស៊ីវិល និងខាងគណបក្សនយោបាយដែលមានចំណងចូលរួមពិនិត្យដំណើរការពិនិត្យចុះឈ្មោះបោះឆ្នោតនៅតាមឃុំ-សង្កាត់នៅទូទាំងប្រទេស ត្រូវដាក់ពាក្យសុំតាមប្រតិទិននៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១០ ដែលចេញផ្សាយដោយគ.ជ.ប ។
ទោះបីជាយ៉ាងណា គ.ជ.ប បានលើកឡើងផងដែរអំពីការផ្ទេរសមត្ថកិច្ចទៅដល់ថ្នាក់ក្រោមសំរាប់ការត្រួតពិនិត្យរាល់ដំណើរការប្រព្រឹត្តទៅនៃការចុះឈ្មោះអ្នកបោះឆ្នោត ការពិនិត្យឈ្មោះអ្នកបោះឆ្នោតនៅតាមឃុំ-សង្កាត់នានាទូទាំងប្រទេស ដែលមានក្រុមប្រឹក្សាឃុំ-សង្កាត់ និងមន្ត្រីមូលដ្ឋានផងដែរ ។ គ.ជ.ប ក៏បានបញ្ជាក់ផងដែរថា ពលរដ្ឋទាំងអស់ដែលមានសិទ្ធិបោះឆ្នោតត្រូវចូលរួមទាំងអស់គ្នាក្នុងការចុះឈ្មោះ និងទៅពិនិត្យបញ្ជីឈ្មោះនៅតាមឃុំ-សង្កាត់តាមការកំណត់របស់ គ.ជ.ប ៕
