បុគ្គលិកកាស៊ីណូរ៉ូយ៉ាល់១៥នាក់តវ៉ាថៅកែមិនបើកប្រាក់ខែឱ្យ
ដោយ ៖ អប្សរា
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ១៥:១៥
ចាន់ថេត
បុគ្គលិកកាស៊ីណូរ៉ូយ៉ាល់១៥នាក់តវ៉ាថៅកែមិនបើកប្រាក់ខែឱ្យ
ខេត្តកំពង់ចាម ៖ បុគ្គលិកកាស៊ីណូរ៉ូយ៉ាល់ត្រពាំងផ្លុង ស្រុកពញាក្រែក ចំនួន១៥នាក់ត្រូវបានថៅកែរបស់ខ្លួនបញ្ឈប់ពីការងារដោយគ្មានមូលហេតុ ហើយកំពុងនាំគ្នាធ្វើការតវ៉ាទាមទារបើកប្រាក់ខែនាព្រឹកថ្ងៃទី៦ កញ្ញា ២០១០ នៅមុខកាស៊ីណូ ។ មិនឃើញមានស្ថាប័នណាមួយមកអន្តរាគមន៍ដោះស្រាយឡើយ ។ តាមបុគ្គលិកមួយរូបឈ្មោះកង ថន ភេទប្រុស អាយុ២៥ឆ្នាំ មកពីក្រុងព្រះសីហនុបានចូលមកបំរើការងារនៅកាស៊ីណូរ៉ូយ៉ាល់នេះទើបតែបានរយៈពេល២ខែប៉ុណ្ណោះ ហើយប្រាក់ខែទទួលបានក្នុង១ខែចំនួន៨០ដុល្លារ ។ បុគ្គលិកដែលថៅកែត្រូវបញ្ឈប់រូបនេះបានរៀបរាប់ថា កាលពីថ្ងៃទី៥ កញ្ញា មានបុគ្គលិកប្រុស ស្រីចំនួន១៥នាក់ត្រូវបានបញ្ឈប់ ពីការងារដោយចោទប្រកាន់មានគំនិតកេងប្រវ័ញ្ច ការដែលក្រុមហ៊ុនលើកឡើងនេះពុំសមហេតុផលទាល់តែសោះ ។ ជនបរទេសឈ្មោះប្លូ ភាឡៃ (ឥណ្ឌូណេស៊ី) ដែលជាអ្នកបញ្ឈប់ពួកគេ ហើយមិនព្រមបើកប្រាក់ខែសំរាប់ខែសីហាដល់ពួកគេ។
បុគ្គលិកឈ្មោះពេជ្រ សាវរី ភេទស្រី មកពីខេត្តបាត់ដំបងបានប្រាប់ថា នាងបានចូលមកបំរើការងារនៅកាស៊ីណូរ៉ូយ៉ាល់ត្រពាំងផ្លុងនេះរយៈពេល៨ខែហើយ ចំពោះប្រាក់ខែទទួលបានចំនួន១៥០ដុល្លារក្នុង១ខែ (ផ្នែកហ្គេមមីង) ពុំដែលមានបញ្ហាទេកាលពីមុនមក ។ ស្រាប់តែនៅថ្ងៃទី៥ កញ្ញា ២០១០ ថៅកែបានបញ្ឈប់នាងព្រមទាំងពួកនាង១៤នាក់ទៀតដោយចោទប្រកាន់មានបំណងកេងប្រវ័ញ្ចមកលើក្រុមហ៊ុន ព្រមទាំងមិនបើកប្រាក់ខែសំរាប់ខែសីហាឱ្យទៀត ។ ទោះជាយ៉ាងណាក្តីពួកនាងរួម និងបុគ្គលិកផ្សេងទៀតនាំគ្នាចេញមកតវ៉ាដោយឈរត្រៀបត្រានៅពីមុខកាស៊ីណូរ៉ូយ៉ាល់ទទូចឱ្យថៅកែក្រុមហ៊ុនបើកលុយឱ្យបានគ្រប់គ្នានាព្រឹកថ្ងៃទី៦ កញ្ញា ។ នៅម៉ោង១១ដល់ម៉ោង១២ថ្ងៃត្រង់ភាគីខាងកាស៊ីណូនឹងធ្វើការដោះស្រាយជូន ហើយប្រាក់ខែត្រូវបានពន្យាពេលរហូតដល់ទៅថ្ងៃទី១៥ កញ្ញា ទើបបើកឱ្យទាំងអស់គ្នា ។ ក្នុងពេលធ្វើការតវ៉ានាព្រឹកថ្ងៃទី៦ កញ្ញា មិនឃើញមានស្ថាប័នណាមួយចេញមកអន្តរាគមន៍ដល់ពួកគេទេ ។
លោកវរសេនីយ៍ត្រី ប្រាក់ ប៊ុនណុន អធិការនគរបាលស្រុកពញាក្រែកបានប្រាប់តាមទូរស័ព្ទថា ថៅកែកាស៊ីណូរ៉ូយ៉ាល់មិនព្រមបើកប្រាក់ខែឱ្យបុគ្គលិករបស់ខ្លួន ដោយខ្លាចមានអំពើហិង្សាណាមួយកើតឡើងចេញពីបាតុករផងនោះ ទើបនាំកំលាំងនគរបាលទៅការពារសន្តិសុខនៅមុខកាស៊ីណូ ។ លោកធូ ចាន់ថា អនុប្រធានរដ្ឋបាលកាស៊ីណូរ៉ូយ៉ាល់បានប្រាប់តាមទូរស័ព្ទថា បុគ្គលិកទាំងអស់បំរើការងារនៅក្នុងកាស៊ីណូនេះសរុបទាំងអស់ចំនួនប្រមាណ២៩០នាក់ ។ តាមការណែនាំរបស់ក្រុមហ៊ុនឱ្យចាត់ចែងរៀបចំប្រាក់ខែបើកឱ្យបុគ្គលិកចំនួន១៥នាក់ដែលត្រូវបញ្ឈប់នោះរួចហើយនារសៀលថ្ងៃទី៦ កញ្ញា ។ ចំពោះបុគ្គលិកឯទៀតមិនទាន់បើកឱ្យទេដោយឱ្យធ្វើការសុំទោសជាមុន ហើយបុគ្គលិកដែលត្រូវបញ្ឈប់ទាំងនេះមិនទទួលឱ្យចូលបំរើការងារវិញទេ ព្រោះមានកំហុសជាច្រើន ។ បុគ្គលិកកាស៊ីណូរ៉ូយ៉ាល់បានត្អូញត្អែរ ពីរឿងប្រាក់ខែតែងតែបើកយឺតយ៉ាវជាងកន្លែងផ្សេងទៀត ហើយសំណូមពរមេត្តាបើកឱ្យយ៉ាងយូរត្រឹមថ្ងៃទី៥ចូលខែថ្មី ៕
