ខេត្តកំពង់ស្ពឺ ៖ បុរសម្នាក់ ត្រូវជនស្គាល់មុខមួយក្រុមសម្លា.ប់កា.ប់ដាច់ក្បាលចេញពីដងខ្លួន ដោយសង្ស័យថាជនរងគ្រោះចេះអំពើអាបធ្មប់ធ្វើអំពើដាក់គេឯង នៅក្នុងភូមិ ឱ្យស្លា.ប់នាពេលកន្លងមក ។ នេះជាជំនឿប្រតិកិរិយាមួយ ដែលតែងកើតមានការយល់ខុសបែបអគតិ ។
ខេត្តកំពង់ស្ពឺ ៖ បុរសម្នាក់ ត្រូវជនស្គាល់មុខមួយក្រុមសម្លាប់កាប់ដាច់ក្បាលចេញពីដងខ្លួន ដោយសង្ស័យថាជនរងគ្រោះចេះអំពើអាបធ្មប់ធ្វើអំពើដាក់គេឯង នៅក្នុងភូមិ ឱ្យស្លាប់នាពេលកន្លងមក ។ នេះជាជំនឿប្រតិកិរិយាមួយ ដែលតែងកើតមានការយល់ខុសបែបអគតិ ។
ករណីសម្លាប់កាត់ក្បាលនេះ ត្រូវបានគេដឹងនៅវេលាម៉ោង៩និង៣០នាទីព្រឹក ថ្ងៃទី១៩ មករា នៅភូមិបឹងស្តុក ឃុំបរសេដ្ឋ ស្រុក បរសេដ្ឋ ។ ជនរងគ្រោះឈ្មោះ ខៀវ ប៉ន អាយុ៥៥ឆ្នាំ មានទីលំនៅភូមិត្រពាំងឈូក ឃុំបរសេដ្ឋ ស្រុកបរសេដ្ឋ ។
ប្រភពពីអ្នកភូមិបានឱ្យដឹងថា កាលពីយប់ថ្ងៃទី១៨ មករា នៅក្នុងភូមិមានពិធីបុណ្យដារលាន ហើយជនរងគ្រោះក៏ទៅចូលរួមនឹងគេ ដែរ ។ នៅយប់នោះ ជនរងគ្រោះត្រូវមនុស្សមួយក្រុមល្បួងទៅផឹកស្រានៅក្បែរកន្លែងប្រារព្ធពិធីបុណ្យ ហើយក៏បាត់រហូត មិនឃើញត្រឡប់មកវិញដោយម្នាក់ៗនឹកស្មានថា ជនរងគ្រោះត្រឡប់ទៅផ្ទះបាត់ទៅហើយ ។
ប្រភពពីនគរបាលស្រុកបរសេដ្ឋ បានឱ្យដឹងថា នៅវេលាម៉ោង៣និង៣០នាទីព្រឹក ថ្ងៃទី១៩មករា អ្នកភូមិម្នាក់ឈ្មោះ សាង ភេទប្រុស អាយុ២៥ឆ្នាំ ដើររកកណ្តៀរក៏ប្រទះឃើញសពអត់ក្បាលមួយ ក៏រត់ទៅរាយការណ៍ឱ្យសមត្ថកិច្ចចុះមកពិនិត្យដល់កន្លែងកើតហេតុ ទើបដឹងច្បាស់ថាជនរងគ្រោះឈ្មោះ ខៀវ ប៉ន ដែលត្រូវក្រុមជនសង្ស័យសម្លាប់រួចកាត់ក្បាលយកទៅបាត់កាលពីយប់ ។
ប្រភពបន្តថា ជនរងគ្រោះអាចត្រូវក្រុមជនដៃដល់សម្លាប់នៅចន្លោះពីម៉ោង១០ទៅម៉ោង១១យប់ ថ្ងៃទី១៨ មករា ។ តាមការពិនិត្យនៅកន្លែងកើតហេតុបង្ហាញថា ជនរងគ្រោះត្រូវសម្លាប់នៅក្បែរកន្លែងប្រារព្ធពិធីបុណ្យ ហើយក្រុមជនដៃដល់យកខ្សែនីឡុងពណ៌ខ្មៅចងដៃ និងជើងស្តាំអូសយកទៅបោះចោលនៅក្នុងស្រែ ដែលមានចម្ងាយប្រមាណ៦០០ម៉ែត្រពីកន្លែងបុណ្យ ។
មានការលើកឡើងថា ជនរងគ្រោះកាលនៅរស់ចេះមន្តអាគមធ្វើអំពើអាបធ្មប់ បណ្តាលឱ្យអ្នកភូមិមួយចំនួនមានជំងឺ និងស្លាប់នាពេលកន្លងមក ព្រមទាំងធ្វើឱ្យមនុស្សមួយចំនួនមានការខឹងសម្បាចងគំនុំ រហូតឈានដល់ការសម្លាប់កាត់ក្បាលបែបនេះ ។ បើទោះជាមានការលើកឡើងបែបនេះក្តី ក៏តា ខៀវ វឿន អាយុ៦៧ឆ្នាំ ដែលត្រូវជាបងប្រុសបង្កើតរបស់ជនរងគ្រោះអះអាងប្រាប់អ្នកយកព័ត៌មានថា ប្អូនប្រុសគាត់មិនចេះអំពើអាបធ្មប់អ្វីទេ ។ នៅពេលនេះទាំងសាច់ញាតិក៏ដូចសមត្ថកិច្ច បាននាំគ្នាដើរស្វែងរកក្បាលសព តែនៅរកមិនទាន់ឃើញនៅឡើយ ។ ក្រោយពីពិនិត្យសពហើយ សមត្ថកិច្ចបានប្រគល់ឱ្យសាច់ញាតិទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ