រាជធានីភ្នំពេញ ៖ ប្រភពផ្លូវការពីមន្ត្រីទូរទស្សន៍ប៉ុស្ដិ៍លេខ៥ និងគណៈកម្មការដឹកនាំកីឡាករប្រដាល់មកពីប្រទេសថៃបានអះអាងថាកីឡាករប្រដាល់សាកលពិភពលោករបស់ថៃប្រាវីដ នឹងមិនវ៉ៃជាមួយកីឡាករវង្ស ណយ ជាថ្មីទៀតឡើយ បើទោះជាក្នុងពេលប៉ះគ្នាលើកមុនគេបានផ្ដួលកីឡាករវង្ស ណយឱ្យសន្លប់ក្នុងទឹកទី៤ក្ដី ។
រាជធានីភ្នំពេញ ៖ ប្រភពផ្លូវការពីមន្ត្រីទូរទស្សន៍ប៉ុស្ដិ៍លេខ៥ និងគណៈកម្មការដឹកនាំកីឡាករប្រដាល់មកពីប្រទេសថៃបានអះអាងថាកីឡាករប្រដាល់សាកលពិភពលោករបស់ថៃប្រាវីដ នឹងមិនវ៉ៃជាមួយកីឡាករវង្ស ណយ ជាថ្មីទៀតឡើយ បើទោះជាក្នុងពេលប៉ះគ្នាលើកមុនគេបានផ្ដួលកីឡាករវង្ស ណយឱ្យសន្លប់ក្នុងទឹកទី៤ក្ដី ។ ការប្រកាសនេះដើម្បីឆ្លើយតបនឹងការចោទសួរកាន់តែច្រើនពីសំណាក់មហាជនដែលងឿងឆ្ងល់ថា ហេតុអ្វីវង្ស ណយ មិនត្រូវប៉ុស្ដិ៍លេខ៥ កំណត់ឱ្យសងសឹកកីឡាករជើងខ្លាំងរបស់ថៃប្រាវីដ ។
លោក សេង កដិកា អគ្គនាយករងស្ថានីយទូរទស្សន៍ប៉ុស្ដិ៍លេខ៥ និងជាអ្នករៀបចំកីឡាប្រដាល់ប្រចាំស្ថាប័នមួយនេះបានប្រាប់ភ្នាក់ងារកោះសន្តិភាពឲ្យដឹងថា ការទទូចចង់បានរបស់មហាជនដែលចង់ឲ្យជើងខ្លាំងវង្ស ណយ របស់ប្រទេសកម្ពុជាប៉ះគ្នាសងសឹកជាមួយកីឡាករប្រដាល់សាកលលំដាប់ពិភពលោករបស់ថៃ ប្រាវីដនឹងមិនអាចកើតឡើងបានឡើយដោយសារតែកីឡាករប្រាវីដបានបញ្ជាក់ពីការតាំងចិត្តដោយកម្រថាមិនវាយជាមួយវង្ស ណយ ម្ដងទៀតទេ ។ វាពិតជារឿងភ្ញាក់ផ្អើលមួយដែលកីឡាករប្រាវីដសម្រេចមិនឡើងរេញជាមួយវង្ស ណយ ដោយសូម្បីតែក្នុងជំនួបលើកទី១កីឡាករប្រាវីដ បានផ្ដួលកីឡាករវង្ស ណយ ឱ្យសន្លប់ក្នុងទឹកទី៤ យ៉ាងគួរឲ្យភ្ញាក់ផ្អើលក្ដី ។ ការប្រកួតកាលនោះក្រុមអ្នកទស្សនាខ្លះបានទាំងចោទថា វង្ស ណយ លក់ខ្លួនទៀតផង បើទោះជាក្រោយមកគេបានរកឃើញថា ការសន្លប់របស់វង្ស ណយ គឺពិតជារងនឹងកណ្ដាប់ដៃម៉ាត់យ៉ាងពេញទំហឹងរបស់កីឡាករប្រាវីដ ដែលជាជើងខ្លាំងផ្នែកប្រដាល់សាកលលំដាប់ពិភពលោករបស់ថៃប្រាកដមែន ពេលចាក់រូបភាពសាឡើងវិញ ។ លោកសេង កដិកា មានប្រសាសន៍ថា វេទិកាប្រដាល់អន្តរជាតិប៉ុស្ដិ៍លេខ៥ បានទាមទារច្រើនលើកច្រើនសារួចហើយតាំងពីការប្រកួតរវាងវង្ស ណយ និងប្រាវីដ កើតឡើងភ្លាមៗដើម្បីឲ្យកីឡាករទាំងពីរប៉ះគ្នាម្ដងទៀត ប៉ុន្តែកីឡាករប្រាវីដ បានប្រកាសដោយចំហតបវិញថា បើមកកម្ពុជាគេនឹងវ៉ៃជាមួយកីឡាករកម្ពុជាទាំងអស់លើកលែងតែវង្ស ណយ ម្នាក់ ។
គួរបញ្ជាក់ថា កីឡាករប្រាវីដ ជាកីឡាករដែលល្បី និងមានតម្លៃខ្លួនខ្ពស់បំផុតនៅក្នុងប្រទេសថៃ ពិសេសចាប់តាំងពីគេបានក្លាយជាកីឡាករប្រដាល់សាកលរបស់ពិភពលោក ដែលរមែងមានមុខប្រកួតនៅក្នុងព្រឹត្តិការណ៍ប្រដាល់របស់កីឡាករល្បីៗលើលោក ។ ជាក់ស្ដែងក្នុងព្រឹត្តិការណ៍ប្រដាល់របស់កីឡាករលំដាប់ពិភពលោកមេនីប៉ាក់គីអាវ កាលពីពេលថ្មីៗប្រាវីដ ក៏បង្ហាញខ្លួនឡើងប្រកួតជាកីឡាករបើកឆាកនៅក្នុងព្រឹត្តិការណ៍នោះដែរ ។ នៅក្នុងប្រទេសថៃ ប្រាវីដមិនប្រកួតប្រដាល់សេរីនោះទេ ដោយសារតែគេជាកីឡាករលំដាប់ពិភពលោកផ្នែកប្រដាល់សាកល ប៉ុន្តែគេអាចឡើងចុះបរទេសដើម្បីប្រកួតសេរីបានក្នុងលក្ខខណ្ឌដើម្បីរំលឹកក្បាច់គុនផ្នែកប្រដាល់សេរី ដែលគេមិនចង់ភ្លេច។ អ៊ីចឹងហើយ ទើបព្រឹត្តិការណ៍ដែលប្រាវីដមកប្រកួតនៅក្នុងប្រទេសកម្ពុជា គឺមិនមែនត្រឹមតែមហាជនអ្នកស្នេហាវិស័យកីឡានៅក្នុងប្រទេសកម្ពុជាប៉ុណ្ណោះទេសម្ដែងការចាប់អារម្មណ៍ ពោលគឺសូម្បីតែនៅក្នុងប្រទេសថៃ និងបណ្ដាប្រទេសដែលស្គាល់កីឡាករប្រាវីដ ក៏សម្ដែងការចាប់អារម្មណ៍ដូចគ្នា ។
កីឡាករប្រាវីដ ឡើងចុះប្រកួតស្រុកខ្មែរច្រើនលើករួចមកហើយតាមរយៈការអញ្ជើញរបស់ស្ថានីយទូរទស្សន៍ប៉ុស្ដិ៍លេខ៥ដែលមានកិច្ចសហប្រតិបត្តិការជាមួយគ្រូបង្វឹកដោយផ្ទាល់របស់កីឡាកររូបនេះ ។ ចំណែកប៉ុស្ដិ៍ផ្សេងគេកម្រឃើញកីឡាករប្រាវីដ ទទួលប្រកួតណាស់ ដែលអាចមកពីគេមិនមានទំនាក់ទំនងកាលពីមុន ឬមិនហ៊ាននឹងតម្លៃខ្លួនដ៏ខ្ពស់របស់គេ ។ ក្នុងប្រវត្តិនៃការប៉ះគ្នាជាមួយកីឡាករកម្ពុជាកន្លងមក ប្រាវីដ បំបាក់កីឡាករកម្ពុជាបានជាច្រើនបូករួមទាំងលាង ស៊ីពេជ្រ និងវង្ស ណយ ជាដើមពោលគឺគេចាញ់តែក្រោមដៃរបស់កីឡាករពេជ្រ សីហា ម្នាក់គត់ទាំងពីរលើកក្នុងពេលប៉ះគ្នា ។ ប៉ុន្តែប្រាវីដ បែរជាបញ្ជាក់ថា ទោះប៉ះពេជ្រ សីហា ប៉ុន្មានដងទៀតក៏មិនខ្លាចនោះដែរលើកលែងតែវង្ស ណយ ម្នាក់ ។
មន្ត្រីដឹកនាំកីឡាករមកពីប្រទេសថៃឲ្យប៉ុស្ដិ៍លេខ៥ថ្លែងថា វង្ស ណយ មិនដឹងថា មាន ចំណុចសំខាន់ត្រង់ណាដែលធ្វើឲ្យប្រាវីដខ្លាចរអារនោះទេ ទើបប្រាវីដដាក់ការច្រានចោលជាប្រចាំនៅពេលទទូចឲ្យរូបគេប៉ះវង្ស ណយ ម្ដងទៀត ។ ប្រសិនបើខ្លាចចាញ់គេគួរតែខ្លាចពេជ្រ សីហា មិនគួរជាវង្ស ណយ ទេដោយសារតែគេធ្លាប់ផ្ដួលឲ្យសន្លប់រួចទៅហើយ ។ តាមរយៈការប្រកាសនេះទើបគេដឹងភ្លាមៗថា ជ័យជម្នះរបស់គេធ្វើឲ្យវង្ស ណយ សន្លប់កាលពីលើកមុន ប្រហែលជារឿងចៃដន្យច្រើនជាងបច្ចេកទេស ទើបធ្វើឲ្យគេមិនហ៊ានប៉ះវង្ស ណយ ម្ដងទៀត ព្រោះតែគេខ្លាចចាញ់វង្ស ណយ ម្នាក់ទៀត ដែលនាំទៅដល់ការបង្កើនចំនួនអ្នកឈ្នះបន្ថែមពីលើពេជ្រ សីហា ម្នាក់ទៀតនៅសង្វៀនកម្ពុជា ៕
ចែករំលែកព័តមាននេះ