កូរ៉េខាងជើងគំរាមរឹបអូសយកអចលនទ្រព្យកូរ៉េខាងត្បូង
ដោយ ៖ អប្សរា
ថ្ងៃសៅរ៏ ទី២០ ខែមីនា ឆ្នាំ២០១០ ម៉ោង ១៩:០៦
គេហទំព័របរទេស
.
ប្រទេសកូរ៉េខាងជើងបានគំរាមកាលពីថ្ងៃទី១៨ មីនា រឹបអូសយករាល់ទ្រព្យសម្បត្ដិអចលនទ្រព្យរបស់កូរ៉េខាងត្បូង ស្ថិតនៅជើងភ្នំគូមហ្គាង ជាប់ឆ្នេរសមុទ្រភាគខាងកើតរបស់ប្រទេសកុម្មុយនីស្ដនេះ។ កាយវិការនេះបង្ហាញពីការមិនសប្បាយចិត្ដកាន់តែខ្លាំងរបស់ក្រុងព្យុងយ៉ាងចំពោះការបដិសេធរបស់ក្រុងសេអ៊ូល មិនអនុញាតឱ្យពលរដ្ឋខ្លួនធ្វើដំណើរទៅកាន់កូរ៉េខាងជើង។ កូរ៉េខាងជើងក៏គូសបញ្ជាក់ផងដែរថា ខ្លួននឹងស្វែងរកដៃគូពាណិជ្ជកម្មថ្មីប្រសិនបើក្រុងសេអ៊ូលបដិសេធសំណើដំណើរការទេសចរណ៍ឡើងវិញ ក្នុងខែមេសាខាងមុខនេះ ។
ក្នុងសារតាមហ្វាក់ផ្ញើឱ្យក្រសួងបង្រួបបង្រួមកូរ៉េខាងត្បូង និងក្រុមហ៊ុន HYUNDAI ASAN CORPERATION ជាអ្នករៀបចំការធ្វើដំណើរទៅកូរ៉េខាងជើង គណៈកម្មាធិការសន្ដិភាពអាស៊ី-ប៉ាស៊ីហ្វិក ជាអង្គការរដ្ឋមួយទទួលបន្ទុកខាងការផ្លាស់ប្ដូរឆ្លងកាត់ព្រំដែនថ្លែងថា ខ្លួននឹងចាប់ផ្ដើមធ្វើការត្រួតពិនិត្យលើរាល់អចលនទ្រព្យ ដែលស្ថិតនៅខាងក្នុងតំបន់ទេសចរណ៍នៃភ្នំគូមហ្គាង នាថ្ងៃទី២៥ មីនា។ គណៈកម្មាធិការនេះស្នើដល់បណ្ដាម្ចាស់កម្មសិទ្ធិអចលនទ្រព្យ និងបណ្ដាអ្នកទទួលខុសត្រូវខាងការនាំភ្ញៀវទេសចរទៅកាន់ភ្នំគូមហ្គាង ឱ្យទៅកាន់ទីនោះនាថ្ងៃទី២៥ មីនា ដោយបន្ដថា រាល់ម្ចាស់ទ្រព្យសម្បត្ដិទាំងនេះដែលមិនគោរពកាលបរិច្ឆេទកំណត់ នោះទ្រព្យសម្បត្ដិរបស់ពួកគេនឹងត្រូវរឹបអូសយក និងថាគំរោងទេសចរណ៍ទាំងឡាយក៏នឹងត្រូវលុបចោលដែរ។
សហគ្រាសកូរ៉េខាងត្បូងជាច្រើន ជាម្ចាស់កម្មសិទ្ធិនៃផ្ទៃដី និងអគារនានាដែលមានតម្លៃសរុប៣៦០ពាន់លានវ៉ុន (៣១លានដុល្លារ) ក្នុងតំបន់ទេសចរណ៍ពិសេស ដែលក្នុងនោះរួមមានសណ្ឋាគារ២របស់ក្រុមហ៊ុន HYUNDAI ASAN និងកន្លែងវាយ កូនគោលមួយរបស់ក្រុមហ៊ុន EMERSON PACIFIC GROUP ។
