បើកសម្ពោធផ្សារអង្គការសេដាកសាខាទី៨ក្នុងរាជធានីភ្នំពេញ
ដោយ ៖ អប្សរា
ថ្ងៃអង្គារ ទី៧ ខែកញ្ញា ឆ្នាំ២០១០ ម៉ោង ១៥:៥០
ដាណេ
ផ្សារអង្គការសេដាក សាខាទី៨
រាជធានីភ្នំពេញ ៖ ផ្សារអង្គការសេដាក សាខាទី៨ ដែលមានទីតាំងស្ថិតនៅផ្ទះលេខ២២០ ផ្លូវលេខ៦៣ សង្កាត់បឹងកេងកងទី១ ខណ្ឌចំការមន ក្បែរវិទ្យាល័យបឹងកេងកង ត្រូវបានបើកលក់ផលិតផលជាផ្លូវការកាលពីល្ងាចថ្ងៃទី៦ កញ្ញា ក្រោមការចាប់អារម្មណ៍យ៉ាងខ្លាំងពីអតិថិជនទូទៅ ។ លោកហ៊ឹម ខទៀត មន្ត្រីសំរបសំរួលអង្គការសេដាកបានឱ្យដឹងថា បច្ចុប្បន្ននេះទោះបីមានការខិតខំប្រឹងប្រែងពីភ្នាក់ងារមានសមត្ថកិច្ចក្នុងការទប់ស្កាត់សារធាតុគីមីដែលបានប្រើប្រាស់ទៅលើបន្លែ សាច់ ផ្លែឈើនៅលើទីផ្សារជាទូទៅយ៉ាងណាក៏ដោយ ក៏បញ្ហានេះនៅតែជាក្តីកង្វល់នៅឡើយ ។ ពេលនេះអង្គការសេដាក ជាចំលើយតែមួយគត់សំរាប់បញ្ចប់ការខ្វល់ខ្វាយខាងលើ តាមរយៈសាខាផ្សារសេដាក ដែលកំពុងត្រូវបានបង្កើតឡើងជាបន្តបន្ទាប់ ។ លោកហ៊ឹម ខទៀត បានបញ្ជាក់ថា ផ្សារអង្គការសេដាក មានផលិតផលគ្រប់ប្រភេទមិនខុសពីផ្សារនានានោះទេ ប៉ុន្តែអ្វីដែលខុស គឺផ្សារសេដាកលក់តែផលិតផលដែលផលិតតាមគោលការណ៍ធម្មជាតិ ផ្គត់ផ្គង់ដោយអ្នកផលិត សហការជាមួយអង្គការសេដាក ។
ផ្សារអង្គការសេដាកមានលក់អង្ករ បន្លែ សាច់គ្រប់ប្រភេទដែលគ្មានសារធាតុគីមី ។ ផ្លែឈើក្នុងស្រុកមានប្រភពច្បាស់លាស់ បន្លែស្រស់ដាំមិនប្រើថ្នាំពុល ឬជីគីមី ។ ការចំណាយរបស់លោកអ្នកសំរាប់ការទិញផលិតផលធម្មជាតិ នឹងរួមចំណែកលើកស្ទួយជីវភាពប្រជាកសិករខ្មែរ ។ អាសយដ្ឋានសាខាផ្សារសេដាកទាំង៨គឺ ទី១-ផ្ទះលេខ៦៨៩ ផ្លូវកម្ពុជាក្រោម សង្កាត់ទឹកល្អក់ទី១ ខណ្ឌទួលគោក, ទី២-ផ្ទះលេខ១៣ ផ្លូវលេខ៣៦០ សង្កាត់បឹងកេងកងទី៣ ខណ្ឌចំការមន, ទី៣-ផ្ទះលេខ៦៧ ផ្លូវលេខ២៣០ សង្កាត់បឹងសាឡាង ខណ្ឌទួលគោក, ទី៤-ផ្ទះលេខ២០B ផ្លូវបុរីសូនី សង្កាត់ទឹកថ្លា ខណ្ឌទួលគោក, ទី៥-ស្ថិតនៅខេត្តព្រះសីហនុ, ទី៦-ផ្ទះលេខ១៥១ ផ្លូវលេខ៥៩២ សង្កាត់បឹងកក់ទី២ ខណ្ឌទួលគោក, ទី៧-ផ្ទះលេខ៥១ ផ្លូវលេខ១៣ សង្កាត់ផ្សារចាស់ ខណ្ឌដូនពេញ និងទី៨-ផ្ទះលេខ២២០ ផ្លូវលេខ៦៣ សង្កាត់បឹងកេងកងទី១ ខណ្ឌចំការមន ។ អង្គការសេដាក មានគោលការណ៍បង្កើតសាខាផ្សារច្រើនទៀតដើម្បីបំរើសេចក្តីត្រូវការរបស់អតិថិជន ៕
