តារាភាពយន្តបាញ់ប្រហារហូលីវូដលោក ជែកគី ចាន់ហៅឈិនឡុង ថ្មីៗនេះបានអំពាវនាវឲ្យមានការដាក់បញ្ចូលក្បាច់គុនវូស៊ូឬហៅថាកុងហ៊្វូទៅក្នុងកីឡាអូឡាំពិក ។ តាមរយៈការដក ស្រង់សំដីដោយកាសែតផ្លូវការចិន «ឆាយណា ដេលី»លោកជែកគី ចាន់បាននិយាយថា៖«ខ្ញុំ ចូលចិត្តក្បាច់គុនវូស៊ូជាខ្លាំង ហើយខ្ញុំចង់ឃើញ ក្បាច់គុននេះត្រូវបានគេបញ្ចូលទៅក្នុងកីឡាអូឡាំពិកនៅថ្ងៃអនាគត»។
គណៈកម្មាធិការកីឡាអូឡាំពិកអន្តរជាតិបានទទួលស្គាល់ក្បាច់គុនវូស៊ូថាជាកីឡាមួយប្រភេទរួចហើយ ប៉ុន្តែនៅមិនទាន់បានបញ្ចូលកីឡានេះទៅក្នុងការប្រកួតកម្មវិធីណាមួយនៅឡើយទេ មិនដូចជាក្បាច់គុនអាស៊ីដទៃទៀតដែលមានដូចជាតេក្វាន់ដូនិងយូដូជាដើមបានក្លាយជាប្រភេទកីឡាសាកលរួចស្រេចទៅហើយនោះ។បើទោះបីជាយ៉ាងនេះក៏ដោយ គណៈកម្មាធិការកីឡាអូឡាំពិកបានអនុញ្ញាតឲ្យចិនរៀបចំការប្រកួតជ្រើសរើសជើងឯកកីឡាវូស៊ូនៅពេលដំណាលគ្នាជាមួយការប្រកួតអូឡាំពិកទីក្រុងប៉េកាំងឆ្នាំ២០០៨ ដែលកាលនោះក៏មានការចូលរួមពីតារាហូលីវូដលោកជេតលី(លីលីនជា)ផងដែរ។
លោកជែកគី ចាន់បានពន្យល់ថា ស្នៀតប្រយុទ្ធច្រើនបែបច្រើនយ៉ាងរួមនិងកម្រិតថ្នាក់ខុសគ្នាជាច្រើនរបស់ក្បាច់គុនវូស៊ូអាចក្លាយជាឧបសគ្គនៅក្នុងដាក់បញ្ចូលកីឡានេះទៅក្នុងព្រឹត្តិការណ៍អូឡាំពិក។ លោកបាននិយាយ ថា៖ «បញ្ហានេះបានធ្វើឲ្យមានផលវិបាកនៅក្នុងការធ្វើឲ្យក្បាច់គុនវូស៊ូទទួលបានការចាប់អារម្មណ៍ពីបណ្តាទស្សនិកជនអន្តរជាតិ» ។ តាមកាសែតដដែលបានរាយការណ៍ទៀតថា លោកជែកគី ចាន់ បានចាប់ផ្តើមហាត់ក្បាច់គុនវូស៊ូតាំងពីកុមារភាពមកម៉្លេះ ហើយសព្វថ្ងៃនេះលោនៅតែធ្វើការហ្វឹកហាត់ជាប្រចាំ។ ម្យ៉ាងទៀត លោកថែមទាំងបានយកជំនាញក្បាច់គុនរបស់ខ្លួននេះ ថតនៅក្នុងខ្សែភាពយន្តជាច្រើនរឿងទៀតផង ៕
ចែករំលែកព័តមាននេះ