ខេត្តកណ្តាល ៖ ព្រះសរីរិកធាតុ និងវត្ថុបុរាណមួយចំនួនដែលតម្កល់ទុកនៅក្នុងព្រះសក្យមុនីចេតិយលើភ្នំព្រះរាជទ្រព្យ ហៅភ្នំឧដុង្គក្នុងស្រុកពញាឮ ត្រូវបានចោរទមិឡឥតសាសនាលួចយកទៅបាត់កាលពីវេលាយប់ថ្ងៃទី១០ ធ្នូ ២០១៣ ។
ខេត្តកណ្តាល ៖ ព្រះសរីរិកធាតុ និងវត្ថុបុរាណមួយចំនួនដែលតម្កល់ទុកនៅក្នុងព្រះសក្យមុនីចេតិយលើភ្នំព្រះរាជទ្រព្យ ហៅភ្នំឧដុង្គក្នុងស្រុកពញាឮ ត្រូវបានចោរទមិឡឥតសាសនាលួចយកទៅបាត់កាលពីវេលាយប់ថ្ងៃទី១០ ធ្នូ ២០១៣ ។
ប្រភពបានឱ្យដឹងថា ទាក់ទិននឹងករណីបាត់នេះមិនត្រូវបានសមត្ថកិច្ច និងអាជ្ញាធរទម្លាយឱ្យបានដឹងលម្អិតនោះទេ ប៉ុន្តែបើតាមប្រភពព័ត៌មានបានបញ្ជាក់ឱ្យដឹងថា កោដ្ឋធ្វើអំពីមាសដាក់សរីរិកធាតុមានតម្លៃរាប់ម៉ឺនដុល្លារ រួមនិងវត្ថុបុរាណមួយចំនួនទៀត ដែលតម្កល់ទុកនៅក្នុងព្រះសក្យមុនីចេតិយត្រូវចោរលួចកាត់សោយកទៅបាត់ហើយ ។
ប្រភពព័ត៌មានបានឱ្យដឹងទៀតថា ព្រះសក្យមុនីចេតីយនៅលើកំពូលភ្នំព្រះរាជទ្រព្យមានបុគ្គលិកយាមនៅទីនោះជាង២០នាក់ តាំងពីជើងភ្នំរហូតដល់កំពូលភ្នំ ប៉ុន្តែមិនដឹងហេតុអ្វីបានជាចោរធ្វើសកម្មភាពលួចបាន ហើយគេចខ្លួនដោយសុវត្ថិភាពទៀត ។ រហូតមកដល់រសៀលថ្ងៃទី១១ ធ្នូ នេះ មិនទាន់មានការប្រកាសជាផ្លូវការពីក្រសួងមន្ទីរ វប្បធម៌ និងវិចិត្រសិល្បៈ ក៏ដូចជាអាជ្ញាធរ និងសមត្ថកិច្ចថា វត្ថុបុរាណមានតម្លៃដែលចោរលួចយកទៅនោះ មានវត្ថុអ្វីខ្លះនោះទេ ។
លោកឧត្តមសេនីយ៍ត្រីអ៊ាវ ចំរើន ស្នងការនគរបាលខេត្តកណ្តាល បានប្រាប់អ្នកយកព័ត៌មានកោះសន្តិភាពតាមទូរស័ព្ទកាលពីរសៀលនេះថា វត្ថុបុរាណមួយចំនួនដែលតម្កល់ទុកនៅក្នុងព្រះសក្យមុនីចេតិយត្រូវបានគេលួចបាត់ ។ រហូតមកដល់ពេលនេះ សមត្ថកិច្ចកំពុងមមារញឹកដុតដៃដុតជើងធ្វើការស្រាវជ្រាវយ៉ាងយកចិត្តទុកដាក់បំផុត ដើម្បីស្វែងរកជនសង្ស័យ និងវត្ថុបុរាណទាំងនោះមកវិញ ប៉ុន្តែនៅមិនទាន់មានតម្រុយនៅឡើយ ។
ចែករំលែកព័តមាននេះ