រាជធានីភ្នំពេញ ៖ ជនជាតិអាមេរិកាំងម្នាក់ត្រូវនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃសហការជាមួយកម្លាំង FBI សហរដ្ឋអាមេរិកចាប់ខ្លួននៅចំណុចភូមិសន្សំកុសលទី៣ សង្កាត់បឹងទំពុន ខណ្ឌមានជ័យ កាលពីព្រឹកថ្ងៃទី៩ ធ្នូ ២០១៣ ពាក់ព័ន្ធបទល្មើសរំលោភសេពសន្ថវៈដែលប្រព្រឹត្តនៅប្រទេសអាមេរិកចំនួន៥ករណី។
តាមប្រភពព័ត៌មានបានឱ្យដឹងថា ជនជាតិអាមេរិកាំងរូបនេះឈ្មោះ Danied Stephen Joh San ភេទប្រុស អាយុ៣៥ឆ្នាំ ស្នាក់នៅក្រោមស្លាកឈ្មោះអង្គការ Hopetransitionos ដែលមានការប្រមូលផ្តុំកុមារកម្ពុជាចំនួន៣២នាក់ ប្រុស២១នាក់ ស្រី១១នាក់ ក្នុងនោះភាគច្រើនគឺមានអាយុក្រោម១៨ឆ្នាំ ប៉ុន្តែឈ្មោះអង្គការនេះត្រូវបានមន្ត្រីនៃមន្ទីរសង្គមកិច្ចអតីតយុទ្ធជន និងយុវនីតិសម្បទារាជធានីភ្នំពេញបដិសេធថា ជាអង្គការគ្មានច្បាប់ទម្លាប់ត្រឹមត្រូវទេ។
ទោះជាយ៉ាងនេះក្តី នៅក្នុងបរិវេណអង្គការនេះ មានរចនាសម្ព័ន្ធត្រឹមត្រូវ មានជនបរទេស និងខ្មែរស្នាក់នៅចម្រុះគ្នា ដែលក្នុងនោះលោក Danied Stephen Joh San មានតួនាទីជាប្រធានអង្គការ។ ក្រោយពេលឃាត់ខ្លួន សមត្ថកិច្ចសហការជាមួយ FBI អាមេរិកសម្រេចបញ្ជូនខ្លួនជនសង្ស័យទៅនាយកដ្ឋានជនបរទេសដើម្បីរៀបចំសំណុំបែបបទបញ្ជូនទៅសហរដ្ឋអាមេរិកវិញ។
ចំពោះកិច្ចសហការបង្ក្រាបបទល្មើសបំពានផ្លូវភេទខាងលើនេះ មន្ត្រីដែលមានភារកិច្ចក្នុងប្រតិបត្តិការនោះបាននិយាយថា អនុវត្តឡើងដោយយោងតាមបទបញ្ជារបស់លោកនាយឧត្តមសេនីយ៍នេត សាវឿន អគ្គស្នងការនគរបាលជាតិ ។
សូមបញ្ជាក់ថា ជនជាតិអាមេរិកាំងរូបនេះទើបមកជួលផ្ទះធ្វើជាស្នាក់ការអង្គការកាលពីខែសីហា ២០១៣ ហើយជននេះក៏ទើបចូលមកស្រុកខ្មែរកាលពីពេលថ្មីៗនេះដែរ៕
ចែករំលែកព័តមាននេះ