សាលាខណ្ឌដូនពេញកាប់ឆ្ការព្រៃត្រែងបញ្ចប់ជំរកក្មេងហិតកាវ និងបោសសំអាតច្រាំងទន្លេដើម្បីបរិស្ថាន
ដោយ ៖ អប្សរា
ថ្ងៃអាទិត្យ ទី២៣ ខែឧសភា ឆ្នាំ២០១០ ម៉ោង ១៦:០២
ប៊ុនរី
សាលាខណ្ឌដូនពេញកាប់ឆ្ការព្រៃត្រែង
រាជធានីភ្នំពេញ ៖ ព្រៃត្រែងដែលជាទីជំរកក្រុមក្មេងហិតកាវនៅតាមមាត់ច្រាំង ទន្លេទល់មុខផ្សាររាត្រី ត្រូវបានលោកសុខ សម្បត្ដិ អភិបាលខណ្ឌដូនពេញ និងមន្ដ្រីសាលាខណ្ឌ ព្រមទាំងមន្ដ្រីសាលាសង្កាត់ទាំង១១នាំគ្នាកាប់ឆ្ការ និងបោសសំអាត កាលពីព្រឹកថ្ងៃទី២២ ឧសភា ឆ្នាំ២០១០ ដើម្បីរក្សាសណ្ដាប់ធ្នាប់ អនាម័យបរិស្ថានឱ្យបានល្អ ។លោកអភិបាលខណ្ឌដូនពេញបានមានប្រសាសន៍ថា ដោយមើលឃើញភាពអនាធិបតេយ្យពីសំណាក់ក្រុមក្មេងហិតកាវដែលតែងតែធ្វើសកម្មភាពឆក់សំភាររបស់ប្រជាពលរដ្ឋ ដែលមកលេងកំសាន្ដនៅផ្សាររាត្រី ហើយរត់ទៅពួនក្នុងគុម្ពត្រែងច្រាំងទន្លេ និងស្របពេលនៅទីនោះមានការចោលសំរាមអនាធិបតេយ្យធ្វើឱ្យប៉ះពាល់បរិស្ថាន និងសោភ័ណភាពផងនោះ ទើបលោកយកថ្ងៃឈប់សំរាកដឹកនាំមន្ដ្រីជំនាញសាលាខណ្ឌ ព្រមទាំងមន្ដ្រីសាលាសង្កាត់ទាំង១១ ធ្វើការកាប់ឆ្ការព្រៃត្រែង និងបោសសំអាតតាមមាត់ទន្លេមុខផ្សាររាត្រី រហូតដល់ព្រះគម្លង់ ប្រយោជន៍ ដើម្បីឱ្យមានអនាម័យបរិស្ថានល្អនៅក្នុងមូលដ្ឋាន ។
លោកហែម ឫទ្ធី អនុប្រធានមន្ទីរខណ្ឌដូនពេញ បានបញ្ជាក់ថា ការងារពលកម្មដើម្បីលុបបំបាត់ជំរកក្មេងហិតកាវ និងអនាម័យបរិស្ថានឱ្យបានល្អនេះ មានការចូលរួមពីគណៈអភិបាលខណ្ឌ មន្ដ្រីសាលាខណ្ឌ មន្ដ្រីសាលាសង្កាត់សរុបប្រមាណជាង៥០នាក់ ហើយបានអនុវត្ដចាប់ពីវេលាម៉ោង៨និង៣០នាទីព្រឹក រហូតដល់ម៉ោង១១និង៣០នាទី នាថ្ងៃដដែល ។ គួររំលឹកថា ការងារបោសសំអាត និងការធ្វើអនាម័យបរិស្ថានឱ្យបានល្អនេះ សាលា ខណ្ឌដូនពេញ តែងតែធ្វើជាញឹកញាប់ ជាពិសេសធ្វើនៅថ្ងៃឈប់សំរាកដូចជាថ្ងៃសៅរ៍ នេះជាដើម ដើម្បីចូលរួមកែលំអសោភ័ណភាពក្នុងមូលដ្ឋាន ក៏ដូចជានៅទូទាំងរាជធានីភ្នំពេញ ឱ្យស័ក្ដិសមជាទីកន្លែងទេសចរណ៍សំរាប់ឱ្យភ្ញៀវជាតិ និងអន្ដរជាតិដើរកំសាន្ដ។លោកសុខ សម្បត្ដិ អភិបាលខណ្ឌដូនពេញ បានរំលឹកថា ចាប់ពីថ្ងៃទី១ ឧសភា ឆ្នាំ ២០១០ សាលាខណ្ឌដូនពេញ បានចេញគោលការណ៍ឱ្យសាលាសង្កាត់ទាំង១១ អនុវត្ដការ ផាកពិន័យដល់ប្រជាពលរដ្ឋទាំងឡាយណាដែលបោះចោលសំរាមគ្មានសណ្ដាប់ធ្នាប់ឱ្យ បានជាប្រចាំជាក់ស្ដែងកន្លងមកសាលាសង្កាត់បានផាកពិន័យសរុបជាទឹកប្រាក់ប្រមាណជាង៦០ម៉ឺនរៀលផងដែរ ។
